Casaraskacunamanta
3
Ajinallatataj kancuna warmis, kosayquichejta casuychej. Chayta ruwaychej Diospa niskanta mana casuyta munaj kosayquichejpis payman pusaskas canancupaj. Ajinapi mana niskasllawan warmincoj causayninta ricuspa ichapis Diosman cutirenkancu. 2 Ajinapitaj manchachicuywan Diosta yupaychaskayquichejta cꞌachata causaskayquichejtawan khawaspa Diospi japꞌicuncuman. 3 Ama yuyaychejchu jawa ricucojllata cꞌachachacuytaka. Cꞌachachacuyniyquichejka ama cachunchu ni chujcha cꞌuyuska ni koriwan nitaj sumaj pꞌachaswanpis. 4 Manachayrí sonkoyquichejta cꞌachachacuychej. Llampꞌu sonkoyoj cꞌacha warmistaj caychej. Chay mana tucucoj cꞌachachacuylla Diostaka mayta cusichin. 5 Unay warmispis ajinata cꞌacha causaywan cꞌachachacorkancu. Paycunaka Diosman tꞌakaskas causaywan payllapi confiacorkancu. Kosancutapis casoj cancu. 6 Ajinallatataj Sarapis kosan Abrahamta casorka. Paytaka, tatáy,a nej. Kancunapis ni imata manchachicuspa cꞌacha cajtapuni ruwaychej. Ajinata ruwaspaka Saraj wawasninjina canquichej.7 Ajinallatataj kancuna kosas, Diospa yuyayninmanjina warmiyquichejwan causacuychej. Ajinapi Diosmanta mañacuypi mana jarcꞌaskaschu canquichej. Kancuna paycunamanta aswan callpayoj caspapis sumajpaj paycunata khawaychej. Paycunapis kancunajinallataj Diospa cꞌacha yanapayninnejta wiñay causayman yaycojcuna cancu.
Mosoj causaypi yuyaychanas
8 Cunanka, tucuy kancuna uj yuyayniyojlla caychej. Llaquiypi cusiypipis cuscachacuychej. Hermanosjina munanacuychej. Callpachanacuychej. Llampꞌu sonkoyojtaj caychej. 9 Ama sajramanta sajrallatatajka ruwaychejchu. Nitaj sajra parlaymanta sajrallatatajka cutichiychejchu. Manachayrí sajrata ruwasojtiyquichej paycunapaj sumaj cajta Diosmanta mañapuychej. Dioska wajyasorkachej ajinata ruwanayquichejpaj. Ajinallatataj payka sumaj cajta kancunaman kosonkachej. 10 Palabranpi nin:
Sumaj causayta munajka allin pꞌunchaycunata ricuytapis, ama sajra cajta parlachunchu.
Amataj llulla cajtapis parlachunchu.
11 Sajra cajmanta carunchacuchun, sumaj cajtataj ruwachun.
Runaswan allinpi causayta mascꞌachun.
Runasta allinyachispapunitaj causacuchun.
12 Señor Dioska chekan ruwaj runata khawan yanapananpaj.
Chekan ruwajpa mañacuskantapis uyarinpuni.
Astawanrí sajra cajta ruwajcunaj contrancupi Dioska churacun.
13 Ajinata cꞌacha cajta ruwajtiyquichejka ¿pitaj imanasonkachej? 14 Astawanpis cheka cajta ruwaskayquichejraycu muchuwajchej chaypis, cusiskas canquichej. Manchachinaswan parlasojtiyquichej ama manchachicuychejchu nitaj llaquicuychejchu. 15 Astawanpis sonkoyquichejpi cheka Señorninchejtajina Cristota yupaychaychej. Kancunaka yachanquichej Dios niskanta juntꞌananta. Chayraycu tapusojcunaman willanayquichejpaj waquichiskaspuni caychej. Cutichiskayquichejrí misqꞌi palabraswan llampꞌu sonkowan Diosta manchachicuywantaj cachun. 16 Llimphu sonko-yuyaywantaj causacuychej. Ajinapi Cristowan ujchaska cꞌacha causayniyquichejmanta sajrata parlajcunaka pꞌenkaconkancu chay parlaskancumanta. 17 Llaquiycunachus kancunapaj canman Diospa munayninmanjina chayka, cusiywan muchuychej. Cꞌacha ruwaskaraycu muchuyka aswan allinpuni sajra ruwaskaraycu muchuymanta niskaka.
Cristoj ñacꞌariyninmanta
18 Cristopis uj cutita juchanchejraycu muchorka. Payka chekan cashaspapis wañorka mana chekan cajcuna ama wañunancupaj. Diosman pusanawanchejpajtaj wañorka. Payka runa cuerponpi wañuchiska carka, espiritunpitaj causarichiska carka. 19 Espiritunpipis wiskꞌaska espiritusman willaramorka. 20 Unay tiempopi paycunaka Diosta casuyta mana munaskancuchu. Diosrí payman cutiricunancuta suyallarka Noé barcojina arcata waquichishanancama. Chay arcamanrí pisi runaslla yaycorkancu. Yacunejtataj chay pusaj runaska Diospa cꞌajaj phiñacuyninmanta cachariskas carkancu. 21 Chay yacoka bautismoyquichejman rijchꞌacun. Cunanri Jesucristoj causarimuyninnejta bautismopi juchamanta cacharichisunquichej. Bautismoka mana jawa chꞌichillatachu pichan. Manachayrí chaynejta Diospi japꞌicuskata llimphu sonko-yuyayniyquichejta ricuchin.
22 Jesucristoka angelesta, camachejcunata, atiyniyojcunatapis atiparka. Chaymanta causarimuspa janaj pachaman yaycorka Dioswan cusca camachinanpaj.