1 เฆ ดูอี แคง อืง ยูดา, เฆ แฮะ นับ เฌาพรา. เฆ ดูอี แคง มืง อีซาเรลัะ, เฆ โรวเซ เฌาพรา อี มึห ปวน ตาง.

2 โฮว อัน เฌา แฮะ กอย แคง มืง เยรูซาแลม. นอน ฌีโอน แฮะ แบน โดง กอย อัน เฌา.

3 โดง กอย อัน ตี, อัน เฌา แฮะ กาบัก แวน บลา อัะ เฆ รันซู อัน, อัน แฮะ ปยาต บอ บลา เลียห เฆ มัง ฆ็อง, บอ ครึง กาโฆห ดอน โมยว.

4 อึย แม เฌาพรา, อาพูง ดังโคว แม แฮะ ลึห ซีคยา ดอ โลง แม ดี นอน วาย แฮะ กาโฆห ออง แม ดี รันซู แม.

5 เฆ ดา ซึก อี ยัะ อี กยัะ ดี กาโฆห, เฆ แฮะ ฮอต กาดูห ดี คัม อี พาด ดึห โกรวกราม เฆ. เฆ แฮะ ฮอต ยัม, อาว ฮู ยีต. บอ โปลม บอ แฮณ เฆ อาว มึห ดีโคว มาเซ.

6 แม เฌาพรา อี มูห เฌาพรา ปี กรึบ อาโกบ, แม แฮะ โบง แตห บอ ลักเลา บอ ดูอี อี ป็อะ ลักเลา ยัม ชึม โตต.

7 แม เฌาพรา, แม อู กาดัง แฮะ หมึอม โยว กาเซา. ดอ แฮะ รู แม อาว มึห อาเซ อี คัม ดี กอย นา อาต แม เฌา.

8 ดอ ซูงพยาด แม เฌา อามู อี, โฆรห แม แฮะ เลห แคง ฆางหราว, แตห ดูอี บอ กาดาย บอ โยว ดีเยณ โตต ดอน อี.

9 ดอ อัน ตี แม เฌา มืร ซูงพยาด ดี คยอด ดูอี แดง กาดาย, อี มูห ดูอี แปะ แฮะ คาหนาบ อี เฮา.

10 ปาย ตี, ดูอี อี แฮะ ดึอม รู ดี แม, เฆ ดี วี อืบ แม เฌาพรา. เฆ อี ซี รู อาว ฮู ปึอน โบง มาเซ.

11 แคะ ปี ดึอม กาแซณ เบ ดี เฌาพรา อี มูห เฌาพรา ปี กรึบ เบ, แตห เบ บอ โบง แคะ ตี. แตห เฆ ดูอี อาโมยว เฮา อี กอย กาตัด เบ ดึห ลักซอง, ตัห อาบ ดี อัน เฌา. โคว, เฌาพรา อี หมึอม โยว.

12 อัน เฌา บอ โบง แตห น็อห ปีคึก เฆ คูนดีคัม, วี อึณจัม โลง. แตห คูนดีคัม บอกาเฆลียด โรวเซ อัน เฌา.