1 อานี อึณ มูห โฆรห ดา ซารา อี โฮว ดารา. อัน บอ มูห หลูกหลาน อาดาวีด อี มูห คูนดีคัม แคง มืง เยรูซาแลม.

2 อัน ต็อห, “ดอน โมยว แฮะ ดีโลย ดีลาย. แคะ บอ มึห แดง กาดาย, อาว มึห ดีโคว.”

3 แคะ กอย เฆ ดูอี แดง กาดาย ครึม เบลณ นี, แคะ ปี โฆยวฆยา เฆ ดี โบง, อาว มึห อาฆยึร มาเซ.

4 ดูอี บอ ปวน ฮาว แบน โจว แบน โจว. อึณ ยี มูห กาดาย อี กอย เซเซ.

5 ซีแง มืร เลห, ปี วี เฆต. อึณ บอ โลว ปีครัน ดี ฮาว, แตห อึณ วี ฌัม โดง ดึอม เลห อัน.

6 คูน มืร ปาย ตี. อัน บอ บูด โลง บลาก นา เตต. แฮะ ฮอต, ปี วี บูด โฮะ บลาก นา กัว. อัน บอ บัน วีว บัน เวณ โดบ อึณเตณ อัน.

7 แคะ กอย อึม ดอน ดีลัยะ ดอน แบลง บอ แหล ฮาว ลึบ แคง อึม นัมมูกซารา. มาแล, อึม นัมมูกซารา ตู นับ ดี โนะ. อึม ยี วี มึห ดี โตห อัน บอ แหล เซเซ.

8 แคะ มึห ฌึร ตี ดอน โมยว, อึณ บอ ดูก บอ หณาบ กาเซา ดี ดูอี. อึณ บอ แตห ดูอี กอ ฮู นับ ดี กาลาง โตต. งาย นับ ดี ยอด นับ ดี ยึร, ยี ตู นับ ดี จู. โหยะ นับ ดี โทม ยี ซี โทม เซเซ.

9 อี แฮะ ดึอม แบน ตัห, อึณ ดี วี ตัห ปอ อู เฌณ. แปะ แฮะ ดึอม โบง ดูอี, เฆ ดี วี โบง ปอ อู เฌณ. แดง กาดาย ครึม เบลณ นี, อึณ ตู มึห อี โบว ตัห กามาย.

10 อึณ ตู มึห โมยว เหมา แปะ แฮะ ต็อห ดูอี, “อานี แฮะ มูห อี กามาย.” ดอน โมยว แฮะ ฮอต ดึอม มึห อู ซีณ ดอ มึอน ซีณ อาต ฆึอด เอ.

11 อึณ ยี ตู มึห คอ อู วี อี วี นับ วี โนว ลอง อี แฮะ ดึอม โบว แบน ดอ มึอน อี แฮะ เหลณ ตี. บอ นา อาต นี ฮาว, อึณ ตู มึห อาเซ อี ดี โนว อี ดี นับ ลอง อี ดี โบว แบน วาย นี.

12 โอว ดา ซารา อี โฮว ดารา นี, โอว แฮะ ดึอม แบน คูนดีคัม อี อึบ แคง มืง เยรูซาแลม. 13 โอว แฮะ อูน น็อห ดี ตา อางยาน โอว, แตห โอว เฮน โตต ดอน โมยว แคะ ปี โบง ดูอี แดง กาดาย ครึม เบลณ นี. แคะ ปี แตห เฌาพรา ดูอี โบง, อึณ บอ หณาบ กาเซา. 14 โอว ยึร แคะ ปี โบง ดูอี แดง กาดาย นี, อึณ บอ มูห โตต อี ดีโลย ดีลาย. อึณ บอ ปี ดูอี อี ซี ปา คูน.

15 อาโมยว อี โฆะ, อาว ปึอน แตห อัน วี ซืร. อาโมยว อี ฌูด ลูด อี ตู กาฌี, อาว ปึอน ตีห แตห อัน วี กาฌี.

16 โอว วี กาลาง แคง น็อห โอว ต็อห, “โอว แฮะ มึห อางยาน หลึอม เฆ คูนดีคัม อี ดึอม อึบ มืง เยรูซาแลม นา อาต โอว. โอว วี ยึร ลอง อางยาน โอว แฮะ กืน กาเซา.” 17 โอว มืร อูน น็อห ดี แตห อึณ กาหลูห ดี น็อห โอว ลอง อางยาน บอด. แตห โอว นับ บอ ลอง น็อห ฟึณ น็อห รึร. โอว บอ วี นับ ลอง ฌึร ตี, อึณ ปี ดูอี อี ซี ปา คูน.

18 โคว, ดูอี อี มึห อางยาน กืน, อึณ บอ แว ดูก หณาบ กืน ดี น็อห อัน. ดูอี อี นับ กืน บอ น็อห กลึร น็อห เหงา, อึณ ดี แกร ดี กืน.