1 แคะ บอ มึห ดอน โมยว ปี โลว โบง แดง กาดาย นี อึณ มึห อาคราว อัน.

2 อึณ มึห อาคราว ฆึอด บอ อาคราว ยัม. มึห บอ อาคราว ซัม บอ อาคราว โซะ.

3 อึณ มึห อาคราว ดี ง็อห ยัม บอ อาคราว ดี ซีนัม แตห อึณ แกน. มึห บอ อาคราว ดี ย็อห แวน, บอ อาคราว ดี วี แด กามาย.

4 อึณ มึห อาคราว ดี โลว ยาม บอ อาคราว ดี เอว กาณัห. มึห บอ อาคราว กลึร เหงา บอ อาคราว ดี โคย ดี ฆา.

5 มึห บอ อาคราว ดี ดึห แวน มาว บอ อาคราว ดี แฆบ อูน มาว. มึห บอ อาคราว ดี ลาย เงียม บอ อาคราว ตู วี ลาย เงียม.

6 อึณ มึห อาคราว ดี เหรต ตัห บอ อาคราว ดี โบยห หราย. มึห บอ อาคราว ดี ดึห ตัห อูน บอ อาคราว ดี ดึห แวน.

7 มึห บอ อาคราว ดี กายาต ครึง ตา บอ อาคราว ดี วี กาจีณ. มึห บอ อาคราว ตู ต็อห มาเซ บอ อาคราว ดี วี กาลาง โฆรห.

8 อึณ มึห อาคราว ดี ลาย ร็อก บอ อาคราว ดี ลาย ฌ็อง. มึห บอ อาคราว ดี กาโฆห บอ อาคราว ดี เยน ดาคึย.

9 ดูอี อี แฮะ โบง ฆาน จัน กาเซา, มึห อาฆยึร มาเซ ดี อัน? 10 โอว แฮะ ฮอต นับ, เฌาพรา แฮะ แตห ดูอี โบง ฆาน ราง อาเซ ราง อัน. 11 เฌาพรา เบลห อูน อาคราว แตห อึณ กาโดว, แตห อึณ กางยา โตต ดอน โมยว. เฌาพรา แฮะ เบลห อูน แคง น็อห เอ ดูอี, แตห เอ มึห น็อห อี ซี นับ ลอง อี ตู นับ ดี หราย อี กอย เซเซ. มาแล, ปี โบง เฌาพรา ซีณ ดอ โฆว กอ ฌัม กาแดะ ดูอี ตู ปึอน นับ โตต ดอน โมยว. 12 ปาย ตี โอว บอ วี นับ, เซ ดูอี แฮะ กอย โบยว ดาคึย บอ โบง นา บอด นา หมึอม, โจว มึห เอ อาซาก นี อาว มึห อี ซี ดี มึห อาฆยึร ตาง หลึอม ตี. 13 เซ ดูอี ดอน อี แฮะ มึห ปี ดี โฮม ปี ดี เดียง บอ กอย โบยว ดาคึย, อึณ บอ มูห เฆฌู ปี ดัว เฌาพรา ดี เอ. 14 โอว มืร แฮะ ฮอต นับ, แคะ ปี โบง เฌาพรา ดอน โมยว, อึณ บอ มูห โมยว อี กอย เซเซ. อึณ ตู ปึอน วี ปัว คอ อู โมยว, บอ อาว ปึอน ดึห เลห คอ อู โมยว. เฌาพรา โบง อูน โมยว ตี, แตห เอ ดูอี โรวเซ อัน เฌา.

15 อี แฮะ แบน ดอ ตี นี, อึณ แฮะ ดึอม แบน อาต นี. บอ อี ดี แบน นา อาต ฮาว, อึณ แฮะ ดึอม แบน อาต นี. อี แฮะ ดึอม แบน ฮาว มืร, อัน เฌา ดี วี แตห อึณ แบน ปอ อู เฌณ.

16 แดง ตี โอว ปี วี ยึร แดง กาดาย ครึม เบลณ นี. โดง ซูงพยาด อี ดารา, อึณ บอ มึห อี ฮาย อี มืก อี ตู โดบ ดารา. โดง กาอาบ ซูงพยาด นา ซืร นา หมาน, อึณ บอ มึห อี ฮาย อี มืก อี ตู โดบ ดารา.

17 โอว วี กาพา แคง น็อห โอว ต็อห, “เฌาพรา ดี บอ ซูงพยาด ดารา ดี ดูอี โดบ น็อห ซืร น็อห หมาน บอ ดี ดูอี ฮาย ดูอี มืก.” โคว, แคะ บอ มึห ดอน โมยว บอ แคะ ปี โบง ดูอี ดอน อี, เฌาพรา แฮะ แตห อึณ มึห อาคราว อัน.

18 โอว วี กาพา ต็อห, “เฌาพรา เทว ดี ยอด เอ ดูอี, แตห เอ นับ, เอ ปี โดว ซัดดาวา.” 19 อาเพ อาเร อี ตัห ฌัม ดี ดูอี, อึณ ฌัม บอ ดี โดว ซัดดาวา. อึณ บอ มูห อู โมยว. โดว ซัดดาวา โลว ยัม บอ ดูอี โลว ยัม. โดว ซัดดาวา บอ ดูอี มึห พึอม อี มูห อู โมยว. ปาย ตี ดูอี ตู หมึอม หลึอม โดว ซัดดาวา. โคว, บอ อาซาก เอ ดูอี แฮะ ดีโลย ดีลาย. 20 แคะ กอย เฆ บอกาเฆลียด, เฆ ดี ฮาว ฌัม อู โปละ. เฆ แฮะ ดึอม ตัห ดี กาปูห. วาย แฮะ ฮอต ยัม, เฆ ดี วี ฮาว แบน กาปูห. 21 อาว มึห อี นับ ซีคยา โยว น็อห พึอม ดูอี ดี โฮะ นา แดง บอ โยว น็อห พึอม โดว ซัดดาวา ดี โลง ครึม กาดาย.

22 โกบ อึณ ปาย ตี โอว บอ วี นับ, เซ ดูอี แฮะ โบยว ดาคึย ดี โบง ฆาน อัน, อาว มึห อี ซี ดี หมึอม หลึอม ตี. โคว, เฌาพรา แฮะ แตห อัน โบง ปาย ตี. ปี ปาย ดอน โมยว, อาว มึห อาเซ อี นับ วาย แฮะ ฮอต ยัม อัน.