Pabloka waj llajtayojcunaman willarananpaj ajllaska
3
Ajinapimin noka, Pabloka, Cristo Jesusraycu wiskꞌaska cashani.a Kancuna waj llajtayojcunaman willaranaypajmin paypa cachamuskan caskayraycu carcelpi taricuni. 2-3 Uyarerkanquichejñachá cꞌacha Dios pacaska yuyayninta sutꞌinchawaskanta. Qhuyacuyninpitaj confiawaspa kancunaman cachamuwarka. Chay jawa uj pisita ñaupajpi kelkarimorkayquichejña. 4 Chay kelkamuskayta leespa reparayta atinquichej Cristomanta Diospa yuyayninpi allin yachachiska caskayta. 5 Unay tiempospi chay pacaska yuyaynenka mana pimanpis sutꞌinchaskachu carka. Cunanrí payman tꞌakaska cachasninman willajcunanmanpis Dioska Santo Espiritunejta yuyayninta sutꞌinchan. 6 Caymin pacaska yuyaynenka: Waj llajtayojcuna israelcunawan cusca wiñay causayta japꞌej-masis cancu; Cristoj cuerponmanta cancu; sumaj niskasmantapis japꞌej-masis cancu. Tucuy chayta Cristo Jesuswan ujchaska caspa sumaj willanasnejta japꞌincu. 7 Chayta willaranaypajmin camachin cani Dios qhuyacuyninpi confiawaskanmanjina. Chaypajtaj atiyninmanjina callpachawan. 8 Diospa tucuy runasninmanta sullcꞌamantapis aswan sullcꞌajina cani. Payrí cꞌacha yanapayninwan nokaman confiawarka waj llajtayojcunaman khapaj willanasninta willaranayta. Chay khapaj willanasnenka Cristoj mana tucucoj munacuyninmin. 9 Cachamuwarkataj tucuyman sutꞌinchanaypaj imaynatachus Dios pacaska yuyayninmanjina cunan ruwashaskanta. Tucuy imata ruwaj Dioska chayta yuyaynillanpi pacarka wiñay wiñaymantapacha. 10 Cunanrí Dioska ashqha imaymana yuyayninta ricuchiyta munan. Chayta ricuchishan iglesia runasninnejta janaj pachapi caj camachejcunaman atiyniyojcunamanpis. 11 Chayka wiñay wiñaymantapacha yuyaskanmanjinamin. Chayta pay yuyarka Señorninchej Cristo Jesusnejta juntꞌayta. 12 Ajinapi Jesuspi japꞌicuspa mana manchachicuspa ima Diosman kayllaycuyta atinchej. 13 Chayraycu niricuyquichej ama llauchhuyacuychejchu kancunaman willaraskayraycu llaquichiska caskaymanta. Manachayrí sonkochacuychej, ñacꞌariskaynejta jatunchaskas caskayquichejraycu.Pablo Diosmanta mañapun
14 Tucuy chay yuyaycunaraycu Dios Tataman konkoricuni. 15 Paymantamin sapa uj aylloka sutinta japꞌin janaj pachapi cay pachapipis. 16 Paymanta mañacushani callpachasunayquichejta Santo Espiritunnejta. Ajinapi may khapaj atiyninmanjina sonkoyquichej uqhupi callpachasonkachej, 17 Cristo sonkoyquichejpi tiyacunanpaj paypi japꞌicuskayquichejnejta. Ajinapitaj munacuypi sumaj sayaskas wiñaskas canquichej. 18 Chayta mañacuni callpachaskas sumajta reparanayquichejpaj imaynatachus munacuywan causacunata. Reparanquichej tucuy Diospa runasninwan cusca Cristoj munacuynenka may jatun caskanta. ¡Mayjina ancho, caru, pata, uqhutajmin! 19 Cristoj munacuynenka tucuy yachaymanta aswan jatunmin. Chaywanpis mañacuni chay munacuyninta sumajta rejsinayquichejpaj. Ajinapi causayniyquichejka Diospa cayninwan juntꞌa canka.