อานี มูห โหมว แปะ แฮะ ดึอม ต็อห อาซาโลวโมว อี แฮะ หมึอม โทม หลึอม โหมว โมยว เฮา บอกาเฆลียด.

2 แตห แม อูห ซีคยา โอว, แตห โมต แม บยัะ น็อห ร็อก แม ดี โอว. โคว, ปี ปาย น็อห ร็อก แม, อึณ หมึอม หลึอม โอว เดียง อึม มางูน.

3 นามัน อูห หงูน ปี พ็อห แม อึณ แฮะ ล็อะ กาเซา น็อห โอว. เซ โอว ยึร อี เฮา กาลาง ลอง จืร แม, แฮะ ปี อี ฮูห นามัน อูห หงูน นา อาต โอว. โกบ อึณ ปาย ตี, แคะ กอย เฆ ดีบยา แฌด ดี บอ อึง แม.

4 แตห แม แดะ โอว คอ อู แด. โอว มืร ดี กาแบลบ ฮาว โดบ แม. แม คูนดีคัม อี อึบ โอว, แตห แม ดึห โอว ตัห กอย แคง โฮง อีด แม.

เย ดี ปึอน ดี โบยว โบยว เกยา เกยา โดบ แม คูนดีคัม. เย อืบ ปี ปาย แม ดี ร็อก ดีบยา, อึณ แฮะ หมึอม หลึอม เย เดียง อึม มางูน.

ปี ร็อก เฆ ดีบยา ดี แม แฮะ หมาน.

5 อึย เบ ดีบยา อี กอย แคง มืง เยรูซาแลม, นา โอว ปี บอ แฮะ ว็อง มืร, อึณ ยี หมึอม ร็อก. อึณ ปี บอ ว็อง ปี ทึบ อี กอย เฆ ดูอี เกดา มืร, อึณ ยี ชีด ปี บีก ฆ็อง อี กอย แคง โฮว อาซาโลวโมว.

6 แกวะ แตห เบ ยอด ต็อง โอว. โอว ว็อง ปาย นี โกบ แฮะ ราย โอว ดี ซอดาด. อีกัด โอว เฆ วา โอว อี มูห อีมาย, เฆ แฮะ รู จาว ดี โอว. เฆ แฮะ จัร โอว ฮาว โบง ฆาน แคง มาน มางูน เฆ. อี มูห มาน มางูน โอว, โอว ยี ตู ดัน ยอด ลึมลา.

7 อึย ปาว ปี ร็อก โอว, แตห แม กาลาง ดี โอว, แม ดี ฮาว เฮียง พึง มาบู แม ดี เหมา? ดอ กาแต ซีแง, แม ดี แตห พึง มาบู แม ดีเหลา ดี เหมา? เซ แม ตู กาลาง ดี โอว, โอว ดี บอ ปี ยา มาลัม อี กาโหมะ นา อัน บอ วีน ดี เหรต แม โคบ พึง มาบู เฆ ฆึก แม.

8 อึย แม นาง อี แฮะ ชีด หลึอม อีบึณ บอกาเฆลียด, เซ แม ซี นับ โดง กอย ปาว แม, แตห แม โดบ ปัน พึง มาบู มาแป ตี. แตห แม มืร ฮาว เฮียง มาบู เฆ มาแป แม, ฮาว โคบ ทึบ เฆ อี เฮา อี เฮียง มาบู มาแป.

9 อึย แม ปาว ปี ร็อก โอว, แม ปี มังปร็อง โดว อาหยาง อี ครึง ดี ลักเลา คูนดีคัม พาโรว.

10 กาลา แม บอ บีโหยะ ปี ตา แม มืร แฮะ ชีด กาเซา. บอ ปึอน มาฮอย อี ฮอย ดี แมง แม แบน วัน แบน วัน มืร, แฮะ หมึอม ยอด กาเซา.

11 เย ดี วี โบง มากาแวะ ครีว อี ฮับ โบห รึอน, แตห อึณ ปีชีด แม นาง.

12 ดอ อีด ดีเหลา คูนดีคัม แดง กาโช็ง อัน, นามัน อูห หงูน โอว, แตห อึณ อูห หงูน บอ โฮว.

13 ปาว ปี ร็อก โอว แฮะ ปี อึณกรึห อูห หงูน เดา มูรา อี กอย แคง ฮู อี ฮอย ดี บังน็อห โอว.

14 ปาว ปี ร็อก กาเซา โอว, อัน มืร แฮะ ปี โบห อี กอย แคง มาน มางูน อี ตัห โดง จืร เอนเกดี.

15 อึย ปาว ปี ร็อก โอว, อารึบ แม แฮะ ชีด กาเซา. งาย แม มืร ปี มาโบลย บอ หมึอม ยอด เซเซ.

16 อึย ปาว ปี ร็อก โอว, อารึบ แม มืร แฮะ ชีด กาเซา บอ หมึอม ร็อก หมึอม โวว กาเซา. เปต อี เงียน ดี บอ แบน โดง อีด อาย.

17 อาย ดี ดึห เฮ อารีด ดีโลย โบง มานัก กาง อาย. อาย มืร ดี ดึห เฮ อึณเก ดีโลย โบง ดี โอว อัน.