2
Piscädupa paćhanćhu caycarna, Jonás Tayta Diosninchita mañacuran:2 «Taytallau Tayta, wañuy ñacayćhu caycarmi, jamta jayarämuraj.
Jayarämuptï, ćhasquicamarayquim.
Chacaj pachapita-pacham jayarämuraj.
Jayarämuptï, shimïta wiyamarayquim.
3 Jammi yacuman jitarpachimarayqui.
Ruri-ruricaman jitarpachimarayqui.
Yacuna chapacarcamaran.
Yacu büchiypa-büchir, pugaypa-pugar, niticarcamaran.
4 Chaymi yarparä: ‹Ricay ñawiquipita jargamashcanqui.
Wasiquiman manaćhi ćhayashänachu› nir.
5 Wañuyman ćhayachimar, yacu ñillpumaran.
Ruri-ruricaman ñillpucarcamaran.
Ututucuna umätapis pitucarcamaran.
6 Ruri rajracamanraj ćhayarä.
Ruri pachaćhüga imaycamanpis chaparaycämaran.
Chacaj pachaćhu wañuy janäćhüna caycaptinsi,
jammi, Tayta Diosnï, washämarayqui.
7 Wañucuycarsi, Tayta Diosninchita yarpärirä.
Mañacamushäta quiquiquipa wasiquićhürämi ćhasquicurayqui.
8 Manacaj ricchacujcunata manchapacushpan, llaquipäcuj cashayquita runacuna jungaycärin.
9 Nuwam ichanga cuyachicuynïta jarar, cushishalla alliman ćhurayculläshayquipaj.
Aunishätapis llapantam ćharcushaj.
Tayta Diosnillanchim washäcujninchi.»
10 Chaynuy jayarämuptin, Tayta Diosninchi piscäduta niran: «Chaqui allpamanna Jonásta ajturiy.» Chaynuy niptin, änir, pallgallaman ajturiran.