1 แคง มืง มาอูด แฮะ ดึอม มึห ดูอี อู วี อี จืร อาโยวบา. อัน บอ มึห น็อห ซืร น็อห หมาน, อาว มึห อี ปึอน กาลาง นา ตู หมึอม ลอง อัน. อัน บอ โรวเซ เฌาพรา บอ วัห นา ตู หมึอม.

2 อัน มืร มึห ฆอน อีมาย บู วี, มึห ฆอน อีบึณ โอย วี.

3 อัน มึห บอ มาบู บู แหรณ โดว, มังปร็อง กาฮาต โอย แหรณ โดว, มามัก พัน มาย็อห ฆู บอ มาลา พัน มาย็อห โดว. อัน บอ มึห หมาย, มึห แดเจณ กืน กาเซา. ปาย ตี อัน บอ มูห ดา อี ครัม หลึอม อี เฮา อี กอย บลาก นา เลห ซีแง.

4 ฆอน อีมาย อาโยวบา ตึอน บอ อึง ดี โบง บลอย, ลาย เฮียง ดี กาง เฆ แบน วี แบน วี ดอ แฮะ ฌัม ซีแง โลว โบง วี เหมา วี อัน. เฆ แดะ บอ วา เฆ อี มูห ฆอน อีบึณ โอย วี ตึอน ตัห โฮม รึม โดบ เฆ.

5 ดอ แฮะ ฮอต ปวน ซีแง โบง เฆ บลอย ตี, อาโยวบา มืร หลู ดี เฌาพรา, แตห ฆอน อัน วี ซีงา บอด. ซีณ ซีณวัห เจว อัน มืร หลู ปี ดี หลู อี โดะ ดี เงา อาดา ฆอน อัน ดอน อี. อัน โบง ปาย ตี โกบ โยว อัน ฆอน อัน เฆ ตี แฮะ กาลูต ดี โบง หมาบ บอ แนนัะ เฌาพรา ดอ ตู โหลห ตู ทาง เฆ. อัน มืร โบง ปาย ตี เซเซ.

6 อาดา อู ซีแง เฆ อามู อามาด เฌาพรา แฮะ ตัห กาฌูะ ดี อาต เฌาพรา. บอ โบว กานัม อี จืร ซาตาน แฮะ ตัห กอย รึม โดบ เฆ.

7 เฌาพรา มืร ดีหมอด โบว กานัม ตี ต็อห, “แม ตัห นา เหมา?” โบว กานัม ตี วี ต็อห, “โอว ฮาว ฮาว ตัห ตัห, วีน ดีแล แลบ ดี ยอด แดง กาดาย นี ดอน โปละ.”

8 เฌาพรา วี ต็อห ดี อัน, “แม โหลห แดเจณ โอว อี จืร อาโยวบา ตึอน? แดง กาดาย นี อาว มึห อี ปี อัน คอ อู วี. อัน บอ มูห ดูอี ปี ตู ปึอน กาลาง อี เฮา นา ตู หมึอม ลอง อัน. อัน บอ มึห น็อห ซืร น็อห หมาน บอ นับ ดี โรวเซ เฌาพรา. อัน บอ มูห ดูอี อี วัห นา ตู หมึอม.”

9 โบว กานัม วี ต็อห ดี เฌาพรา, “เซ อาโยวบา ตู ปึอน อาฆยึร มาเซ, อัน ตู หงึย ดี บอ โรวเซ แม เฌาพรา.

10 แม เฌา ยี แฮะ แร แฮะ ฆ็อง อัน บอ เฆ ดูอี แคง อึณโฮม อัน บอ โกรวกราม อัน บอกาเฆลียด, แตห อึณ ปี แม แฮะ โล็ง โรบ อัน. แม เฌา มืร แฮะ ม็องการา ดัว ดี ฆาน ปี โบง อัน บอ โดว ซัดดาวา ปี เฮียง อัน, แตห อึณ มึห กืน กาเซา ดอน นา ดอน โปละ.

11 ดอ ตี นี, เซ แม จู ยอด แมน อัน บอ ดึห แวน แคะ มึห อัน โกรวกราม ตี, อัน ดี บอ ดืง บอ เอห ดอก นา แม เฌาพรา.”

12 เฌาพรา มืร วี ต็อห ดี โบว กานัม, “เซ อึณ ปาย ตี แตห แม ปยาต แวน โกรวกราม อัน ตี. มาแล, โดว โบ็ง อัน แกวะ แตห แม ปยาต.” แฮะ ฮอต, โบว กานัม บอ เลห ฮาว โดง กอย เฌาพรา ตึอน.

13 ปาย ตี อาดา อู ซีแง เฆ ฆอน อีมาย บอ ฆอน อีบึณ อาโยวบา ตึอน แฮะ งยา โฮม บลอย บอ เดียง อึม มางูน ดี กาง อีกัด ตาง เฆ.

14 แดเจณ อู วี บอ กาแบลบ ตัห โดง กอย อาโยวบา บอ กาลาง ดี อัน ต็อห, “เย แฮะ แท โดง นา ตา มามัก. มาลา เฆ ตึอน มืร แฮะ โฮม เปต โคบ โดง กอย เย ตี.

15 ดอ อัน ตี เฆ ดูอี แคง มืง ซาบา บอ ตัห โฌน เย. เฆ บอ เหมต ฮาว โดว เฆ ตี. เฆ แดเจณ แม มืร, เฆ แฮะ ฮอต ง็อห ยัม ดอน อี ตา มาปัวะ ลาง เฆ. มี โอว อู วี แฮะ ลอด. โอว บอ วี ตัห กาลาง ดี แม ดา กาณา โอว.”

16 ดอ ซีงยา กาลาง อัน ปาย ตี หณัม ดัน ฮอต, แดเจณ ปอ อู วี ปี วี ตัห กาลาง ดี อาโยวบา ต็อห, “เฌาพรา แฮะ แตห อึณ มึห เงา โจห โลง แคง เบลณ บอ กาซึม ยัม โตต มาบู บอ เฆ ดา อี เฮียง มาบู บอกาเฆลียด. มี โอว อู วี แฮะ ลอด. โอว บอ วี ตัห กาลาง ดี แม ดา กาณา โอว.”

17 ดอ ซีงยา กาลาง อัน ปาย ตี หณัม ดัน ฮอต, แดเจณ ปอ วี ปี วี ตัห กาลาง ดี อาโยวบา ต็อห, “เฆ ดูอี อาโมยว กาลาเด โอย พึง, เฆ แฮะ ตัห พาด ดึห ฮาว โตต มังปร็อง กาฮาต แม. เฆ แดเจณ แม มืร เฆ แฮะ ง็อห ยัม โตต, ตา มาปัวะ ลาง เฆ. มี โอว อู วี แฮะ ลอด. โอว บอ วี ตัห กาลาง ดี แม ดา กาณา โอว.”

18 ดอ ซีงยา กาลาง อัน ปาย ตี หณัม ดัน ฮอต, แดเจณ ปอ วี ปี วี ตัห กาลาง ดี อาโยวบา ต็อห, “เฆ ฆอน อีมาย แม บอ ฆอน อีบึณ แม, เฆ แฮะ โฮม เกยา บอ เดียง อึม มางูน ดี กาง อีกัด ตาง เฆ.

19 ดอ อัน ตี อึณ บอ มึห คูน ตาง ตัห นา แคง แปร กาฮ็อห บอ บูด แฮณ กาเซา พวน กาโตะ กาง เฆ. กาง ตี บอ ดีฆรับ ทีบ ยัม โตต ฆอน แม ตี. มี โอว อู วี แฮะ ลอด. โอว บอ วี ตัห กาลาง ดี แม ดา กาณา โอว.”

20 แฮะ ฮอต ปัน ตี อาโยวบา บอ ยีต, กายาต ครึง ตา อัน บอ ฆาะ แวน ฮึก ฆีณ อัน โกบ แฮะ ลึร กาเซา น็อห อัน. อัน วี มูด ฆึบ ดี กาดาย บอ กรึบ เฌาพรา.

21 อัน ต็อห, “ดอ ฆึอด ตัห โอว, โอว ฆึอด ตัห โดว ฆลัะ. ปัน ดี วี เลห ฮาว โอว มืร, โอว ปี ดี วี เลห ฮาว โดว ฆลัะ. เฌาพรา แฮะ ดัว ดี โอว, แปะ แฮะ วี ดึห วีว. โอว ยี ดี อืบ มยูก เฌาพรา เซเซ.”

22 ลอง ฌึร ตี ดอน โมยว, อาโยวบา ตู ลูต น็อห, ตู มึห ดี แน เฌาพรา มาเซ.