1 โอว แฮะ กาดัวะ กาพา ลอง ปี ปาย อาซาก ดูอี. โอว วี นับ วี ยึร ลอง ปี โบง ดูอี อี มึห น็อห ซืร น็อห หมาน บอ ดูอี อี มึห อางยาน. อึณ มูห เฌาพรา อี อึบ ปี โบง เฆ ดอน โมยว. อึณ ตู มึห อาเซ อี นับ โยว อี ดี ร็อก กาเว อัน, โยว อี ดี ฌ็อง อัน นา อาต ฮาว. 2 ดี กาแดะ อัน เฆ ดูอี บอกาเฆลียด โลว คัม อี มูห อู โมยว. เฆ ดูอี อี มึห น็อห ซืร น็อห หมาน บอ เฆ ดูอี ฮาย ดูอี มืก, เฆ ดูอี หมึอม บอ เฆ ดูอี อี ตู หมึอม, เฆ ดูอี อี ซีงา โดบ ปี ดัม ดารา บอ เฆ อี ตู ซีงา โดบ ปี ดัม ดารา, เฆ ดูอี อี หลู ดี เฌาพรา บอ เฆ อี ตู หลู, เฆ บอกาเฆลียด โลว คัม อี มูห อู โมยว.

ปาย ตี ดูอี อี แฮะ ดึอม ดืง กาแซณ มืร, เฆ ปี ดูอี อี ตู ยัะ ดืง กาแซณ. ดูอี บอด ดูอี หมึอม มืร, เฆ โลว คัม ปี ดูอี อี โบง หมาบ.

3 อาตี แฮะ มูห อี ตู หมึอม อี จีจีว กาเซา แดง กาดาย ครึม เบลณ นี. ดูอี บอกาเฆลียด บอ โลว คัม อี มูห อู โมยว. แดง ตี แคง น็อห ดูอี บอกาเฆลียด, อึณ มึห มี อี ฮาย อี ตู หมึอม. ดอ ซี อีม ดอ ซี มึห เฆ อาซาก เฆ บอ มึห น็อห ฟึณ น็อห ซาบา. วาย อัน ตี เฆ บอ ยัม ฮาว. 4 มาแล, ดูอี อี ซี มึห อาซาก อี ซี อีม, อัน บอ มึห ปี หน็อะ อึณด็อะ. มาโซว อี ซี อีม แฮะ หมึอม หลึอม มาครังซี อี แฮะ ฮอต ยัม.

5 เฆ อี ซี อีม ตี, เฆ แฮะ นับ เฆ โลว ยัม. เฆ อี แฮะ ฮอต ยัม, เฆ อาว ฮู นับ มาเซ. เฆ มืร อาว ฮู ปึอน อาฆยึร มาเซ. อี เฮา มืร นับ ดี ปีว โตต เฆ.

6 น็อห ลาย ร็อก ลาย ฌ็อง บอ น็อห ลาย หลัยะ อี แฮะ กอย เหลณ กาเซา แคง น็อห เฆ, แฮะ ฮอต หราย โตต ดอน โมยว. เฆ มืร อาว ฮู ลาย บาะ โมยว อี โบว แบน แดง กาดาย ครึม เบลณ นี ดอ เหมา.

7 โกบ อึณ ปาย ตี แตห แม โบยว ดาคึย บอ โฮม ปี ดี โฮม บอ เดียง ปี ดี เดียง แม. แตห แม เดียง อึม มางูน บอ โคย ดาคึย. ลอง อัน ตี แฮะ มูห ปี ซี แตห เฌาพรา แม โบง. 8 แตห แม ชึบ ครึง ชีด อี ลูย ซีงา เซเซ. แตห แม พ็อห นามัน ดี ฆีณ แม เซเซ. 9 แตห แม โบยว ดาคึย ดี กอย รึม โดบ อีบึณ วี ปี ร็อก แม. ดอน ซีแง ดอน ซีแง แปะ แฮะ ดัว เฌาพรา ดี แม โจว มึห แม อาซาก แดง กาดาย ครึม เบลณ อี ตู มึห ดีโคว นี, แตห แม โบยว ดาคึย ปาย ตี. แดง ตี โจว กอย แม แดง กาดาย นี, เฌาพรา แฮะ แตห แม โบง ฆาน แคะ มึห แม โปลม เฆ แฮณ. 10 แคะ ปี โลว แม โบง, แตห แม คัด น็อห บอ โฆยวฆยา ดี โบง แคะ มึห แม โปลม เฆ แฮณ. โคว, แคง มืง มารานัะ โดง ดี ฮาว กอย แม อาว มึห ดี โลว โบง โลว รัณ, อาว มึห อากยาม อางยาน, อาว มึห อี กาหลูห ดี น็อห บอ อางยาน.

11 โอว วี นับ วี ยึร ปอ อู โมยว อี กอย แดง กาดาย ครึม เบลณ นี.

ดูอี อี ครัน ดี กาแบลบ, อัน ตู ออง เซเซ ดอ มึห บลอย ลาย กาแคณ กาแบลบ. ดูอี อี กยัะ อี ยัะ, อัน ตู แป ดอน เฌณ ดอ กาโฆห อัน ดี รันซู. ดูอี อี มึห อางยาน, อัน ตู ปึอน ดี โฮม แพ เซเซ. ดูอี อี มึห อางยาน หมึอม หลึอม อี เฮา, อัน ตู มึห โกรวกราม เซเซ. ดูอี อี หล็อก แหลม, อัน ตู มึห ซาเร เซเซ. ดอน อี ยี มึห อาคราว อัน, มึห ดอ ซังโดว วี เหมา วี อัน.

12 แดง ตี, อาว มึห อี นับ อาคราว ดี ยัม อัน. มาฆา บอ นับ ดี ฮ็อะ ดี อึณรับ. มาซีม บอ นับ ดี เคร ยอต. อึณ บอ ปาย ตี ดูอี นับ ดี กาดูห อาเพ อาเร ดอ ตู นัมโหลห นัมรอย เฆ.

13 แดง กาดาย ครึม เบลณ นี โอว วี กาตูณ อางยาน อู โมยว อี หมึอม อาม กาเซา. 14 อึณ แฮะ ดึอม มึห มืง อู มืง อี ดีแตด. ดูอี อี กอย แคง มืง ตี มืร ตู กืน. คูนดีคัม ตาง อู กาดัง บอ ตัห กาโฆห ดี มืง ตี. อัน มืร แฮะ แวง โรบ มืง ตี บอ โบง บล็อะ อึณแตง, แตห อัน ปึอน ดี ลึบ. 15 แคง มืง ตี, อึณ มึห ดูอี พลาน อู วี อี มึห อางยาน บอ หล็อก กาเซา. อัน บอ ตา อางยาน อัน, แตห อัน คยอด มืง ตี. มาแล, วาย อัน ตี อึณ ยี ตู มึห อาเซ อี วี นัมโหลห ดูอี พลาน วี ตี. 16 โอว แฮะ ฮอต ดึอม ต็อห, “เซ ดูอี มึห อางยาน, อึณ บอ หมึอม หลึอม อาพูง เฆ แฮณ.” ปี บอ ต็อห ปาย ตี มืร, ดูอี ยี ออน ดี ลูกตาย อางยาน ดูอี ฆีน ดูอี พลาน. เฆ มืร ตู ซี โทม โฆรห ปี กาลาง อัน.

17 เซ ดูอี โทม โฆรห อึณจูะ อึณจัม ปี กาลาง ดูอี อี มึห อางยาน, อึณ หมึอม หลึอม โทม โฆรห ปี ดัด แดะ กาลาง คูน เรา กาแต เฆ ดูอี รึร.

18 อางยาน แฮะ หมึอม หลึอม ครึง กาโฆห ปี ตา ดา ซึก. มาแล, ดูอี ตู หมึอม อู วี บอ นับ ดี ปยาต นา บอด นา หมึอม กืน กาเซา.