Wawaspaj tataspaj yuyaychanas
6
Wawas, Señorninchejpi japꞌicojcunajina tatayquichejta mamayquichejta casuychej. Chaymin chekanka. 2-3 Camachiskapis nin: “Tatayquita mamayquita casuy, unayta cay pachapi sumajta causanayquipaj. Ajinata sumaj niskanwan Dioska chay camachiskata yaparka allin cajninta ricuchinanpaj. 4 Tatas mamas, ama wawasniyquichejta phiñachiychejchu. Manachayrí casuchicuspa uywaychej Señorpa yachachinanpi yuyaychayninpipis.Camachispaj patroncunapajwan yuyaychanas
5 Camachis, cay pacha patroncunayquichejta sumajpaj khawaspa casuychej. Manchachicuywan tucuy sonkowanpis Cristotajina casuychej. 6 Amataj runa ricunanpajjinallaka ruwaychejchu. Manachayrí Cristoj camachisninjina Diospa munayninta cꞌacha yuyaywan ruwaychej. 7 Sumaj munaywan serviychej Señortajina amataj runatajinaka. 8 Yachanquichejjina sapa uj allin ruwaskanmanjina Señormanta japꞌinanta, camachipis chayrí mana camachipis. 9 Patroncuna, quiquillantataj kancunapis camachisniyquichejwan ruwaychej. Amaña paycunaman manchachinaswan niychejchu. Yachanquichej paycunapis kancunapis janaj pachapi Señorniyoj caskayquichejta. Payka uj runata waj runamanta manamin astawanpajchu khawan.
Diospa soldadosninjina pꞌachalliycucuychej
10 Chaywanpis Señorwan ujchaska callpachacuychej paypa jatun atiyninwan. 11 Imaynachus soldadoka makanacuna pꞌachaswan pꞌachalliycucun atipananpaj, ajinallataj kancunapis Diospa tucuy makanacuna pꞌachasninwan pꞌachalliycucuychej. Ajinapi supay Satanaspa urmachej sajra yuyaskasninpa contranpi sinchꞌita sayayta atinquichej. 12 Nokanchejka mana runaswanchua makanacunchej, manachayrí mana ricunaswan: Camachejcunawan, atiyniyojcunawan, cay lakha pacha sajra atiyniyojcunawan. Mana ricuna wayrapi atiyniyoj sajracunawan makanacunchej. 13 Chayraycu Diospa koskan tucuy makanacuna pꞌachaswan pꞌachalliycucuychej sajra pꞌunchaypaj. Ajinapitaj sinchꞌita sayaspa tucuyta atipaskayquichejmantaña sinchꞌita sayanquichej. 14 Ajinaka sinchꞌita sayaychej cheka cajwan chumpiskas. Pechopajtaj chekan ruwanasta pecherotajina churaycucuychej. 15 Chaquiyquichejmantaj allinyachej sumaj willanaswan waquichiskas canayquichejpaj ojotꞌaycucuychej. 16 Chay tucuymanta astawanka Diospipuni japꞌicuychejb wakaychaska canayquichejpaj. Chaywan enemigoj laurashaj tucuy pantachiycunantac thasnuchiyta atinquichej. 17 Diospa sumaj niskanta japꞌiycucuychej umayquichejpaj uj sombrerotajina. Chaymin wiñaypaj cachariska canayquichejka. Santo Espíritoj koskan tꞌujsina espadatapis japꞌiychej. Chayka Diospa palabranmin. 18 Chaywanpis Santo Espíritoj yuyaychaskanmanjina tucuy sonkowan mañacuspapuni caychej. Rijchꞌariskapuni cashaychej Diospa tucuy runasninpaj mañapuspa. 19 Nokapajpis mañapuwaychej runasman parlashajtiy Dios yuyaychanawanpaj. Ajinapi sumaj willanaspa pacaska cajninta mana manchachicuspa sutꞌinchasaj. 20 Chaypajmin cachan churaska cani. Chayta willaraskayraycutaj preso cashani. Diosmanta mañapuwaychej mana manchachicuspa ninaymanjina willaranaypaj.
Napaycucuna
21 Munaska hermano Tiquicoka cheka camachi Señorpi. Pay nokamanta ruwashaskaymanta ima tucuyta willasonkachej. 22 Chaypajpunimun payta cachamuyquichej nokaycumanta yachanayquichejpaj sonkochasunayquichejpaj ima.