5
Ajinaka Diospa munaska wawasnin caspa payjina ruwajcuna caychej. 2 Imaynatachus Cristopis munacuwarkanchej ajinallatataj munacuywan causacuychej. Payka nokanchejraycu causayninta jaywacorka. Diosman causayninta jaywanatajina kospa Diosta cusicherka. 3 Astawanpis khenchachacuyta, millay cajta, tucuy munapayay cajtapis sakeychej. Kancuna chaupipeka chaycunamanta ni parlaskallapis cachunchu Diospa runasnin caskayquichejraycu. 4 Amataj cachunchu kancuna chaupipi millay parlay, ni mana yuyayniyoj parlay, nitaj yachayniyojjina manacaj parlay. Chayjina parlaycunaka manamin allinchu. Manachayrí Diosman graciasta koymin allenka. 5 Janaj pachapi Cristoka Dioswan camachin. Sumajta yachanquichejtaj: Manamin khencha, ni millay caj, nitaj munapayajpis janaj pachapi wiñay causayta japꞌenkachu. Chay munapayayka ruwaska diosta yupaychaywan quiquinmin.Cꞌanchayniyoj runasjina causacuychej
6 Ama pipis kancunata engañasuchunchu yankha parlaycunawan. Chay parlaycunaraycu Diospa cꞌajaj phiñacuynin jamun mana casucojcunaman. 7 Ama paycunaj ruwaj-masisnin caychejchu. 8 Ñaupajpeka lakhapi causarkanquichej juchasapas caskayquichejraycu. Cunanrí Señorwan ujchaska caspa cꞌanchay canquichej. Chayraycu cꞌanchayniyoj runasjina causacuychej. 9 Cꞌanchaymanta jamun, pokoyjina, tucuy cꞌacha caj, chekan ruway caj, cheka cajpis. 10 Chay pokoy causayniyquichejpi cajtin Señorta imaynapichus cusichiyta reparanquichej. 11 Amataj ruwaysicojcuna caychejchu lakhamanta mana pokoyniyoj ruwanaswanka. Astawanpis chay ruwanas sajra caskanta reparachiychej. 12 Yachanquichej chay lakhamanta cajcunaj pacaypi ruwaskasnincoka pꞌenkaymin cashan parlanallapajpis. 13 Tucuy chay imas cꞌanchaypi reparaskaka, sajra riqhurin. Cꞌanchaypi sajra caskanta ricuspa chay ruwanasta sakenchej. 14 Chayraycu nin:
Puñoj, rijchꞌariy; jataricuy wañuskacunamanta,
Cristotaj kanman cꞌanchaycusonka.
Santo Espirituwan juntꞌapuni
15 Ajinaka khawacuychej imaynatachus chekanta purinayquichejta. Ama mana yuyayniyojcunajinaka, manachayrí yuyayniyojcunajina puriychej. 16 Sajra pꞌunchaycunapi tiyacushanchej. Chayraycu sapa pꞌunchay sumaj ruwaskasniyquichejwan juntꞌaychej. 17 Ajinaka ama caychejchu mana yuyayniyojcunaka. Manachayrí entiendeychej imachus Señorpa munaynin caskanta. 18 Amataj ujyanaswan machaychejchu. Chayka causayta tucuchin. Manachayrí Santo Espirituwan juntꞌaycuchicuychej. 19 Purajmantataj parlanacuychej yupaychana taquinaswan, himnoswan, Santo Espíritoj yuyaychaskan taquinaswanpis. Tucuy sonkowan taquispa yupaychaychej Señorta. 20 Graciasta koychejpuni tucuy imasmanta Señorninchej Jesucristoj sutinpi Dios Tataman. 21 Purajmanta casunacuychej Cristota manchachicuspa.
Khari warmipaj yuyaychanas
22 Warmis, kosayquichejta casuychej Señorninchejpi japꞌicojcunajina. 23 Kosaka warmej umanjinamin. Ajinallataj Cristopis iglesia runasninpa umancujinamin. Pay quiquintaj iglesianpa Cacharichejninpis cashan. 24 Astawanpis imaynatachus iglesia runasnin Cristota casuncu, ajinallatataj warmis kosancuta tucuy imapi casunancu. 25 Kosas, warmiyquichejta munacuychej. Imaynatachus Cristopis iglesia runasninta munacorka, ajinata kosas warmincuta munacunancu. Cristoka runasninta munacuspa paycunaraycu causayninta jaywacorka. 26 Jaywacorka payman runasninta tꞌakananpaj yacu mayllaywan llimphuchaspa niskannejta. 27 Chayta Cristo ruwarka iglesia runasninta uj cuerpollapi paypa ñaupakenman pusananpaj. Mana pantayniyojta, ni chꞌichiyojta, nitaj chayjina rijchꞌacuyniyojtapis munan. Manachayrí cꞌacha mana juchachana cananchejta munan. Ajinata runasninta ñaupakenman pusananpaj sonkopi cꞌachachan. 28 Cristoj munacuskanjinallataj kosas warmincuta munacunancu quiquin cuerponcutajina. Warminta munacojka pay quiquinta munacun. 29 Manamin pipis ni jaycꞌaj quiquin cuerponta chejnicorkachu. Manachayrí munacuywan uywan cuidantaj. Quiquillantataj Cristopis runasninta munacuywan uywan cuidantaj 30 cuerponmanta caskanchejraycu. 31 Chayraycu khareka sakenan tiyan tatanta mamantapis warminwan ujchaska cananpaj. Iscaynincutaj ujchaska cankancu. Ajinaka manaña iscaychu cancu, manachayrí ujllaña. 32 Chay parlariskayka uj sumaj pacaska yuyaymin. Nokarí Cristomanta iglesia runasninmantawan parlashani. 33 Astawanpis sapa uj warminta munacuchun pay quiquintajina. Warmitaj kosanta sumajpaj khawachun.