Diospa palabranta sumaj yuyaywan casuychej
2
Hermanosníy, tucuyniyquichej Señorninchej Jesucristopi japꞌicunquichej. Payka may sumaj, tucuy atiyniyoj Señormin. Chayraycu amapuni ujcunallata curajpaj khawaychejchu wajcunamantaka. 2 Uj ricuchinapaj nisunman iscay runas caskancuta. Uj sumaj pachalliska, kori anillosniyoj carka. Ujtaj pisi capuyniyoj, thanta pꞌachalliska carka. Chay iscay runas yaycumuncuman tantacuyniyquichejman. 3 Kancuna sumajpaj khawaspa chay sumaj pꞌachalliskata niwajchej: “Cay sumaj tiyanapi tiyaycucuy”, nispa. Chay wajchatataj niwajchej: “Jakayllapi sayaricuy chayrí pampallapi tiyacuy”, nispa. 4 Ajinata khawaspa runa-masisniyquichejta ¿manachu curaj runastajina churacushanquichej? Ajinapi runasjina khawanquichej sajra yuyaskayquichejmanjina manataj caskanmanjinachu.5 Uyariwaychej, munaska hermanosníy: ¿Manachu Dios ajllarka cay pachapi pisi capuyniyoj runasta sonkoncupi khapaj canancupaj paypi japꞌicuspa? ¿Manachu paycunata ajllarka causanancupaj pay camachin, chaypi? Chay causayta sumajta nerka konanta tucuy payta munacojcunaman. 6 Kancunarí pisipaj khawanquichej mana capuyniyoj runasta. Diospi mana japꞌicoj chay khapaj runas ¿manachu llaquichisunquichej? ¿Manachu aysasunquichejtaj curajcunaman juchachaskas canayquichejpaj? 7 ¿Manachu paycuna Jesucristoj sumaj sutinmanta uj manacajtajina rimancu? ¡Cristoj sutenka kancuna paypi japꞌicojcunaman churaska carka paypata caskayquichejraycu!
8 Diospa palabran sumajta camachiwanchej: “Runa-masiyquita munacuy kan quiquiyquitajina”. Sichus kancuna chekatapuni chayta casunquichej chayka, walejta ruwanquichej. 9 Astawanrí sichus khapaj runata sumajpaj khawawajchej khapaj caskanrayculla chayka, juchallicunquichej. Munanacuy camachiskataj juchachasunquichej mana casuskayquichejraycu. 10 Imaraycuchus pichari tucuy camachiskasmanta ujnillantapis mana casojka tucuyninmanta juchayojmin. 11 Chaywanpis quiquin Diostaj nerka: “Ama khenchachacuychu”, nispa, nillarkataj: “Ama runasta wañuchiychu”, nispa. Sichus mana khenchachacunquichu, runastarí wañuchinquitaj chayka, mana tucuy camachiskasnintachu casunqui. 12 Cristo camachiwarkanchej munanacunanchejta. Cacharichiwarkanchejtaj paypa munayninta ruwananchejpaj. Chay camachiskamanjinataj Dios niwasun juchayojchus manachus caskanchejta. Chayraycu munacuywan parlana ruwanapis. 13 Imaraycuchus mana qhuyacuyniyoj runasta Dios mana qhuyaspallataj juchachanka juchancuraycu. Qhuyacojtarí qhuyanka.a
Cristopi japꞌicuskanchejraycu allin cajta ruwana
14 Hermanosníy ¿ima allinpajtaj canman sichus uj runa nin Diospi japꞌicuskanta chayka, manataj Diospa munayninta ruwanchu? Chayjinata Diospi japꞌicojka manapuni juchamanta cachariskachu. 15 Caypipis uj ricuchina. Cristopi uj hermano thanta pꞌachayoj canman nitaj chay pꞌunchaypaj miqhunan canmanchu. 16 Ujniyquichejtaj payta ninman: “Allin risuchun. Kꞌoñicunqui miqhunawan sajsacunquitaj”, nispa. Sichus pisichicuskanta mana konman chayka, ¿ima allinpaj canmanrí? 17 Uj runaka Diospi japꞌicuskanta nin manataj paypa munayninta ruwanchu chayka, japꞌicuskanka mana chekachu.
18 Ichapis uj runa niwanman: “Kan Diospi japꞌicunqui. Nokajtataj sumaj ruwaskasniy tiyan”, nispa. Cutichiyman: “Mana ricuchiwayta atiwajchu Diospi japꞌicuskayquita sichus paypa munayninta mana ruwanquichu chayka. Noka ricuchiskayqui Diospi japꞌicuskayta paypa munayninta ruwaskasniywan”, nispa. 19 Diospi japꞌicuspa ninqui chekatapuni uj sapan Dios caskanta. Allintataj ninqui. Supaycunapis uj sapan Dios caskanta creencu. Manchachicuywantaj qharcatitincu. 20 ¡Yankha yuyayniyoj runa! Ricuchiskayqui “Diospi japꞌicuni” niskayqueka khasilla caskanta mana paypa munayninta ruwajtiyqui. 21 ¿Manachu unay tatanchej Abrahamta ruwaskanraycu Dios chekan runapaj khawarka? Arí, Abrahamka wawan Isaacta jaywarka Diosta yupaychananpaj. 22 Cunan reparanquichá Abraham ruwaskasninwan ricucherka Diospi japꞌicuskantaka. Ruwaspalla Abrahamka Diospi japꞌicuskantaka chekata juntꞌarka. 23 Ajinallataj Diospa palabran juntꞌacun. Nintaj: “Abraham Diospi japꞌicorka. Japꞌicuyninraycutaj Dios payta khawarka chekan runapaj”, nispa. Khepatari runas Abrahamta suticharkancu: Dioswan causacoj.
24 Ajinaka reparacunquichejchá ruwaskanraycu runataka Dios chekanpaj khawaskanta manataj “paypi japꞌicuni” niskanraycullachu. 25 Quiquillantaj carka Rahab, chay sajra purej warmipaj. ¿Manachu Dios chekan warmipaj khawarka ruwaskanraycu? Pay willajcunata wasinman wajyaricuspa yanaparka paycunata wajnejta llojsinancuta. 26 Mana samayniyoj cuerpoka wañuskamin. Ajinallataj cashan uj runa nejtin Diospi japꞌicuskanta manataj allin ruwaskaswan ricuchinchu japꞌicuskan cheka caskantaka. Diospi chayjina japꞌicuskanka khasillamin.