2 Hermanosníy, mayta cusicunayquichej tucuy imaymana juchaman urmachej cajcuna jamusojtiyquichejka. 3 Yachanquichejjinaña chay llaquiycunata muchuspa Diospi chekamanta japꞌicuskayquichejta ricuchinquichej. Llaquiycunata atipaskayquichejnejta callpachaskas canquichej aswan sinchꞌita sayanayquichejpaj. 4 Llaquiycunata muchuychej sumajta wiñanayquichejpaj sonkoyquichejpi. Ajinamanta tucuy imapi cheka ruwajcunapuni cawajchej Diospa ñaupakenpi, tucuy imapaj sumajta waquichiskas.

5 Maykenniyquichejpis yachaypi pisinman chayka, Diosmanta mañacuchun. Diostaj payman mana michꞌacuspa konka. Imaraycuchus tucuy paymanta mañacojcunamanka ashqhata konpuni. Manataj paycunata cꞌaminchu mañacojtincoka. 6 Mañacojrí tucuy sonkowan Diospi japꞌicuspa mañacunan tiyan suyaspa japꞌinanta. Amataj iscayrayachunchu. Imaraycuchus iscayrayajka jatun kocha yacuman rijchꞌacun, ujnejmanta wajnejman wayrawan apaycachaska. 7 Chayjina runaka amaña yuyachunchu imatapis japꞌinanta tucuy atiyniyoj Señormanta. 8 Chay iscay iscayta yuyaj runa iscayrayashanpuni tucuy ruwanasninpi, manataj ujllatachu yuyan.

9 Cay pachapi pisi capuyniyoj caj hermanoka cusicunan Dios wawanpaj rejsicapuskanmanta. 10 Cay pachapi khapaj hermanori cusicunan Dioska sonkonta llampꞌuchaskanmanta. Imaraycuchus cay pachapi cajka uj khora tꞌicajinalla wañuspa chincaponka. 11 Inti llojsimuspa wayra sinchꞌita ruphamojtin khora chꞌaquipun tꞌicantaj urmapun. Cꞌachitu caynintaj wiñaypaj chincapun. Ajinallatataj cay pachapi khapaj runapis ruwanasninta ruwashaskanpi wañuponka capuynintaj chincaponka.

12 May cusiska chay runa Jesuspi chekata japꞌicuskanraycu, llaquiycunapi cashaspa atipajka. Atipaskanmanta khepanta Dios payman wiñay causayta konka uj pillutajina. Chay wiñay causayta Dios nerka konanta payta munacojcunaman. 13 Pantachiy llaquiycuna chaupipi cashaspa ni pi nichunchu: “Dios cayman churawan juchaman urmanaypaj”. Imaraycuchus ni ima atinchu Diosta juchallichitaka. Nitaj Dios pitapis llaquiycunaman churanchu juchaman urmachinanpajka. 14 Juchaman urmachej cajcunaka runaj sonkonta aysaspa sajra munayninnejta juchaman apaycachancu. 15 Ajinata runa sajra munayninta casuspa juchallicun. Juntꞌacojtintaj pay wiñaypaj wañunan tiyan.

16 Munaska hermanosníy, ama pantacuychejchu [yuyaspa juchaman urmachej cajcuna Diosmanta caskantaka.]^b 17 Tucuy cꞌacha cajka, sumaj cajpis allinninchejpaj cashan, janaj pacha Diosmanta koska. Paytaj janaj pachapi cꞌanchaycunata ruwarka. [Chaycuna ujjinayaspa llanthuncutapis ujjinayachincu.]^c Diosrí may sumajmin, quiquillanpuni wiñaypaj. Ni jaycꞌaj ujjinayanchu. 18 Yuyaskanmanjinataj causayta kowarkanchej wawasnin cananchejpaj cheka palabranta willarachiskannejta. Wawasninta ruwawarkanchej khepanta ashqha runaspis paypi japꞌicunancupaj.

19 Chayraycu, munaska hermanosníy, sapa uj runa Diospa palabranta sumajta uyarichun, allimanta parlacuchun. Amataj uskhayta phiñacuchunchu. 20 Imaraycuchus phiñacojka mana chekan cajtachu ruwan Diospa ñaupakenpeka. 21 Chayraycu tucuy millay ruwanasta, tucuy imaymana juchatataj sakepuychej. Chekatapuni Dios palabranta sonkoyquichejman churarka. Chayta llampꞌu sonkowan casuychejpuni. Ajinata chay palabranka atiyniyojmin tucuy kancunata juchamanta wiñaypaj cacharichisunayquichejpaj.

22 Kancunarí Diospa palabranta casojcunapuni canayquichej tiyan manataj uyarejcunallachu. Ama pantacuychejchu yuyaspa Diospa munayninta ruwaskayquichejta uyarispallaka. 23 Imaraycuchus uj runa Diospa palabranta uyarillan manataj casunchu chayka, uj espejopi uyanta khawacoj runajinalla cashan. 24 Chay runaka uyanta khawarparicuytawan ripun konkarparipuntaj imaynachus rijchꞌacuskanta. 25 Cristoj sumaj camachiskanta allinta khawajrí casucuspa chekamanta cusicuyniyojmin. Chay camachiskannejtataj runa juchamanta cachariska cashan Diospa munayninmanjina causananpaj. Diospa palabranta casojka mana konkapunchu uyariskanta manachayrí sumaj yuyaywan casunpuni.

26 Sichus uj runa yuyan Diosta chekanta yupaychaskanta, simintataj mana yachachinchu allin cajllata parlayta chayka, pay quiquin pantacun. Diosta manapuni cusichinchu. 27 Tatanchej Diospa ñaupakenpi cheka, mana juchayoj yupaychajka wajcha wawasta llaquicuyniyoj viudastawan yanapan. Sonkontataj juchamanta llimphuta wakaychacun.