1 วาย อัน ตี อาโยวบา วี จูห ดี กาลาง โฆรห บอ ดืง บอ เอห ซีแง ดอ ฆึอด อัน.

2 อัน ต็อห,

3 “ซีแง ฆึอด ตัห โอว ตู หมึอม. ฆาม โอว มืร ตู บอด. หมึร ดอ แด โอว บาดีก ซันเท ดอ ต็อห เฆ, ‘แฮะ โบว แบน ฆอน อีมาย,’ อาว ดาคึย.

4 ซีแง ตี แตห อึณ อับ ว็อง โตต, แกวะ แตห เฌาพรา ซี โหลห มาเซ. บลาง เฆ กาตาน ซีแง, แกวะ แตห อึณ ซี มึห.

5 อี อับ ว็อง กาเซา บอ อี ยาบ มืง มารานัะ แตห อึณ วี พาด ดึห ซีแง ตี. แตห อึณอูะ ปลึก โตต อัน. ซีแง ตี แตห อึณ แบน ซีแง อี หมึอม โยว, หมึอม กาปึณ หลึอม ดอน ซีแง.

6 หมึร ตี, แตห อึณ อับ ว็อง ดีตีณ. แกวะ แตห อี ปึอน ดี ตีห ซีแง ตี แคง ซีนัม อัน บอ แคง มาเฆียน อัน.

7 แตห หมึร ตี เยน บอ ง็อง, แกวะ แตห อึณ มึห โหมว ดาคึย ลอง อัน.

8 แตห เฆ อี นับ ดี ร็อห ซีแง ร็อห ยาม บอ ดืง ซีแง ตี. เฆ อี นับ ดี บยีต ยีต มากราย, แตห บอ เฆ โบง ปาย ตี.

9 ซีมัณ อี บลาง ซีณวัห เจว, แกวะ แตห อึณ บลาง. แตห หมึร ตี บอ บัร ดีโลย ดีลาย ปีเยณ ปัน ดี บลาง.

10 โคว, หมึร ตี ตู แคร โอว ฆึอด. อัน ตู แร ตู ฆ็อง ดูก ตาง ตี ดี โอว.

11 เหมา อึณ ปาย ปี ตู ยัม โอว ซีณ ดอ ฆึอด ตัห โอว? เหมา อึณ ปาย ปี ตู ยัม โอว ดอ ฆึอด เลห โอว แคง วัต มา โอว?

12 เหมา อึณ ปาย ปี โจะ เงียะ มา โอว ดี โอว แดง บึม อัน? เหมา อึณ ปาย ปี แตห มา โอว โอว ปู ดี อัน?

13 เซ อาว ปาย ตี, โอว แฮะ ปึอน ดี อีด เยน ดาคึย ดอ ตี นี. โอว มืร แฮะ ปึอน ดี อีด ตู อึณ ซึห.

14 โอว มืร แฮะ ปึอน ดี อีด โดบ เฆ คูนดีคัม บอ เฆ อามู อามาด อี ดัว อากยาม อางยาน, เฆ อี แฮะ แด มืง อาดา โดว บรีม เฆ, อี แฮะ ลึร แฮะ ราม ดอ ตี นี.

15 เซ อาว ปาย ตี โอว แฮะ อีด โดบ เฆ ฆอน ดา ตาง อี แฮะ มึห ครีว, แฮะ อูน บอ รึอน กอ โนะ แคง กาง.

16 เซ อาว ปาย ตี เหมา อึณ ปาย ปี ตู ปี โอว ฆอน อี แฮะ อึณบรอต บอ ฆอน อี ตู ทวน? เหมา อึณ ปาย ปี ตู ปี โอว ฆอน อี ตู ปึอน ดี ยึร บลาง ซีแง?

17 โดง กอย เฆ ตี ดูอี ฮาย ดูอี มืก แฮะ ฮอต กอย หนีม. บอ เฆ อี แฮะ รัณ ฆาน, อี แฮะ นูน กาเซา เฆ แฮะ ปึอน ดี ดีเหลา ดาคึย.

18 เฆ ดูอี อี ดึอม กอย แคง กาปึม, เฆ แฮะ วี ปึอน ดี กอย โบยว ดาคึย ฆยามซา. เฆ มืร แฮะ ลอด ดี เฆ อี กาชัวะ กาโบยว เฆ.

19 เฆ อี มูห ดา ตาง อึบ มืง บอ เฆ อี มูห ดูอี เรา ดูอี กาง เฆ บอกาเฆลียด แฮะ ฮาว กอย โตต ดี ตี. เฆ อี ดึอม แบน หมาย อี มืร, เฆ แฮะ ฮอต เลห ตัะ ดา กาณา เฆ.

20 ดูอี อี กาดูห ดูก ตาง นี, เหมา อึณ ปาย ปี ซี แนะ ยึร อัน บลาง? ดูอี อี แฮะ มึห ดูก หณาบ ดี น็อห, เหมา อึณ ปาย ปี ซี แนะ มึห อัน อาซาก อีม?

21 วี อี แฮะ บัร อาคราว ดี ยัม อัน มืร, อาคราว ดี ยัม ตี ยี ตู อึง ดี ตัห, ตู อึง ดี ฌัม. อัน บอ เหรต อึณเตณ ดี ยัม อัน, หลึอม อี เหรต โกรว บอด ปี ดีบ อูน อี.

22 วี ตี ดี โบยว ดาคึย มี ดอ ตัห ฌัม อัน แคง กาเดา บาเรว ตี.

23 เหมา อึณ ปาย ปี โลว แตห อึณ บลาง ดี ดูอี อี ตู ปึอน ฮาว โดบ อึณเตณ บอ ดี ดูอี แปะ แฮะ แร แฮะ คร็อง อูน เฌาพรา?

24 หงูน เฆ กลึร แฮะ โบว แบน ดี โอว, แฮะ วี กาดาง ปี ดี โฮม โอว. ปี หงูน ปี ยาม โอว มืร แฮะ เลห เซเซ ปี อึม แหล.

25 ดูก ปี โยว กาเซา โอว, แฮะ วี โบว แบน ดี โอว. อาเพ อาเร ปี โยว ดียูห ดีเยณ โอว โอว แฮะ วี กาตูณ.

26 น็อห โอว มืร อาว ฮู นับ ดี หนีม ดี เยน ดอ เหมา. แฮะ มึห มี ดูก ดีโลย.”