1 โอว ปี วี ยึร ลอง อี ตู กาซืร แดง กาดาย ครึม เบลณ นี. โอว แฮะ ยึร เฆ อี แฮะ คัม อี เฮา คาหนาบ เฆ, เฆ อี แฮะ ยาม. อึณ ยี ตู มึห อาเซ อี ตัห จอย เฆ. โคว, เฆ อี คาหนาบ เฆ ตี, เฆ แฮะ มึห ปวน มึห บอ อาพูง ดังโคว โกบ อาว มึห อาเซ อี แร เฆ.

2 โอว บอ ต็อห, เฆ อี แฮะ ฮอต ยัม ฮาว, เฆ แฮะ ดาคึย หลึอม เฆ อี ซี กอย, อี ซี อีม ดอ ตี นี นี.

3 อี หมึอม หลึอม อา โมยว ตี บอ มูห เฆ อี หณัม ดึอม ฆึอด. โคว, เฆ หณัม ดึอม กาดูห อี ฮาย อี มืก แดง กาดาย นี.

4 อึณ บอ วี กาหลูห ดี น็อห โอว ลอง ดูอี อี ออน ดี โฆยวฆยา ดี โบง แตห เฆ ปึอน แบน โมยว แบน โมยว. เฆ โบง โกบ หลัยะ เฆ อี เฮา. ลอง อัน ตี มืร แฮะ ดีโลย ดีลาย. อึณ บอ ปี อี ซี ปา คูน.

5 ดูอี อี รึร กาเซา, อัน บอ กอย ปีเยณ, ตู โบง มาเซ, แตห อัน กอ เอต ยัม.

6 เซ แฮะ ปึอน อู กาตึง แด บอ มึห น็อห หนีม น็อห เยน, อึณ บอ หมึอม หลึอม อี แฮะ ปึอน อู กาโตม บอ รัณ ดูก รัณ หณาบ เซเซ. อึณ บอ ปี อี ซี ปา คูน.

7 โอว วี ยึร ปอ อู โมยว อี แฮะ ดีโลย ดีลาย.

8 อึณ มึห ดูอี อู วี, อัน บอ กอย ราง อัน อู วี. อัน มืร ตู มึห ฆอน, ตู มึห บีนอง วอแว อี กอย รึม โดบ อัน. อัน แฮะ โฆยวฆยา ดี โบง บอ รัณ ดูก รัณ หณาบ เซเซ. แคะ มึห อัน โกรวกราม, อึณ ยี ตู เบระ ดี น็อห อัน. อัน บอ วี ดีหมอด ต็อห, “โอว แฮะ โฆยวฆยา ดี โบง บอ โฮม ดูก โฮม หณาบ. อี โบยว อี เกยา โอว ยี ตู ยึร. แคะ ปี คัม โอว ดูก ตี, อึณ ดี วี แบน อาฆยึร โมยว เหมา ดี โอว?” ลอง อัน ตี มืร, อึณ บอ มูห อี ดีโลย ดีลาย. อึณ บอ มูห มี ลอง อี ดูก อี หณาบ ดี น็อห.

9 ดูอี อา วี บอ หมึอม หลึอม ดูอี อู วี. โคว, ปี กาโพรม ฆาย ดี โบง, อึณ แฮะ แว มึห อาฆยึร.

10 เซ อู วี บอ เกห, ปอ อู วี ปึอน ดี วี บยีต แตห อัน ยีต. มาแล, เซ ดูอี อู วี แฮะ เกห, ยี ตู มึห อี จอย อัน, วี ตี แฮะ หมึอม กาเว กาเซา.

11 บอ เซ ดูอี อา วี อีด รึม, อึณ ดี บอ ซีอูณ ซีคยา. เซ อึณ มูห มี อู วี อีด, อึณ ตู นับ ดี ซี อูน ซีคยา.

12 เซ อึณ มูห ดูอี อู วี อี เฮา บอ นับ ดี แป หงึย หงึย. เซ อึณ มูห ดูอี อา วี, ฆาย บอ นับ ดี แร โดว บรีม ฆาย, ตู แตห อี เฮา ปึอน ดี แป ฆาย. ปาย ตี บอ วัน อี มึห โอย ฆีว อัน ตู กาดัด หงึย หงึย.

13 ดูอี พลาน ดูอี ฆีน อี ซี หนึม อี มึห อางยาน, อัน บอ หมึอม หลึอม คูนดีคัม อี แฮะ กัด แฮะ แฆ, ตู คัม ดี โทม อากยาม อางยาน ปี ดัว อี เฮา. 14 ดูอี ฆีน ดูอี พลาน อี ฆึอด ตัห แคง มืง ปี อึบ อัน ตึอน, ปี บอ มูห ดูอี อี เลห ตัห แคง กาปึม มืร, อัน แฮะ ปึอน แบน คูนดีคัม. 15 โอว วี ยึร ดูอี บอกาเฆลียด อี กอย แดง กาดาย ครึม เบลณ นี, เฆ วี โดบ คูนดีคัม อี ซี หนึม อี แฮะ วี ปลูะ คูนดีคัม บรีม ตึอน. 16 คูนดีคัม ตึอน แฮะ อึบ ดูอี กืน, อาว แป ดี ตีห โตต. มาแล, เซ อัน ฮี ปวน ฮาว, อาว มึห คอ อู วี อี โคย อี น็อห ดาคึย ลอง แปะ แฮะ ดึอม โบง อัน. ลอง อัน ตี มืร แฮะ ดีโลย ดีลาย ปี อี ซี ปา คูน.