Diospa niskanwan causaychej
2
Chayraycu sakeychej tucuy llullacuyta, puraj uya cayta, envidiacuyta, runaj contranpi tucuy parlaytawan. Tucuy chay manacajcunata ni ujtawan khawarinayquichejpaj sakepuychej. 2 Imaynatachus recién naceska wawitas lecheta maytapuni munancu, ajinallatataj kancunapis Diospa cꞌacha niskanta maytapuni munaychej. Ajinapi mosoj causayniyquichejpeka wiñanquichej. 3 Rejserkanquichejña Señorninchej cꞌacha caskantaka. Chayraycu niskanta astawan munaychej.Causashaj rumimanta
4-5 Runaska yupaychana-wasita ruwanancupaj rumista allinta khawaspa ajllancu. Diospis yupaychana-wasita ruwashan. Cay wasi cimientopaj causayta koj Cristota churarka, sumaj caj rumitajina. Runaska payta khesacharkancu. Diospajrí payka may sumajpaj khawaskan ajllacuskantajmin. Chayraycu Cristoman kayllaycuychej paywan ujchaska Diospa yupaychana-wasinpaj rumisjina canayquichejpaj. Chaywanpis yupaychana-wasenka Diosman santo kayllaycuchejcunapajmin. Kancunaka chay kayllaycuchejcuna canquichej tucuy sonkowan Diosman jaywacunayquichejpaj. Chay cheka jaywacuskayquichejka Jesucristonejta Diosta cusichin. 6 Palabranpi Dioska nin:
Sion llajtaypi wasichana rumitajina [Cristota]a churani.
Payka wasi cimientopaj ajllaskay may sumajpaj khawaskaymin.
Tucuy paypi japꞌicojcuna yachankancu niskasniyta juntꞌanaytapuni, nispa.
7 Kancuna paypi japꞌicojcunapajka Cristoka may sumajpaj khawaskamin. Mana japꞌicojcunapajtaj palabranpi nin: “Wasichajcuna rumita khawaspa khesacharkancu. Wasita sayachinapajrí chay khesachaska rumeka aswan sumajmin. 8 Chay rumeka miscꞌana, urmachej rumi cashan. Ajinallataj Cristoka Diospa niskanta mana casucojcunapaj urmachej rumijinamin, mana payta casuskancuraycu.
Diospa ajllacuskasninmanta
9 Kancunarí Diospa ajllacuskasnin canquichej. Camachejninchej Diosman kayllaycuchejcuna, payman tꞌakaska ayllun canquichej. Yuyaskanmanjina paypa runasnin canayquichejpaj wajyasorkachej lakha juchamanta paypa sumaj cꞌanchayninpi causanayquichejpaj. Wajyasorkachejtaj paypa cꞌacha ruwaskasninta tucuy runasman willaranayquichejpaj. 10 Ñaupajpi mana paypa runasninchu carkanquichej. Cunanrí Dios ajllacusorkachej runasnin canayquichejpaj. Ñaupajpi mana qhuyacuskasninchu carkanquichej. Cunanrí Diospa qhuyacuskasnin canquichej.
Diospa runasninjina causaychej
11 Munacuskasníy, yuyaricuychej cay pachapeka forastero causajcunalla canquichej. Janaj pacha llajtayoj caskayquichejraycu nishayquichej, cay pacha munaycunamanta carunchacunayquichejta. Chay manacaj munaycunaka mosoj causayniyquichejpi kancunawan makanacushancupuni. 12 Cay pacha runas chaupipi causashaspa cꞌachata causaychej. Kancunaj contrayquichejtapis parlancuman manacaj ruwajcunapis cawajchejjina. Chaywanpis cꞌacha ruwaskasniyquichejta khawaspa jakay pꞌunchaypi Diosta jatunchankancu.
13 Señorninchejraycu runacunaj churaskan tucuy autoridadta casuychej. Curaj camachejtaka curajtajina casuychej. 14 Paypa cachamuskacunantapis casuychej. Chay cachamuskasnin cancu mana allin cajta ruwajcunata muchuchinancupaj. Allin cajta ruwajcunatataj mentanancupaj cancu. 15 Dioska ajinata casucunayquichejta munan. Chaymanjinataj cꞌacha ruwanaswan mana yuyayniyoj chꞌatajcunata chꞌinyachiychej.
16 Diosllapaj causanayquichejpaj juchamanta cachariskas carkanquichej. Amataj chay cacharicuyka sajra munayta ruwanayquichejpajchu cachun. Astawanpis cachariskas caspaka Diosta casuspalla causaychej. 17 Tucuy runasta sumajpaj khawaychej. Cristopi hermanosta munacuychej. Diostaka manchachicuywan sumajpaj khawaychej. Curaj camachejta sumajpaj khawaychej.
Patroncunamanta camachiskacunamantawan
18 Wasipi yanapaj camachicunaka, patronniyquichejta casuychej. Qhuyacuyniyoj cꞌacha cajcunatapis, mana reparayniyoj sajra cajcunatapis, tucuy patroncunata casuychej. 19 Uj runa Diospa ñaupakenpi causashaskanta yachaspa, muchunman. Mana allin cajta payman runas ruwajtincu chꞌinlla muchunman. Sichus ajinata muchunman chayka, Diosta cusichin. 20 Juchallicuskayquichejraycuchus ñacꞌarinquichej chayka, mana mentaskachu canquichej. Astawanrí sichus cꞌacha imasta ruwanquichej chꞌinllataj muchunquichej chayka, Diosta cusichinquichej. 21 Dioska ajinata causanayquichejpaj wajyasorkachej. Yachanquichej Cristopis kancunapaj muchorka payjina ruwajcuna canayquichejpaj. 22 Payka mana juchallicorkachu nitaj jaycꞌajpis llullacorkachu. 23 3.6 Runas payman sajrata parlashajtincupis payka mana sajrallatatajchu cutichicorka. Ñacꞌarishaspapis mana manchachinanpaj parlarkachu. Astawanrí Diosman sakerka chekanta ruwajb caskanta yachaspa. 24 Pay quiquin chacatanapi wañorka juchasninchejta khechunawanchejpaj. Payka wañorka juchasninchejmanta cachariskas chekanta ruwaspa causananchejpaj. Paypa ñacꞌariyninwantaj thañichiskas canquichej. 25 Chꞌekeraska ovejasjina Diosmanta carunchacorkanquichej. Cunanrí Cristomanña cutirerkanquichej. Payka michisojniyquichej khawasojniyquichejtaj.