3 Señorninchej Jesucristoj Diosnin Tatanka may jatunchaska cachun. Dioska may jatun qhuyacuyninwan mosoj causayta kowarkanchej. Wiñay causayniyoj cananchejpajtaj Jesucristota wañuymanta causarichimorka. Chayraycu Diospipuni confiacunchej. 4 Payka janaj pachapi paywan cusca causanayquichejpaj waquichispa suyashasunquichej. Chay causayka wiñaypaj, cꞌacha, mana tucucuyniyojmin. 5 Kancunaka Diospi japꞌicushanquichej. Chaymanjina Dioska atiyninwan wakaychasonkachej khepa pꞌunchaycama. Jakay pꞌunchaypi Jesucristo cutimojtin paywan causanquichej wiñaypaj.

6 Ajinapi Diospi suyaskayquichejraycu mayta cusicunquichej. Cunanri Diospa munayninmanjina pisi llaquichiskaspis cashanquichej tucuy imaymana phutiywan. Chaywanpis mayta cusicushanquichej. 7 Yachanquichejjina imaynatachus koritaka ninapi unuyachincu puru cananpaj, ajinallatataj Diospis phutiyniyquichejwan kancunapi ruwan. Chaytari payka ruwan paypi sumajta japꞌicuskayquichej yachacunanpaj. Koreka puru caspapis tucucuyniyojmin. Diospi japꞌicuyniyquichejrí mana tucucuyniyoj. Chaywanpis korimanta niskaka aswan sumajmin. Ajinapi Jesucristo cutimojtin sichus Diospi japꞌicuspapuni causashanquichej chayka, Dios jatunchasonkachej. Munacuywantaj sumajpaj khawasonkachej.

8 Jesucristota mana ricorkanquichejchu. Astawanpis paytaka munacushanquichej. Nitaj cunanpis payta ricushanquichejchu. Astawanpis paypi japꞌicuspa maytapuni cusicushanquichej. Chay cusiyka mana willay atinamin, janaj pacha cusiy caskanraycu. 9 Janaj pachapi wiñay causayta Dios kosonkachej paypi japꞌicuskayquichejraycu. Chayta cheka caskanta yachaspataj mayta cusicushanquichej.

10 Diospa unay willajcunan paypa cꞌacha yanapayninmanta sutꞌincharkancu. Imaynata chaywan juchayquichejmanta cachariskas canayquichejta mayta entiendeyta munaspa yachanancupajpuni churacorkancu. 11 Cristoj Espíritun paycunapi tiyacuspa sutꞌinchasharka Cristoj ñacꞌariyninmanta, chay khepata atiywan jatunchaska cananmantawan. Chay sutꞌinchaskas ima tiempopichus imaynatajchus cananta paycunaka mayta yachanancupajpuni churacorkancu kelkaskasnincuta sumajta khawaricuspa. 12 Diosrí paycunaman reparacherka kancunata yanapanancupaj sutꞌinchaskancuta. Manataj paycunapajchu carka. Astawanpis cay tiempopi sumaj willanasta uyarerkanquichej. Diosmanta cachamuskan Santo Espíritoj atiyninwan willajcunaka kancunaman chayta willasorkachej. Angelespis chay sumaj willanasta mayta entiendeyta munancu.

13 Yachanquichej Cristo cutimojtenka kancunapaj tucuy cꞌacha yanapaynin juntꞌacunanta. Chayraycu chay pꞌunchaycama Diospipuni confiacuychej. Imaynatachus uj runa allinta chumpiycucun llancꞌananpaj, ajinallatataj cꞌacha causaypaj sumaj yuyaywan waquichicuychej. 14 Diospa wawasnin caspaka tucuy sonkowan payta casuychej. Manaraj Cristopi japꞌicushaspaka mana yuyayniyoj munayniyquichejmanjina causarkanquichej. Chay ñaupa causayniyquichejmanjinaka amaña causaychejchu. 15 Manachayrí Diosman tꞌakaska chekanta causacuychej Dios wajyasuskayquichejmanjina. Payka tucuy cayninpi santomin. Ajinallataj kancunapis tucuy causayniyquichejpi santo caychej. 16 Palabranpipis nin: “Noka santo caskayraycu kancunapis santo caychej”.

17 Kancunaka Diosmanta mañacuspa Tatayquichej caskanta ninquichej. Payka sapa uj runata ruwaskanmanjina chekanta nin juchayojchus manachus, ni piman sayacuspa. Chayraycu payta Diostajina khawaychej. Munacuywantaj payta casuychej cay pachapi purishaspa mana llajtayoj cashaskayquichejraycu. 18 Kancunaka unay tatasniyquichejmantapacha manacaj causayta japꞌerkanquichej. Yachanquichejtaj chay yankha causaymanta cachariskas canayquichejpaj Dios ranticapususkayquichejta. Kolkepis koripis tucucojllamin cancu. Chayraycu mana chaycunawanchu Dioska ranticapusorkachej, 19 manachayrí Cristoj wañuyninwan. Cristoka mana juchayoj chekanta causarka. Jaywana corderojinataj cruzpi wañuspa yawarninta jichꞌarka. Ajinapi nokanchejraycu may sumaj precioyoj causayninta korka. 20 Dioska manaraj cay pachata ruwashaspa payta ajllarkaña. Chay khepatataj cay pachaman payta cachamorka juchayquichejraycu wañunanpaj. 21 Kancunapaj wañorka paynejtataj Diospi japꞌicunquichej. Dioska wañuymanta Cristota causarichimorka atiyninwantaj jatuncharka. Chayraycu Diospi japꞌicorkanquichej paypitaj confiacushanquichej.

22 Diospa cheka niskanta casuskayquichejraycu juchamanta llimphuchaskasña canquichej. Cristopi hermanosta tucuy sonkowan munacunayquichejpajmin llimphuchasorkachej. Chayraycu cunanka kancunapura munanacunayquichejpuni tiyan tucuy sonkoyquichejwan. 23 Wiñay causaj Diospa niskannejta watejmanta nacecorkanquichej. Chay nacecuyri mana cay pacha runaj nacecuyninjinachu. Manachayrí wiñay causaypaj nacecuymin. 24 Palabranpipis nin: