1 ปอ อู ซีแง เฆ อามู อามาด เฌาพรา วี ตัห กอย ดี อาต เฌาพรา ปอ อู เฌณ. โบว กานัม อี จืร ซาตาน ตึอน มืร ตัห โดบ เฆ, แตห บอ อัน กอย ดี อาต เฌาพรา.

2 เฌาพรา วี ดีหมอด โบว กานัม ตี ต็อห, “แม ตัห นา เหมา?” โบว กานัม วี ต็อห, “โอว ฮาว ฮาว ตัห ตัห, วีน ดีแล แลบ ดี ยอด แดง กาดาย นี ดอน โปละ.”

3 เฌาพรา วี ต็อห ดี อัน, “แม โหลห แดเจณ โอว อี จืร อาโยวบา ตึอน? แดง กาดาย นี อาว มึห คอ อู วี อี ปี อัน. อัน มูห ดูอี ปี ตู ปึอน กาลาง อี เฮา นา ตู หมึอม ลอง อัน. อัน บอ มูห ดูอี อี มึห น็อห ซืร น็อห หมาน บอ นับ ดี โรวเซ เฌาพรา. อัน บอ มูห ดูอี อี วัห นา ตู หมึอม. แม ปี บอ แฮะ กาซูห โอว, แตห โอว จัร แม ฮาว เทว ดี ปยาต อัน ดอ ตู มึห ดีโคว มืร, อาโยวบา ยี ซี โดบ ซีคยา โอว.”

4 โบว กานัม ตึอน วี กาลาง ดี เฌาพรา ต็อห, “อึณ บอ ปี โฆรห ปี ต็อห อี ตึอน, ‘ฮูน อาดา ฮูน.’ ดูอี ดอน อี บอ นับ ดี ดัว แคะ ปี มึห อัน, แตห อึณ กาดาง อาซาก อัน.

5 โคว, เซ แม เฌา ดัว อาเพ อาเร ดี โดว โบ็ง อัน, อัน ดี บอ ดืง บอ เอห ดอก นา แม อู เฌณ.”

6 เฌาพรา วี กาลาง ดี โบว กานัม ต็อห, “แตห แม โบง แคะ ปี ซี โบง แม. มาแล, แม แกวะ แตห อาซาก อัน ชึม.”

7 ปาย ตี โบว กานัม บอ เลห โดง กอย เฌาพรา. อัน บอ โบง แตห บึบ ดีม เลห ดี อาโยวบา บอ โดว, จูห ดี กาบา เปลา กอ ฌัม ดี ฆีณ อัน.

8 อาโยวบา บอ ฮาว ตูต แคง กาฟาง, วี ดึห โดณ กาโละ กาลาต, วี คูด วี ฆาะ ดีม อัน เฆ บึบ อัน ตี.

9 ดอ อัน ตี อีบึณ อัน วี ต็อห ดี อัน, “แม ซี ดี โดบ เฌาพรา ยึะ? แตห แม ดืง เฌาพรา บอ ยัม.”

10 อาโยวบา วี เวียะ โฆรห อัน ตี ต็อห, “แม นี, แม กาลาง โฆรห ปี อีบึณ อี แฮะ รึร. ดอ แฮะ ดัว เฌาพรา แตห เอ โบยว ดาคึย ฆยามซา, เอ แฮะ ดึห แฮะ รับ. ดอ วี ดัว อัน เฌา ดูก เฆ หณาบ, เอ ดี บอ วี ปึณ วี เอห ยึะ?” ลอง ฌึร ตี ดอน โมยว, อาโยวบา ตู แตห อัน กาลึบ โฆรห, กาลึบ โมต คอ อู แด.

11 อาโยวบา มึห ฆึก โอย วี. อึณ บอ มูห อาเอลีพาด อี มูห ดูอี มืง เทมาน, อาบีลาดัด อี มูห ดูอี มืง ซูฮีด บอ อาจอพัะ อี มูห ดูอี มืง เนมาด. ดอ ยึร เฆ ลอง อาโยวบา แฮะ คัม ดูก ตาง กาเซา ตี, เฆ บอ ต็อห ดี ตัห แล ตัห จัร อัน, แตห อึณ เหลา น็อห อัน.

12 เฆ บอ ยอด อาโยวบา ดอ ซี ราม กาโต็ง, เฆ อาว ฮู โนว อัน. ดอ วี นับ เฆ แฮะ มูห อัน, เฆ มืร ยาม ดัด อู เฌณ. เฆ มืร กายาต ครึง ตา เฆ. เฆ บอ ดึห กาปูห บรัด แดง ฆีณ เฆ.

13 เฆ แฮะ ฮอต โบง ปาย ตี เฆ มืร ตูต รึม โดบ อาโยวบา แดง กาดาย กอ โนะ บู ซีแง ดี บู หมึร. เฆ มืร อาว ฮู มึห อี ลาย โฆรห โกบ แฮะ ยึร เฆ ดูก ตาง ปี คัม อาโยวบา.