3 Chaynuy niptin, Jonás wiyacuran. Tayta Diosninchi nishannuylla Nínive marcaman aywaran. Nínive marcaga jatun marcash caran. Pipis chay marcata quimsa junajtaräshi puriyta ushyaj. 4 Chaura chay marcaman yaycuycur, juc junajcamanraj Jonás aywaran. Nircur, runacunata piñaparan: «Ćhuscu ćhunca (40) junajllatanam Nínive marcata ushyaypa ushyarish cangapaj» nir.

5 Nínive runacunana Tayta Diosninchipa shiminta ćhasquicuran. Llapanpis ayunapäcuran. Juchancunapita wanacushpan jatun runacunapis, lluta runacunapis jaćhga müdanancunata ushtucäriran.

6 Rimay puriptin, Nínive marca mandajmanpis Jonás willapäcushan ćhayaran. Willapäcushan shungunman ćhayaptin, dispächunpita llucshir, alli-allinnin müdananta llushtirir, jaćhga müdananta ushtucuran. Juchanpita wanacushpan ućhpa mashtashallaman jamacuycuran. 7 Nircur, llapan Nínive marca-masincunata willachicuran: «Mandajninchipa shiminta wiyayculläshun. Mandäshijnincunapa shimintapis wiyacärishun. Mayganninchisi ima micuytapis ama micushunchu. Ima yacutapis ama upushunpishchu. Uywanchicunatapis ama micuchishunchu. Ama upuchishunchu. 8 Manchäga llapanchi jaćhga müdanata ushtucushun. Uywashanchi wäcacunatapis, uyshacunatapis jaćhga müdanatawan shawapäshun. Llapan shungunchiwanpis Tayta Diosninchita jayaräshun. Juchaćhu arupäcushanchipita wanacushun. Chiquicur ima-imata rurashanchitapis caćharicushunna. 9 Wanacuptinchi, llaquipämashpanchi Tayta Diosninchipa ullguyninpis jasacäcungaćhi. Ushyacayman manaćhi ćhayachimäshungachu» nir.

10 Chaura Nínive marca runacunata llaquicushpan ima-imata rurashanta ricarna, juchancunapita wanacärishantapis ricarna, llaquipashpan manam yarpashantachu Tayta Diosninchi camacächiran. Willacachish carsi, manana ushyacaymanchu ćhayachiran.