Santo Espiritunejta ujchaska
4
Ajinaka, noka, Señorninchejraycu wiskꞌaska, tucuy sonkowan mañacuyquichej Diospa wajyacuskasninjina causanayquichejta. 2 Chaymanjina causaychej llampꞌu sonkowanpuni, cꞌacha yuyaywantaj. Runastapis muchuychejpuni. Munacuywan purajmanta yanapanacojcunapunitaj caychej. 3 Allinyanaska caspa tucuy atiskayquichejta wakaychacuychej Santo Espirituwan ujchaska causacunayquichejpaj. 4 Uj cuerpolla, uj Espiritullamin. Chaymanjinataj tucuy kancunata Dios wajyasorkachej paywan cusca causacuyta suyanayquichejpaj. 5 Uj Señor, uj cheka ñan, uj bautismo, 6 uj Diosllataj, tucuypa Tatancu. Pay tucuyta camachin, tucuy runasninnejta ruwan, tucuy runasninpitaj tiyacun.Cristoj cuerponpi sapa uj ruwanayoj canchej
7 Astawanpis sapa uj nokanchejman imachus ruwanapaj atiyta kowarkanchej Cristoj koskanmanjina. 8 Chayraycu Dios palabranpipis nin:
Janaj pachaman wicharispa atipaskacunata presota pusarka.
Atiycunata runasman korkataj.
9 Chay wichariskanka niyta munan ñaupajta cay pachamanta uracama uraycamuskanta. 10 Uraycamojka quiquin wicharejllatajmin. Wicharerka tucuy janaj pachacunamanta aswan patacama. Ajinamanta Cristoka tucuynejpi caspa tucuy imata juntꞌan. 11 Cristoj cuerpon iglesia runasninman cay atiycunata kon: Cachasnin, sutꞌinchajcuna, willarajcuna, pastorcuna,a yachachejcuna canancupaj. 12 Chay atiycunata korka tucuy Diospa runasninta yanapanacuypi waquichiskas canancupaj. Chayka Cristoj cuerponta wiñachinapajmin. 13 Chay atiycunawan tucuy runasnin Diospi japꞌicuypi ujchaska canka. Wawan Cristota rejsispataj mosoj causaypi wiñaskas casunchej. Payka munan tucuy runasnin ujchaska wiñananchejta sumaj Runa cananchejcama. Munantaj uj cuerpolla Cristowan paymanjina tucuy imapi wiñaskas cananchejta. 14 Ajinapi Cristopi wiñaskas caspaka manaña wawajina muyuchiskaschu casun ima yachachinallawanpis. Runacuna sajra yachaynincupi pantachinasta waquichincu. Cristopi wiñaskacunarí chay yachachinaswanpis manaña engañaskaschu casun. 15 Astawanrí cheka cajta munacuywan parlaspa tucuy imapi Cristowan ujchaska wiñasunchej. Paymin umanchejka. 16 Umanchej Cristoman allin cꞌascaskataj sumaj casachiskataj cuerponka wiñan ujcuna ujcunanejta. Umaj callpachaskanmanjina waquichiska sapa uj ruwan maychus ruwananta tucuy cuerpon munacuypi wiñacunanpaj.
Cristowan mosoj causaymanta
17 Cayta Señorpa sutinpi encargaspa niyquichej: Amaña Diosta mana rejsejcunajinaka causaychejchu. Paycunaka yankha yuyaynincumanjina causashancu. 18 Yuyaynincoka lakhayaskamin. Diospa causayninmanta carunchaskas cancu mana reparaskancuraycu rumi sonkos caskancuraycupis. 19 Paycuna cheka cajta manaña rejsincuchu nitaj munancuchu. Tucuy munaynincuwan jaywacorkancutaj sajra causayman millay ruwanasta ruwanancupaj. 20 Kancunarí mana chayjinatachu Cristomanta yachacorkanquichej. 21 Yachanimin paypa yachachiskanta uyarispa japꞌiskayquichejta cheka caj Jesuspi ricuchiska caskanmanjina. 22 Chayraycu imaynachus causarkanquichej, chay maucꞌa causayta wijchꞌupuychej. Maucꞌa causayka millay llulla munaycunawan ismushan. 23 Mosojyaychej wajjina mosoj yuyaywan causacunayquichej. 24 Diosmanjina mosoj causaywantaj pꞌachallicuychej. Chay mosoj causayta pay ruwarka chekanta, cꞌacha ima causacunayquichejpaj cheka cajmanjina.
Cheka cajmanjina causaymanta
25 Uj cuerpopi ujchaska canquichej. Chayraycu llullacuyta wijchꞌuspa sapa uj cheka cajta parlanacuychej runa-masiyquichejwan. 26 Phiñacunquichejchus chayka, ni jaycꞌaj juchallicuychejchu inti yaycunancama phiñaskaraj caspa. 27 Nitaj supay Satanasman lugarta koychejchu.
28 Suwajka amaña suwacuchunñachu. Manachayrí sumaj imasta ruwaspa quiquin maquisninwan llancꞌachun. Ajinamanta caponka pisichicojman konanpaj. 29 Ama ima millay parlaypis simiyquichejmanta llojsichunchu. Manachayrí allin cajta parlaychej hermanosta wiñachinapaj. Ajinamanta uyarejcunata cꞌachata yanapanquichej. 30 Amataj Diospa Santo Espiritunta llaquichiychejchu. Espiritunnejtamin sellaskas carkanquichej jakay jamoj pꞌunchaypi wiñay causaypaj cachariskas canayquichejpaj. 31 Wijchꞌuychej tucuy jaya yuyayta, rabiacuyta, phiñacuyta, khaparkachayta, sajra parlaytapis, tucuy imaymana sajra caytawan. 32 Astawanpis ujcuna ujcunapaj cꞌacha caychej, qhuyanacuychej. Imaynatachus Dios perdonasorkachej Cristopi, quiquillantataj kancunapis perdonanacuychej.