1 อึณ มึห คูนดีคัม อู กาดัง อี จืร อาฮาเซรู. อัน อึบ มืง อู มาย็อห ดี อา ฆึร ดี บู มืง, จูห ดี มืง ฆูลา กอ ฌัม ดี มืง กูซา อี บอ จืร มืง เอทีโอบ. 2 อัน บอ กอย แคง โฮว อี กอย แคง มืง ซูซาน. 3 ดอ แบน อัน คูนดีคัม อาดา โอย ซีนัม อัน โบง บลอย, เฮียง เฆ อามู อามาด อัน บอ แดเจณ อัน. อัน บอ แดะ ดา โบว อี กอย แคง มืง เบนราซี บอ ดา โบว อี กอย แคง มืง แมตี บอ อามู อามาด อัน บอ ดา กาณา ปี เบลห อัน แคง มืง ดอน มืง, แตห เฆ บอกาเฆลียด ตัห โดง กอย อัน.

4 เฆ แฮะ ฮอต ตัห กาฌูะ โดง กอย อัน อาดา อู มาย็อห ดี ดา ฆึร ซีแง, อัน บอ บยัะ แคะ มึห อัน โกรวกราม อี ง็อห ตาง, อี บอด ดอน โมยว. อัน แตห เฆ ยึร แคะ มึห อัน อาพูง ดังโคว บอ แคะ ตาง ปวน อัน. 5 แฮะ ฮอต อู มาย็อห ดี ดา ฆึร ซีแง ตี, อัน ปี วี โบง บลอย เฮียง อี โฮม อาดา ปอ บู ซีแง. อัน เฮียง เฆ ดูอี กืน บอ อี เตียะ อี ตาง, แตห เฆ กอย แคง กาปึม โคบ โฮว อัน อี กอย ดี มืง ซูซาน ตึอน. 6 กาปึม โดง โบง อัน บลอย ตี, เฆ แฮะ ฮอย บีก กาตัม ลูย เฆ บีก อี เงียน. เฆ แฮะ ดึห บอ บีก อี ลูย อี เรณ แฆ, วี ปัก ฮอย ดี คัม รึอน อี ดึก ดี ร็อง มาว ลูย ตึอน. อึณ บอ มึห บอ กาโช็ง รึอน, กาโช็ง ครีว, อี ปึอน ตูต. เฆ แฮะ วี เบลห กาโช็ง ตี แดง บืน ปี ดัะ เฆ แซณ อี ดีพลัะ, อี เรณ, อี คอง, อี ลูย, อี ว็อง. 7 เฆ บอ เดียง อึม มางูน, ตา ซีลัยะ ครีว อี ตู มูห อู โมยว. คูนดีคัม แตห เฆ เดียง กืน กาเซา, แตห อึณ ลึห น็อห ฮาง อัน. 8 คูนดีคัม บอ ดัว อามีง, แตห เฆ ดอน อี เดียง แคะ อึง เฆ. คูนดีคัม แฮะ กาลาง อูน ดี เฆ อี ลึมลา แคต, แตห เฆ ดัว แตห แคต เดียง แคะ ซี เดียง เฆ ดอน อี.

9 อี มูห นาง ฮอคัม อี จืร นาง วาซาดี, อัน มืร โบง บลอย, เฮียง เฆ อีบึณ แคง โฮว คูนดีคัม อาฮาเซรู ตึอน.

10 อึณ แฮะ ฮอต ฌัม บู ซีแง, คูนดีคัม มืร แฮะ เดียง อึม มางูน, แตห น็อห อัน ดาคึย กาเซา. 11 ดอ อัน ตี อัน บอ แดะ เฆ อี มูห แดเจณ อัน บู วี อี มูห ดูอี ซัห, อี จืร อาฮูมาน, อาปีฌาซา, อาฮาบอนา, อาบีกาซา, อาบากาซา, อาเฌซา บอ อากากาด. อัน บอ จัร เฆ แตห เฆ กาลาง ดี นาง วาซาดี ตึอน, แตห อัน ชึบ มังฆึม อัน, ตัห โดง กอย คูนดีคัม. โกบ แฮะ ชีด กาเซา นาง ตี, คูนดีคัม ซี บยัะ แคะ ชีด อัน แตห เฆ อี เฮา บอ เฆ ดา กาณา แคง มืง ปี อึบ อัน บอ ปึอน ดี ยึร. 12 แดเจณ อัน แฮะ ฮอต กาลาง ดี นาง ฮอคัม ลอง ปี จัร คูนดีคัม, อัน วี แทณ โฆรห ตี. อัน มืร ตู ตัห. แฮะ ฮอต, น็อห คูนดีคัม อาว ฮู ดาคึย. อัน บอ รู กาเซา.

13 ปัน ตี คูนดีคัม บอ แดะ เฆ อี มึห อางยาน, อี นับ ดารา อี โดบ ทูงฆยาม เฆ คูนดีคัม. อัน บอ ซังคยาง ดี เฆ, เหมา เฆ ดี ปาย ดี ซูงพยาด. 14 เฆ อี ดัว อากยาม อางยาน ตี, เฆ จืร อากาเซนา, อาเซซา, อาดามาซา, อาทาซีด, อาแมรีด, อามาเซนา บอ อามามูคาน. เฆ บู วี ตี, เฆ มูห ดา กาณา อี อึบ มืง เบนราซี ฆาย มืง แมตี. เฆ กอย รึม โดบ คูนดีคัม เซเซ, มูห อี ตาง หลึอม อี เฮา แคง มืง อัน ตี.

15 คูนดีคัม อาฮาเซรู วี ต็อห ดี เฆ, “เซ เอ โดบ ดารา เอ นี, เหมา เอ ดี ปาย ดี ซูงพยาด อามู นาง ฮอคัม อี จืร นาง วาซาดี นี? โคว, โอว แฮะ จัร เฆ ฮาว กาลาง ดี อัน. อัน ยี ตู โทม โฆรห ปี กาลาง โอว ตี.”

16 อามามูคาน วี ต็อห ดี คูนดีคัม บอ ดี เฆ อามู อามาด ดอน อี, “นาง ฮอคัม วาซาดี นี อาว มูห อัน ลูต อี แม คูนดีคัม, อัน แฮะ ลูต ดา กาณา บอกาเฆลียด บอ ดูอี ดอน มาน ดอน มืง แคะ ปี อึบ แม คูนดีคัม. 17 เซ อีบึณ อี เฮา ฮี ยึร ลอง ปี โบง อัน ตี, บอ เฆ ดี ตู โรวเซ อีมาย เฆ. เฆ ดี ต็อห, ‘คูนดีคัม อาฮาเซรู แฮะ กาลาง ดี นาง ฮอคัม วาซาดี, แตห อัน ตัห กอย นา อาต อัน. นาง ยี ตู ตัห.’ 18 เฆ อีบึณ อี มูห ยา ตาง อี กอย แคง มืง เบนราซี ฆาย มืง แมตี, เฆ ฮี ยึร ปี โบง นาง ฮอคัม ตี, เฆ ดี วี โบง ปาย ตี ดี อีมาย เฆ อี มูห อามู อามาด คูนดีคัม บอ ดา กาณา อี อึบ มืง. อึณ ดี แบน ลาย รู กาเซา ดี เฆ.

19 เซ แม คูนดีคัม โพรม, แตห แม โบง อามีง แดม ฮับ แคง แปะ, แตห อึณ แบน ดารา แคง มืง เบนราซี ฆาย มืง แมตี. แตห อึณ ต็อห, นา อาต นี ฮาว นาง วาซาดี อาว ฮู ปึอน ดี ตัห โดง กอย คูนดีคัม อาฮาเซรู ดอ เหมา. ดารา ตี, อาว ปึอน กาปลูะ. แตห แม คูนดีคัม แวน อัน, แกวะ แตห อัน แบน นาง ฮอคัม. แม บอ วี ดึห อีบึณ อี หมึอม หลึอม อัน ตี, แตห อัน วี แบน นาง ฮอคัม. 20 เซ แม คูนดีคัม โบง ปาย ตี เซ อามีง ปี โบง แม ตี ฮี กาลัต ดอน นา ดอน โปละ, เฆ อีบึณ บอกาเฆลียด ดี วี โรวเซ อีมาย เฆ บอ เฆ อี เตียะ อี ตาง.”

21 โฆรห ปี กาลาง อามามูคาน ตี อึณ บอ ล็อะ น็อห คูนดีคัม บอ น็อห เฆ ดา กาณา ดอน อี. คูนดีคัม บอ โบง โดบ ปาย ตี.

22 อัน บอ แดม แปะ อามีง, แตห ดูอี ปึอน ดี ตีห, แตห อึณ โดบ โฆรห มืง เหมา มืง อัน. ดูอี อาโมยว เหมา มืร, ปึอน ดี ตีห โดว แปะ อัน. แปะ ตี อึณ ต็อห, อีมาย ดอน อี โลว อึบ อึณโฮม อัน.