4
Llaquipashanta ricar, Jonáspa shungunman manam tincuranchu. Manchäga ullgucäcuran. 2 Tayta Diosninchitana niran: «Taytallau Tayta, ¿manachu marcäćhu caycällarraj willashcaj? Chaypitam Tarsis marcapa jishpicurä. Alli shungu Taytanchi cashayquita musyarä. Llaquipäcuj cashayquitapis musyarä. Jucllachu manam ullgucurcunqui. Manchäga imaycamanpis llaquipäcujmi canqui. Runata ushyaypa ushyarinayqui caycaptinpis, wanacunqui. 3 Taytallau Tayta, chaynuy cashayquiga shungüman mana tincuptin, wañuycachillämay, ari. ¿Imapäraj cawachimanqui? Wañurachimaptiqui, alli canman» nir.4 Tayta Diosninchina niran: «Jonás, ¿ullgur, allitachuraj ruraycanqui?»
5 Jonásna marca wajtanpa llucshiran. Inti jigamunanpa aywar, llantuta jatachiran. Llantullaćhüna Nínive marca imaman ćhayanantapis ricayta munaran.
6 Tayta Diosninchina Jonásta acananpita washar, calbäsata wiñachimuran. Atayar, llantupa jananmanpis wiñar, llantuparan. Calbäsa llantupaptinga, Jonás sumaj cushicuran.
7 Warannin tutana calbäsaman Tayta Diosninchi shiurita caćhacuran. Shiurina wanunta capćhuriptin, calbäsa uyur chaquicäcuran. 8 Inti jigarcamuptinna, Tayta Diosninchi wapuy wayratapis caćhamuran. Shanay rupayparaj acacurcuptin, umantapis tumarachiptin, wañuyta munaran. Jonásna niran: «¿Imapäraj cawäsi? Wañucuptï, alli canman.»
9 Tayta Diosninchina niran: «¿Calbäsa-janan ullgur, allitachuraj ruraycanqui?»
Jonásna niran: «¿Piraj mana ullgunmanchu? Ullgullawanćhi wañucushäpis.»
10 Tayta Diosninchina niran: «Chay calbäsata manam murushcanquichu. Manam wiñachimushcanquipishchu. Juc chacaylla wiñaramusha. Waranninga chaquicäcusha. Chaypis llaquipaycanqui. 11 Chay calbäsallata llaquipashayqui-jina, ¿manachu Nínive runacunatapis llaquipäman? Nínive marcaga jatun marcam. Chayćhu may-may runapis tiyan. Paćhac ishcay ćhunca waranga-ima (120,000) runasi allita, mana allita rurashantapis manam tantiyanchu. Uywancunapis chay-chicam caycan.»