2 Chay wichanga quimsa simäna nuwa Daniel wañupacush-yupay caycar, juyupa llaquicurä. 3 Alli micuycunatawan ima aychatapis mana micurächu. Bïnutapis mana upurächu. Jaracuycaj wirawan umäta mana pajpacurächu. Sapćhalla cacurä. 4 Wata jallaycunan quillaćhu ishcay ćhunca ćhuscuwan (24) junajta aywaycaptin, jatun Tigris mayu cućhunćhu caycarä. 5 Ricapacuynïćhu juc runa ricaripamasha. Achic-achicyaycaj müdanash caycaran. Allinnin juri waćhcuwan waćhcucush caycaran. 6 Quiquinnam achic-achicyaycaj atujpa jillaynin rumi-nirajraj achicyaycämuran. Jajllanpis illagu-nirajraj chillap-chillapyaycämuran. Ñawinpis achqui-nirajraj ratataycämuran. Ricranwan ćhancancunana brunsi-nirajraj achicyaycämuran. Rimacuyninpis chay-chicaj runa rimarcaycämushan-niraj wiyacaran.

7 Ricaripamashanta nuwallam ricashcä. Yanagämajnïcunaga mana ricaranchu. Mayayllash mayapäcuran. Chayshi mancharicäcuran. Jishpiypa aywar, pacacäriran. 8 Llapan jaguiraycamaptin, achic-achicyaycaj ricaripamashanta quiquillä ricarä. Ima ruraytapis manam camäpacurächu. Ćhiyacäcushcä. Callpäpis ushyaypa ushyacäcusham. 9 Rimashanta wiyar, ucacash pampaman tunishcä. Ucsicäcushcä. 10 Ucsicarcaptï, maquinwan yataycamasha. Wäcarcunäpaj yanapämasha. 11 Jinarcur nimasha: «Daniel, Tayta Diosninchi sumajshi cuyashunqui. Chaymi willapäcushäta sumaj tantiyacuy. Mä, ićhircuy. Caćhacamaptinmi, shamushcä.» Chaynuy nimaptin, sicsicyaycar ićhircushcä. 12 Ićhircuptï, nimasha: «Daniel, ama manchacuychu. Mañacushayquitaga Tayta Diosninchi wiyasham. Chaymi shamushcä. 13 Ishcay ćhunca jucwan (21) junajta Persia marcacunata täpaj anjil chapata rurapämasham. Persia marcacunapa mandajnincunata täpaj anjil chapämaptin, yanapämaj Miguel shamusha. Payga mayur anjilcunapa masinmi. 14 Cananmi ushyacänan wichanćhu Israel marca-masiquicuna imaman ćhayanantapis tantiyachishayqui. Ricaripushayquiga ushyacänan wichanpärämi caycan.»

15 Chaynuy nimaptin, pampaman ucsicashäcaman jungurpacuycurä. Rimapacuytapis mana camäpacurächu. 16 Chaura runaman ricchacujga sharcamur, shimïta yataycuran. Yataycamaptin, rimapacurirä. Ñaupäćhu caycajta nishcä: «Taytallau tayta, ricapacuycaptï, llaquicuywanmi shungüpis ishquicäcusha. Janäpis jutucäcusham caycan. 17 Taytallau tayta, pampa runa caycarsi, ¿jamwan parlarcushuwanchuraj? Callpäpis illaricäcushanam. Jamaynïpis ushyacäcushanam.»

18 Chaura runaman ricchacuj yapay yataycamasha. Callpacachimasha. 19 Jinarcur, nimasha: «Tayta Diosninchi sumajshi llaquipaycäshunqui. Ama manchacunquinachu. Allilla juyaycullay, ari. Callpachacuy. Shacyäcunquiman.» Chaynuy nimaptin, änir, callpä ricarisha. Nircur nishcä: «Taytallau tayta, shacyächimashcanquina. Shimiquitapis wiyacüman.» 20 Payna tapumasha: «¿Imaman shamushätapis musyaycanquichu? Persia marcacunata täpaj anjilta magaj aywashaj. Payta ićhipuptï, Grecia marcacunata täpaj anjilna ricarimungapaj. 21 Mana aywarga, imanuy-imanuy canancunapitapis willashayqui. Llapanpis ‹Rasuncajta musyachicunan› nishan librućhümi isquirbish caycan. Chay chiqui anjilcunata ićhipunäpaj mana picunapis yanapämanchu. Mayur anjil Miguelga quiquillanmi yanapaycäman. Israel marca-masintiquitam täpaycäshunqui.