Hermanosníy, pisislla kancunamanta yachachejcuna canayquichej. Imaraycuchus yachanquichej sichus nokaycu yachachejcuna pantaycuman chayka, wajcunamanta aswan sinchꞌi juchachaskas casajcu. 2 Tucuy nokanchej anchata pantanchej. Parlaskanpi mana pantaj runaka Cristopi allin wiñaskamin. Pay atin tucuy causayninta camachiyta. 3 Caballospa simincuman churanchej juchꞌuy frenota casunawanchejpaj. Ajinapi atinchej cutirichiyta caballota. 4 Reparaychej barcosmantapis. Ancha jatun cashaspapis sinchꞌi wayrawan apaycachaskas cancu. Uj camachejri munayninmanjina chay barconta chekanta purichin uj juchꞌuy caspꞌillawan. 5 Quiquillantaj cashan kallunchejwanpis. Kallu ancha juchꞌuycitu caspapis jatun atiyniyojmin. May jatun imastataj manacajta jatunchacun. ¡Reparaychej may juchꞌuy ninaka atin ruphayta jatun sachꞌarara monteta! 6 Kalloj sajra parlaynin uj ninajinamin. Tucuy cuerponchejmantarí kallu aswan sajra cashan. Chaytaj runaj tucuy causaynintinta juchꞌuymanta wañunancama sonkonta chꞌichichan. Uqhu pacha supaymantataj cashan. 7 Chaywanpis tucuy imaymana qꞌita qhurusta, catarisjina khatatacojcunata, kochapi cajcunatapis runas yachancu atipayta. Atiparkancutaj paycunata. 8 Kalluntarí ni mayken runa atinchu camachiyta llampꞌuchaspa. Kalloka uj sajra cajmin phiña catarijina wañuchinawan juntꞌaska. 9 Quiquin kalluwan yupaychanchej Señor Dios Tatanchejta chayllawantaj ancha sajrata rimanchej runasta. ¡Runasri Diospa rijchꞌayninpi ruwaskas cancu! 10 Uj sapan simiwan Diosta yupaychanchej chayllawantaj sajrata parlanchej. Hermanosníy, manapuni chayjinaka cananchu. 11 ¿Uj pujyullamantachu misqꞌi yacuwan cꞌarcu yacuwan phullchimun? 12 Hermanosníy ¿higo sachꞌaka pokonmanchu duraznosta? chayrí ¿uva sachꞌa pokonmanchu higosta? Manallataj uj pujyumanta cꞌarcu yacuman misqꞌi yacuwan phullchimuyta atinchu.