อึณ ตู โกบ มึห อาเซ อี ปี ดูอี อี มึห อางยาน. อาว มึห อาเซ อี ปึอน กาลาง ลอง ปี ปาย แบน โมยว แบน โมยว. ดูอี อี มึห อางยาน อึณ บอ นับ ดี แตห นา อัน ซาบลาง. นา อี มาโบร็ง อี ว็อง อับ ตึอน, อึณ บอ นับ ดี หราย.

2 โอว ต็อห ดี แม, แตห แม โทม โบง โดบ อามีง คูนดีคัม. โคว, แตห แม โหลห แปะ แฮะ ดึอม กาแซณ แม ดี เฌาพรา. 3 แกวะ แตห แม ปีครัน ดี เตา เลห ฮาว ดี อาต คูนดีคัม โกบ โยว กาเซา แม. เซ อึณ มึห ลอง อี ตู บอด อี ตู หมึอม, อาว โลว ดัว อากยาม อางยาน ดี คูนดีคัม. โคว, คูนดีคัม ดี บอ ซูงพยาด โดบ ปี อึง อัน. 4 อามีง ปี ดัว คูนดีคัม, อึณ มึห ปวน ตาง หลึอม อี เฮา. โคว, อึณ มืร ตู มึห อาเซ อี ปึอน ต็อห, “มาเซ ปี โบง แม?”

5 วี เหมา อี โบง โดบ อามีง คูนดีคัม ตี, อัน ดี ลอด อาเพ อาเร. แคง น็อห วี อี มึห อางยาน, อัน บอ นับ ดอ เหมา แฮะ ซังโดว กาลาง โฆรห. อัน บอ นับ ปี ดี ปาย ดี โบง แตห อึณ กาฌี, แตห อึณ ซีคยา โตต ดอน โมยว.

6 โคว, ดอน โมยว อึณ บอ มึห อาคราว อัน, มึห ปี ดี ปาย โมยว เหมา โมยว อัน. ดูอี ยี โลว คัม ดูก ตาง กาเซา.

7 อึณ ตู มึห คอ อู วี อี นับ อึณ ดี ปาย เหมา นา อาต ฮาว. โคว, อาว มึห อาเซ อี ปึอน กาลาง ลอง อัน ตี.

8 อึณ ตู มึห อาเซ อี ปึอน คร็อง อูน คูน. ปาย ตี อึณ มืร ตู มึห อาเซ อี ปึอน ซูงพยาด ลอง ซีแง ดี ยัม อัน. เซ อึณ มึห รันซู อี ตัห, อีมาย ดอน อี โลว กาโฆห, อาว ปึอน ลอด. ปาย ตี เซ ดูอี แฮะ โบง นา ฮาย นา มืก, อึณ ตู แตห อัน ปึอน ลอด.

9 โอว วี ยึร โตต ฌึร ตี ดอน โมยว ดอ วี กาดัวะ กาพา โอว ปี โบง ดูอี แดง กาดาย ครึม เบลณ นี. อึณ บอ มูห ลอง ดูอี อี มึห อาพูง ดังโคว. เฆ มัง อี นับ ดี คาหนาบ อี เฮา, วี แตห บอ เฆ วี คัม ดูก ตาง โกบ ปี โบง เฆ ตี. 10 โอว วี ยึร ดูอี ฮาย ดูอี ตู หมึอม แปะ แฮะ ฮอต ฮาว ดีบ อี แคง กาเดา บาเรว. เฆ แฮะ ดึอม ตัห โดง บอด, เฆ ดูอี กืน แฮะ กาโพรม ดี อืบ มยูก เฆ แคง มืง แปะ แฮะ โบง เฆ นา ฮาย นา ตู หมึอม ตึอน. ลอง อัน ตี มืร อึณ บอ มูห อี ดีโลย ดีลาย.

11 เซ เฆ ดา ตาง ตู ซูงพยาด ครัน ครัน อามู เฆ ดูอี อี โบง นา ฮาย นา มืก บอ ตู ดัม หมาบ ดี เฆ อู เฌณ, ดูอี บอ นับ ดี โบง นา ฮาย นา ตู หมึอม แตห อึณ แว กืน. 12 วี อี แฮะ กาลึบ, อัน แฮะ โบง นา จีจีว นา ตู หมึอม กอ โนะ อู มาย็อห เฌณ, อาซาก อัน มืร แฮะ โต็ง กาเซา. โอว แฮะ วี นับ, อึณ มึห มี เฆ อี โรวเซ เฌาพรา อี ปึอน อาฆยึร นา บอด นา หมึอม. โกบ โรวเซ เฆ ดี อัน เฌา, อึณ บอ แตห เฆ ปึอน กอย ดาคึย. 13 ดูอี ฮาย ดูอี มืก ตึอน, เฆ ยี ตู ปึอน อาฆยึร อี หมึอม โกบ ตู โรวเซ เฆ ดี เฌาพรา. อาซาก เฆ อึณ ปี กามึก อี ตู กอย เหลณ.

14 โอว แฮะ ยึร ปอ อู โมยว แดง กาดาย ครึม เบลณ นี อี แฮะ ดีโลย ดีลาย. เฆ อี มึห น็อห ซืร น็อห หมาน มัง อี, เฆ บอ กาดูห ดี คัม ปี กาอาบ คัม ดูอี ฮาย ดูอี มืก. เฆ อี ฮาย อี มืก มัง อี เฆ ยี ปึอน แคะ กาอาบ ปึอน เฆ อี มึห น็อห ซืร น็อห หมาน. โอว วี ต็อห, ลอง อัน ตี มืร แฮะ ดีโลย ดีลาย. 15 ปาย ตี โอว วี ดัว อากยาม อางยาน, แตห เอ โบยว ดาคึย โจว มึห เอ อาซาก นี. โคว, ดูอี อี กอย แดง กาดาย ครึม เบลณ นี, เซ เอ แฮะ ปึอน ดี โฮม โบยว โบยว เกยา เกยา บอ ปึอน ดี กอย ดาคึย, อาว มึห อี ซี ดี หมึอม หลึอม ตี. ปาย ตี เอ มืร ดาคึย ดี โบง ฆาน ปี กาอาบ เอ โบง, แปะ แฮะ ดัว เฌาพรา ดี เอ ดอ ซี กอย เอ แดง กาดาย นี.

16 ดอ แฮะ โฆยวฆยา โอว ดี นับ ลอง อางยาน, โอว แฮะ ยอด ฆาน ปี โบง ดูอี แดง กาดาย นี. โอว แฮะ ยึร, ดูอี บอ โบง ฆาน ดอง วัน ดอง คืน ตู อีด. 17 แฮะ ฮอต, โอว วี ยึร บอ ลอง แปะ แฮะ โบง เฌาพรา, อาว มึห อี นับ โตต ดอน โมยว ลอง อัน ตี. ดูอี ปี บอ คัด น็อห, โฆยวฆยา แคะ เหมา ดี แตห อัน นับ ลอง อัน ตี, อัน ยี ตู ปึอน นับ โตต ลอง อัน ตี. แดง ตี, ดูอี อี มึห อางยาน, อัน ปี บอ ทาง อัน นับ มืร, อัน ยี ตู นับ.