Llampꞌu sonko caychej uj yuyayniyojllataj
2
Cristomin callpachashasunquichej munacuyninwan ima sonkochashasunquichej. Santo Espiritunejta ujchaska, sonko qhuyacuywanpis munanacunayquichej. 2 Ajinapi cusiywan juntꞌachiwaychej. Chaypajka uj yuyayniyojlla uj sonkoyojlla causacuychej. Cuscata munanacuspataj yuyaskayquichejpi ujlla caychej. 3 Ama ni imatapis churanacuspa nitaj jatunchacuspaka ruwaychejchu. Manachayrí llampꞌu sonkowan sapa uj ujcunata aswan curajpaj khawaychej kancuna quiquiyquichejmantaka. 4 Ama pipis yuyachunchu paypa allinnillantaka. Manachayrí ujcunaj allinnincutapis yuyaychej.Cristoj llampꞌuchacuyninmanta
5 Imayna yuyaywanchus Cristo Jesús causaj, quiquinta kancunapis causaychej. 6 Cristoka Diospa quiquin cayninpipunimin. Dios caspapis atiyninwan mana jatunchacuytachu yuyarka. 7 Astawanrí tucuy atiyninta kꞌalata sakerka camachi rijchꞌay cayta ajllaspa. Runacuna quiquinmantaj tucorka. 8 Runa cuerpowan nacecuspa llampꞌuchacorka, Diostataj casorka wañuycama. Chay wañuyka sajra runaj wañuyninjina carka, chacatanapi.
Dios Cristota jatunchaskanmanta
9 Chayraycu Diospis payta may sumajta jatuncharka. Tucuy sutimanta aswan curaj sutitataj korka. 10 Ajinamanta tucuy Jesusman konkorenkancu tucuy atiyniyoj caskanta ricuchispa. Janaj pachapi, cay pachapi, cay pacha urapipis, tucuy payman konkorenkancu. 11 Ajinapitaj tucuy willankancu Jesucristoka atiyniyoj Camachej caskanta Dios Tata jatunchaska cananpaj.
Cay pachapi cꞌanchay canquichej
12 Munaska hermanosníy, casuwarkanquichejpuni mana kancunawan cajtillaychu. Cunanpis quiquillantataj mana chaypi cashajtiypis astawanraj casucuychej. Ancha manchachicuywanpunitaj mosoj causayniyquichejpa allinninpaja callpachacuychej. 13 Yachanquichej Diosmin kancunapi ruwajka. Pay callpachashasunquichej cꞌacha yuyaskanmanjina ruwayta munanayquichejpaj atinayquichejpajpis. 14 Tucuy imata ruwaychej mana thutuspa nitaj churanacuspa. 15 Ajinapi mana juchachana nitaj pantayniyoj, Diospa wawasnin canquichej. Ajinapitaj mana chꞌatanajina causanquichej cay pacha runas chaupipi. Paycunaka kꞌewiska yuyayniyoj sajrastaj cancu. Kancunarí paycuna chaupipi Diospa cꞌanchayninwan cꞌanchashanquichej cay pachapi. 16 Wiñay causay willanastapis willashanquichej. Ajinapi Cristoj cutimuynin pꞌunchaypi cusicusaj mana yankha causaskaymanta nitaj yankha llancꞌaskaymanta. 17 [Kancunaraycu Diosman causayniyta jaywacorkani paypi japꞌicunayquichejpaj. Cunan, sichus chay jaywacuskaypi wañuyman chaypis, cusicuni. Astawanka tucuy kancuna Diospi japꞌicuspa cusiyniyoj caskayquichejmanta cusicuni.]b 18 Ajinallatataj kancunapis nokawan cusca cusicuychej.
Khepata cachamuskayquichej Timoteota
19 Señor Jesús munajtenka uskhayta Timoteota cachamuyta yuyani. Ajinapi nokapis kancunamanta yachaspa sonkochacusaj. 20 Pay sapallanmin noka quiquin sonkoyojka, chekata allinniyquichejpajpuni yuyajtajka. 21 Tucuy wajcunaka paycunaj allinnincuta mascꞌancu manataj Jesucristoj imasnintachu. 22 Yachanquichejjina pay cꞌacha caskanka ricuchiskaña. Wawa tatanwanjinamin nokawan sumaj willanaspi serverka. 23 Chayraycu payta cachamuyta yuyani imaynachus preso caskaymanta rinawanta yachaytawancama. 24 Chaywanpis Señorpi confiacuspa yuyani nokapis uskhayta kancunata watucuyta.
Cunanrí Epafroditota cachamuyquichej
25 Cunanpaj hermano Epafroditota kancunaman cachamusunay aticuskantapuni yuyani. Payka Señorpaj llancꞌaj-masiy soldado-masiytaj. Chaywanpis kancunaj cachayquichej nokata sutiyquichejpi yanapanawanpaj. 26 Payka tucuy kancunata maytapuni ricuyta munashasorkachej. Anchatataj phuticusharka onkoska caskanta uyariskayquichejraycu. 27 Arí, chekata onkoskapunitaj carka, wañunanpajjinaña. Diosrí paymanta qhuyacorka, nokamantawanpis, ama llaquiymanta aswan llaquiypi canaypaj. 28 Chayraycu aswan uskhayllata payta cachamushayquichej ujtawan payta ricuspa cusicunayquichejpaj. Nokapis pisillataña phuticusaj. 29 Ajinaka Señorpa munacuyninwan payta japꞌiychej tucuy cusiywan. Cayjina cajcunataka sumajpaj khawaychej. 30 Cristoj ruwanasninraycu payka yakha wañorka. Mana manchachicuspa causaynintapis peligroman churarka nokata yanapanawanpaj. Kancuna caypi casparí chayta nokapaj ruwawajchej carka.