ปาย ตี ดอ ซี หนึม แม แตห แม วี โหลห เฌาพรา อี มูห ดา กาณา อี แฮะ พาน เบลห แม. แตห แม โหลห เฌาพรา อาต ตัห ฌัม ดูก ตาง บอ อาคราว ปัน ดี กาลาง แม ลอง ตู อึง แม อาคราว ตี.

2 อึณ ดี มึห อาคราว อาต ดี หราย บลาง ซีแง บอ บลาง มาเฆียน เฆ ซีมัณ, บอ อาต วี โฮะ อึณอูะ วี ตัห แตห อึณ อับ ว็อง วาย แฮะ โจห ฆลาย.

3 ปัน อัน ตี เฆ อี ดี ฆ็อง ดี แร กาง, เฆ ดี บอ ดียูห ดีเยณ. เฆ อี แฮะ ดึอม มึห โปลม มึห แฮณ กืน, เฆ ดี วี ฮาว กาโฆะ. เฆ อีบึณ อี กรีด โหงว ดี บอ ฆืด บอ จู โกบ แฮะ แกร เฆ ดี เปรต. บอ เฆ อีบึณ อี ยอด แคง กาเดา ปาแตง, เฆ อาว ฮู ยึร บรี.

4 อึณ ดี ฌัม อาคราว ปัน ดี กาบีด อี มาโลห อี เลห ดี อึณเตณ, อาว ฮู ปึอน ยึร ฮัม กรีด อี โหงว. มาแล, ซีณวัห เจว ฮัม มาซีม ดี วี บยีต แตห ดูอี อึณซึห. ฮัม แมง เฆ อีบึณ อี ต็อห โหมว, อึณ ยี แกร ดี หราย.

5 อึณ ดี บอ ฌัม ปัน ดี โยว ดูอี ตู ยัะ ฮาว โดง จา. เฆ บอ โยว ดี กาดูห อาเพ อาเร ดอ ฮาว เฆ โดบ อึณเตณ. อึณ ดี บอ มึห เฮ อี โบห ลูย. มา อาโฌ็ง อาว ฮู จาว ดัณ. ปี ซี โบง ซี รัณ ดูอี มืร, อาว ฮู มึห. ลอง อัน ตี ดอน โมยว, อึณ ปี ดูอี อี แฮะ แกร ดี กัด, แฮะ เครียะ ปัน ดี ยัม เฆ. ดอ อัน ตี ดูอี ฌึร ตี ดี ฮาว กอย โดง กอย ดอน อี เซเซ. เฆ อี กลึร อี เหงา โกบ มึห ดูอี ยัม, เฆ ซี ฮาว โดบ อึณเตณ.

6 แตห เบ โหลห อัน เฌา อาต กาดัด วัน รึอน, อาต กาลาต ซีลัยะ ครีว, อาต หลูห อาต รอต กาเปา อึม อี กอย โคบ โตห อึม, บอ อาต กาบัก กาเลณ อี ปลัก อึม ดี อึม คึม.

7 แตห เบ กาดัวะ กาพา ดอ ซี ปึอน เบ ดี โหลห อัน เฌา อาต วี แบน เบ กาปูห เฆ กาดาย แปะ แฮะ ดึอม ดึห เฌาพรา ดี โบง เบ, อาต เลห น็อห พึอม เบ แคง โดว โบ็ง เบ, วี ฮาว โดง กอย เฌาพรา อี แฮะ ดึอม ดัว น็อห พึอม ตี ดี เบ.

8 ดา ซารา อี โฮว ดารา แฮะ ต็อห, “ดอน โมยว แฮะ ดีโลย ดีลาย. แคะ กอย ดอน โมยว, อาว มึห ดีโคว.”

9 ดา อี โฮว ดารา ตี แฮะ มึห อางยาน. อาว วัน แคะ ตี. อัน มืร มาโนว เฆ ดูอี กืน, แตห เฆ นับ ลอง ปี ปาย แบน โมยว แบน โมยว. อัน วี เหรต ตัห โฆรห มากาทัะ บอ โฆรห ทูง แบน โมยว แบน โมยว, วี แดม อูน แตห อึณ หงึย เฌณฌา โดบ. 10 ดา ซารา อี โฮว ดารา ตี, อัน บอ เหรต โฆรห อี หมึอม โทม บอ แดม อูน โฆรห ดารา อี ซืร ซืร หมาน หมาน.

11 โฆรห ดูอี อี มึห อางยาน ตี, อึณ บอ ปี อึณกรวน ปี โฆ็ง ดา อี เฮียง มาบู. โฆรห อางยาน บอด ปี แดม อูน ปี กาฌูะ อูน อัน ตี, อึณ บอ ปี มาฮีน แปะ แฮะ ดอก อูน อี, แตห อึณ มัน ซีคยา. 12 อึย ฆอน กาโณม โอว, แดง ตี แตห แม ซาดีก. ลอง ปี ดี แดม แปะ เฆ ทัม อาว นับ ดี โตต. ลอง ปี โฆยวฆยา เอ ดี เฮน กืน มืร, อึณ บอ แตห เอ นูน กาเซา.

13 ดี กาแดะ โฆรห นี, อึณ บอ มูห, แตห เบ โรวเซ เฌาพรา บอ โบง โดบ โฆรห อัน เฌา. ลอง อัน ตี แฮะ มูห โตต ปี โลว โบง เอ ดูอี.

14 โคว, เฌาพรา บอ มูห ดา กาณา อี ดี ซูงพยาด แคะ ปี โบง เอ ดอน โมยว. อึณ บอ มูห โมยว ปี เครียง ปี ตู บยัะ เอ, อึณ บอ มูห อี หมึอม บอ อี จีจีว ดอน โมยว.