LA CARTA DEL APOSTOL SAN PABLO A LOS
GÁLATAS
1
1-2 Noka, Pablo, napaycamuyquichej. Nokawan caj Cristopi tucuy hermanospis napaycamusunquichej, kancuna Galacia jallpꞌapi tantacoj hermanosta.a Diospa cachan cani. Señorninchej Jesucristo Dios Tatanchejwan ajllawarkancu churawarkancutaj, mana runaschu. Dios causarichimorka Jesucristota wañuskacuna chaupimanta. 3 Mañacushani Tatanchej Diospa, Cacharichiwajninchej Jesucristoj cꞌacha yanapaynin kancunawan cananta allillanta causanayquichejpaj. 4 Tata Diosninchejpa munayninmanjinataj Jesús causayninta jaywarka. Payka wañorka juchasninchejmanta cacharichinawanchejpaj, cunan pꞌunchay juchaj atiyninmantawan. 5 ¡Dios wiñaypa wiñaynintinpaj yupaychaska cachun! Ajina cachun.6 Cristo qhuyacuyninpi yanapaspa wajyasorkachej wawasnin canayquichejpaj. Tꞌucuni kancuna manaraj imapi Diosta sakepuskayquichejmanta waj willanasman ancha uskhayta chimpaspa. 7 Manapuni canchu waj sumaj willanas. Manachayka waquin runas umasniyquichejta tꞌojpincu Cristomanta sumaj willanasta kꞌewiyta munaspa. 8 Astawanrí nokaycupis chayrí janaj pachamanta uj willajpisb willaskaycumanta waj willanasta willaranman chayka, paypa patanpeka Diospa cꞌajaj phiñacuynin cachun. 9 Kancunaman nerkaycuña; ujtawan niyquichej: willaraskaycuta japꞌiskayquichejmantaña pichari waj willanasta willarasunquichej chayka, paypa patanpeka Diospa cꞌajaj phiñacuynin cachun.
10 Cayta nispaka tapucuni: ¿Maykenta cusichiytataj munaskayta yuyanquichejrí —runastachu chayrí Diostachu? Mana runasta cusichiytachu munashani. Sichus runasta cusichiyta munaymanraj chayka, manapuni Cristoj camachinchu cayman.
Jesucristo sutꞌincharka sumaj willanasta Pabloman
11 Cristopi caj hermanosníy, Diospa ñaupakenpi yuyarichiyquichej sumaj willanasta willaraskayka mana runaj yuyayninmantachu. 12 Imaraycuchus chayta mana runasmantachu japꞌerkani nitaj runaspa yachachiwaskancumantachu. Manachayrí chay sumaj willanasta Jesucristo sutꞌinchawaspa riqhurimuwarka.
13 Uyarerkanquichejña imaynata ñaupajpi israelcunajta yachachiskancumanjinapuni causaskayta sinchꞌita ñacꞌarichispa Diospi japꞌicoj tantacojcunata. Tucuy atiskaywantaj llancꞌarkani paycunata tucuchinaypaj. 14 Nokaka israel runaspa yachachinasnincuta astawan sumajta casuspa causarkani wiñay-masisniymanta niskaka. Imaraycuchus jatun munayniywan tucuy sonkowantaj ñaupaj tataspa yachachinasnillancuta ruwaj cani. 15 Astawanka manaraj naceska cashajtiy Dios mayta yanapaspa ajllawarka cachan canaypaj. 16 Cusiywan yuyarka Wawan Jesusta rejsichiwayta waj llajtayojcunaman willaranaypaj Jesuska Wawanmin caskanta. Rejsichiwajtincama chaypacha mana pitapis tapuricorkanichu. 17 Manataj rerkanichu Jerusalén llajtaman nokamanta aswan ñaupajtaña Diospa cachasnin cajcuna yachachinawancupaj. Manachayrí Arabia jallpꞌaman unaypaj riporkani. Chaymantataj cutimorkani Damasco llajtaman.
18 Chanta quinsa watamantaña Jerusalenman rerkani Pedrota rejsej. Paywantaj tiyaricorkani chunca phishkayoj pꞌunchayta. 19 Jesucristoj tucuy cachasninmanta ricorkani Pedrota, Señor Jesuspa wauken, Jacobollatawan. 20 Dios yachan cay kelkashaskayka chekapunimin caskanta.
21 Jerusalenmanta llojsiytawanri rerkani Siria jallpꞌanejman Cilicia jallpꞌanejmanpis. 22 Judea jallpꞌapi Cristopi japꞌicoj hermanos nokata manaraj rejsiwarkancuchu. 23 Paycunaka uyarillarkancu niskancuta: “Ñaupajta nokaycu Diospa runasnin cajcunata ñacꞌarichiwajniycu, cunanka Cristopi japꞌicunanta willarashan. Ñaupajta tucuy atiskanta ruwarka chay sumaj willanaspi japꞌicuyta tucuchinanpaj”, niskata. 24 Diosta mayta yupaycharkancutaj noka Jesuspi japꞌicuskayraycu.