1 โอว แฮะ อูน น็อห ดี โบง แตห อึณ โบยว แตห อึณ เกยา, แตห โอว นับ น็อห ตี, อึณ ดี ปาย เหมา. มาแล, โอว วี ยึร อึณ ดีโลย ดีลาย. 2 โอว วี ยึร เซ อี กาณัห, อึณ วี ปี อี รึร อี ฟึณ. ลอง อี โบยว อี เกยา, อึณ ตู มึห อาฆยึร มาเซ. 3 โอว บอ วี คราม ดี เดียง อึม มางูน แคะ ดี โบยว ดาคึย. ดอ อัน ตี โอว ยี แฮะ แตห อางยาน อึบ โอว เซเซ. โอว ซี แตห อึณ กาหลูห ดี น็อห โอว มาเซ อึณ มูห ปี กาอาบ ดูอี โบง, แตห อึณ หมึอม ดี เฆ โจว กอย เฆ แดง กาดาย นี โกบ ตู โต็ง อาซาก เฆ.

4 โอว มืร แฮะ โบง อี อาเร ตาง กาเซา. โอว แฮะ ซัม กาง บอ โบง มาน มางูน อาดา โอว. 5 โอว แฮะ โบง มาน, โบง กาปึม แตห อึณ ชีด บอ ซัม เฮ เบล ดอน โมยว. 6 โอว แฮะ ฆึห อึม ดึง, แตห โอว ปึอน ดี รึก เฮ ปี ซัม โอว แบน โมยว แบน โมยว. 7 โอว มืร แฮะ จึห แตห โอว มึห หมาย อีบึณ บอ หมาย อีมาย กืน กาเซา. หมาย โอว เฆ ตี กอ วี มึห ฆอน กืน กาเซา อี ฆึอด ตัห แคง อึณโฮม โอว. โอว บอ มึห พึง มาบู เฆ พึง มามัก กืน หลึอม ดอน อี อี ดึอม กอย แคง มืง เยรูซาแลม. 8 โอว บอ แฆบ รึอน เฆ ครีว วี ตัห อูน กาฌูะ โดบ โกรวกราม โอว. โอว บอ ปึอน บอ คอซอง ปี ดัว คูนดีคัม บอ จึง ปี โลว ฮับ ดูอี ดอน อืง ดอน โปละ. แคะ บอ มึห อีบึณ อีมาย, โอว แตห เฆ ต็อห โหมว ดอ โบง โอว บลอย. โอว มืร แฮะ ปึอน อีบึณ กืน กาเซา, แตห อึณ บอ โดบ แคะ ปี อึง อี ล็อะ น็อห อีมาย. 9 ปาย ตี โอว มืร แฮะ ปึอน อาพูง ดังโคว ตาง หลึอม เฆ อี ดึอม กอย แคง มืง เยรูซาแลม. ดอ อัน ตี โอว มืร โดบ อางยาน โอว เซเซ, ตู แตห อึณ โบยห อึณ หราย ดอ เหมา.

10 แคะ ปี ซี ปึอน โอว, โอว แฮะ โบง แตห โอว ปึอน โตต ดอน โมยว. แคะ ปี ซี แตห โอว อึณ โบยว อึณ เกยา ดี น็อห โอว, โอว มืร ตู แคร ตู ยืน คอ อู โมยว. โอว มืร โคย ลอง แปะ แฮะ โฆยวฆยา โอว ดี โบง ดอน โมยว. น็อห โคย ปี โลว โอว โบง ฆาน กืน ตี, ยี ตู แบน อาฆยึร ดี โอว.

11 ปาย ตี ดอ วี กาดัวะ กาพา โอว แคะ แปะ แฮะ โบง โอว, บอ ลอง แฮะ โฆยวฆยา โอว ดี โบง ตา โปลม ตา แฮณ โอว, โอว บอ วี นับ, ฌึร ตี บอ ดอน โมยว แฮะ ดีโลย ดีลาย. อึณ บอ ปี ดูอี อี ซี ปา คูน, อาว มึห ดีโคว มาเซ.

12 เซ อึณ มึห คูนดีคัม กาดัง กามาย, อัน บอ นับ ดี โบง โดบ แคะ ปี ดึอม โบง คูนดีคัม กาดัง อาต. ปาย ตี โอว บอ วี เฌณฌา ลอง อางยาน บอ ลอง นา รึร นา ตู หล็อก.

13 ดอ อัน ตี โอว บอ วี นับ, อางยาน แฮะ หมึอม หลึอม นา รึร นา ตู หล็อก. อึณ บอ ปี บลาง แฮะ หมึอม หลึอม อับ ว็อง.

14 ดูอี อี มึห อางยาน, อัน บอ มึห งาย อี แตห อัน ปึอน ยึร. ดูอี รึร ยี นับ ดี ฮาว แคง อับ ว็อง. ปาย ตี โอว วี ยึร อาเพ อาเร อี โบว แบน ดี ฆาย แฮะ มูห อู โมยว.

15 โอว วี กาพา แคง น็อห โอว ต็อห, “อาเพ อาเร แปะ แฮะ กาดูห ดูอี ฆาย ตี, อึณ ดี บอ วี ตัห ฌัม บอ ดี โอว. เซ ฮี ปาย ตี โอว ปี บอ แฮะ มึห อางยาน มืร, อึณ ตู มึห อาฆยึร มาเซ.” โอว วี กาพา แคง น็อห โอว บอ ลอง อัน ตี แฮะ ดีโลย ดีลาย.

16 บอ ดูอี อี มึห อางยาน บอ ดูอี รึร, อาว มึห อาเซ อี วี นัมโหลห เฆ. นา อาต ฮาว เฆ ดี บอ ปีว เอ บอกาเฆลียด. ดูอี อี มึห อางยาน ดี บอ โลว ยัม ปี ดูอี รึร.

17 ปาย ตี โอว แฮะ ปึร แฮะ ซีน โจว อาซาก โอว นี. โคว, โอว ตู อึง ฆาน กืน ปี โลว โบง ดูอี แดง กาดาย นี. อึณ ตู แบน อาฆยึร มาเซ ดี โอว. อึณ วี แตห มี โอว คัม ดูก ปีเยณ. ฌึร ตี บอ ดอน โมยว อึณ แฮะ ดีโลย ดีลาย. อึณ ปี โอว ซี ปา คูน. 18 แดง ตี, โอว บอ วี ฌ็อง โตต ดอน โมยว ลอง แปะ แฮะ โฆยวฆยา โอว ดี โบง อี แตห โอว ดูก โอว หณาบ กาเซา. โคว, โอว แฮะ นับ, โอว โลว วี เบลห อูน โตต ดอน โมยว ดี เฆ อี ดี ตัห นา ปัน. 19 อาว มึห อาเซ อี นับ โยว อัน ดี มูห ดูอี อี มึห อางยาน, โยว อัน ดี มูห ดูอี รึร. อัน ยี ดี อึบ โตต แคะ แปะ แฮะ โฆยวฆยา โอว ดี โบง, แปะ แฮะ จัร โอว อางยาน โอว โบง อูน แดง กาดาย นี. โมยว ตี มืร แฮะ ดีโลย ดีลาย. 20 แฮะ ฮอต ปาย ตี อึณ วี แบน น็อห ลึร น็อห กลึร โกบ ปี ดี โลว โบง ดูอี กืน อี ดูก อี หณาบ กาเซา แดง กาดาย ครึม เบลณ นี. 21 โคว, เซ อึณ มึห ดูอี อี มึห อางยาน บอ แฮะ กยัะ ดี โบง แบน โมยว แบน โมยว, อัน ยี ตู ปึอน ดี บึง. ดูอี เฮา อี ตู ดึอม โบง มาเซ, อัน ดี วี ปึอน โตต ดอน โมยว. บอ ลอง อัน ตี แฮะ ดีโลย ดีลาย, อึณ ตู หมึอม. 22 ดูอี อี กอย แดง กาดาย แฮะ โบง อี ดูก อี หณาบ ดี น็อห อัน บอ โจว อาซาก อัน, อาว มึห อาฆยึร มาเซ ดี อัน. 23 แคะ โต็ง อาซาก อัน, แคะ ปี โบง ปี รัณ อัน บอกาเฆลียด, อึณ แบน มี อี ดูก อี หณาบ ดี อัน. บอ แคง หมึร, อาว แบน น็อห หนีม น็อห เยน ดี อัน. บอ ฌึร ตี แฮะ ดีโลย ดีลาย.

24 เซ ดูอี แฮะ มึห ปี ดี โฮม ปี ดี เดียง บอ แฮะ ดาคึย ดี โบง ฆาน อัน, อึณ แฮะ ตืก แคะ ตี, อาว ฮู ปึอน หลึอม แดง ตี. ลอง อัน ตี โอว แฮะ นับ, อึณ บอ มูห ปี ดัว เฌาพรา, แตห เอ ดูอี โบง. 25 เซ อัน เฌา ตู ควาง, อาว มึห อาเซ อี ปึอน โฮม อี ปึอน โบยว ดาคึย. 26 เฌาพรา ดัว อางยาน บอ แตห ดูอี นับ แบน โมยว แบน โมยว. อัน บอ แตห วี อี ล็อะ น็อห อัน ปึอน ดี กอย โบยว ดาคึย. วี อี มึห หมาบ, อัน เฌา บอ จัร แตห อัน โบง ฆาน อี ดูก อี หณาบ กาเซา, แตห อัน มึห ดี แฆบ กาฌูะ อูน, แตห อัน วี ปึอน ดี ดัว ดี ดูอี อี ล็อะ น็อห เฌาพรา. ลอง อัน ตี มืร แฮะ ดีโลย ดีลาย. อึณ บอ ปี อี ซี ปา คูน.