3 Kancunamanta yuyaricuspaka Diosniyman graciasta konipuni. 4 Sapa cuti Diosmanta mañacuspaka cusiywan tucuy kancunapaj mañapuyquichej. 5 Ajinata graciasta koni uyariskayquichejmantapacha cunancama nokawan yanapacuwaskayquichejmanta. 6 Yachanitaj sonkoyquichejpi cꞌacha causayta Dios kallariskanta wiñachinanta Cristo Jesuspa cutimunan pꞌunchaycama. 7 Chaytari chekanta yuyani tucuy kancunamanta anchata sonkoywan munacususkayquichejraycu. Wiskꞌaska caskaypipis muchojmasisniy canquichej. Chaywanpis sumaj willanas cheka caskanta ricuchishajtiy willashajtiypis nokawan ujchacunquichej. Chayraycu tucuy kancuna causacoj-masisniy canquichej Dios cꞌachata yanapawaskanchejraycu. 8 Diosmin yachan imaynatachus munacuyninwan tucuy kancunata mayta munacuskayquichejta.

9 Cayjinatataj Diosmanta mañacushani: Munacuyniyquichej astawan astawanraj Diospa munayninpi yachaywan tucuy yuyaywanpis wiñananta. 10 Ajinata mosoj causayniyquichejpi ajllanquichej aswan allin cajtapuni. Cristoj cutimunan pꞌunchaypajtaj llimphu sonkoyoj mana juchayojpis canquichej. 11 Chaywanpis Jesucristonejta cꞌacha causayniyojpuni^a canquichej Dios jatunchaska yupaychaskataj cananpaj. Chayta mañapuyquichej.

12 Hermanosníy, yachanayquichejta munani cay muchuskayraycu sumaj willanaska mana jarcꞌaskachu cashan. Manachayrí aswan willaraska cashan. 13 Ajinapi Roma camachejpa wasinpi guardiacuna tucuy wajcunapis sutꞌita yachancu Cristoraycu carcelpi wiskꞌaska cashaskayta. 14 Wiskꞌaska caskaywantaj ashqha hermanosninchej Señorpi callpachacuncu. Chayraycu astawan astawan Diospa niskanta willashancu mana manchachicuspa. 15 Chekamanta waquenka envidiawan churanacuywantaj willarashancu. Waquinrí cꞌacha munaynincuwan Cristomanta willarashancu. 16 Paycuna munacuywan willarashancu yachaspa sumaj willanas cheka caskanta ricuchinaypaj churaska caskayta. 17 Chay ujcunarí tꞌakarachinapaj willarashancu puraj uya caywan, [munaspa runas paycunallata khatinancuta.]^b Wiskꞌaska caskaypi chaywan llaquiyta yapawayta yuyancu. 18 ¿Imanantaj chayrí? Imaymanallapipis Cristomanta willarashaskancuraycu cusicuni. Canman puraj uyamantapis chayrí cheka sonkomantapis.

Astawanpis willaraskancuraycoka cusicusaj. 19 Imaraycuchus tucuy chayka allinniypaj yanapawanka. Ajina canka Diosmanta mañapuwaskayquichejnejta Jesucristoj Espíritun yanapawaskannejtapis. 20 Mayta munani confiacunitaj ama ni imapi pꞌenkachiska canaypaj. Astawanpis imaynatachus cay pꞌunchaycama Señorniy yanapawarka, ajinallatapuni yanapawanka. Cunanpis Cristollata mana manchachicuspa nokapi jatunchayta munani causayniywanpis chayrí wañuyniywanpis. 21 Nokapaj causayka Cristomin, wañuytaj aswan sumaj, Cristowan cusca canaypaj. 22 Sitajchus cay pachapi causayman chayka, Señorta jatunchanaypaj llancꞌasaj. Manataj yachanichu causaytachus wañuytachus ajllanayta. 23 Cay iscay imaswan ñitꞌiskajina cashani, cay pachamanta llojsipuyta munaspa Cristowan cacunaypaj. Chayka aswan allinpuni cashan. 24 Cay pachapi^c causanaytarí ajllayman kancunata yanapanaypaj. 25 Chaytaka chekatapunitajmin yachani tucuy kancunawan canaypaj cay pachapi khepacunaytaka. Ajinapitaj yanapaskayquichej mosoj causayniyquichejpi wiñanayquichejpaj Diospi japꞌicuspa cusicunayquichejpaj. 26 Ujtawantaj kancunawan caskayraycu astawan astawan Cristo Jesuswan ujchaska cusicunquichej.

27 Cayta niyquichej: Imaynatachus Cristoj sumaj willanasninpi causacunanchej, ajinallatapuni puriychej. Sinchꞌitataj sayaychej uj yuyayllawan uj sonkollawan cusca llancꞌaspa. Ajinapi runas sumaj willanasta uyarispa Diospi japꞌiconkancu. Chaywanka kancunata ricoj jamuspapis sumaj causayniyquichejmanta yachasaj. Chayrí mana chaypi caspapis llancꞌashaskayquichejmanta uyarisaj. 28 Amataj imapipis enemigocunamanta manchachicuychejchu. Mana manchachicuspa sayaskayquichejka sutꞌita ricuchin Dios chaycunata tucuchinanta. Ricuchintaj Dios kancunata libraspa wiñay causayman pusasunayquichejta. 29 Yachanquichejtaj Dios cꞌachata yanapasorkachej Cristopi japꞌicuyta. Mana chayllatachu, astawanrí payraycu muchuyta atinayquichejtawan yanapasunquichej. 30 Causayniypi chay quiquinta muchuskayta ricorkanquichejña, cunanpis uyarishallanquichejtaj. Ajinallatatajmin kancunapis nokawan cusca muchushanquichej.