1 ดอ อัน ตี เฆ ตีห บับ ดารา เฌาพรา ปี แดม อาโมวแซ ตึอน, แตห เฆ ดูอี กืน โทม. เฆ บอ ยึร อาดา อู โปละ อี กาลาง ลอง อาโมยว ดูอี อัมโมน บอ ดูอี อาโมยว โมวอาบ ตู ปึอน ลึบ แคง พึง ดูอี ปี อึบ เฌาพรา ดอ เหมา. 2 โคว, ดอ เลห เฆ ดูอี อีซาเรลัะ แคง มืง แอฆึบ ตึอน ดูอี อัมโมน บอ ดูอี โมวอาบ เฆ ตี ตู รวห, ตู ดัว ปี ดี โฮม ปี ดี เดียง ดี ดูอี อีซาเรลัะ. เฆ ยี วี ฌาง อาบาลาอัม, แตห อัน ดืง ดูอี อีซาเรลัะ. มาแล, เฌาพรา แฮะ วี บยอง โฆรห ดืง, โฆรห เอห ตี, แตห อึณ วี แบน โฆรห บอด, โฆรห ม็องการา. 3 ดอ ยึร เฆ ดูอี อีซาเรลัะ ปี ต็อห ดารา ตี, เฆ บอ แตห ดูอี อาโมยว เฮา บอกาเฆลียด กาย็อห เลห ดี ดูอี อีซาเรลัะ.

4 อาต นี ดา อี หลู ดี เฌาพรา อี จืร อาเอลาเซบ แฮะ แบน ดา อี อึบ โกรวกราม อี กอย แคง โฮว เฌาพรา. อัน ยี ลาย กาล็อะ ลาย ดึอม ดี อาตอพียา ตึอน. 5 อัน แฮะ อึณปราย แคง โฮง ตาง อี มูห โดง ดึอม อูน เฆ โกรว ปี หลู ดูอี ดี เฌาพรา. อึณ บอ มูห โหงว, อึณกรึห ซีนัม อูห หงูน บอ ครึง ตา แบน โมยว แบน โมยว ปี โลว ตา เฆ ดา อี หลู ดี เฌาพรา. บอ มูห ปี หลู อี มูห ฆึร บูน อู บูน, อี มูห บอ โหงว เฆ ดีฆาว บอ อึม มางูน บอ นามัน, อัน แฮะ ดึห เลห โตต. โกรว เฆ ตี บอ มูห ปี ดี ตา เฆ ดูอี ครึร อาเลวี, เฆ ดูอี อี ต็อห โหมว บอ เฆ ดูอี อี บัร โฮว เฌาพรา. อาเอลาเซบ แฮะ วี โบง แตห อึณ แบน โฮง กอย อาตอพียา.

6 ดอ โบง อัน ปาย ตี โอว ยี ตู กอย แคง มืง เยรูซาแลม. ดอ แฮะ อึบ คูนดีคัม อาตาเจรีด มืง บาแบ อาดา โอย ฆึร ดี อา ซีนัม, โอว แฮะ วี วีว โดง กอย คูนดีคัม. วาย แฮะ กอย โอว แบน ซีแง แบน ซีแง, 7 อัน มืร แฮะ ควาง แตห โอว วี เวณ ดี มืง เยรูซาแลม. ดอ ตัห ฌัม โอว, โอว บอ ยึร หมาบ แปะ แฮะ โบง อาเอลาเซบ อี แฮะ วี โบง วี อึณปราย โดง กอย อาตอพียา แคง แวง โฮว เฌาพรา ตึอน. 8 อึณ ตู ล็อะ น็อห โอว คอ อี แจก. โอว มืร ดึห โตต โกรวกราม อาตอพียา, แวน นา เรต โฮง ตี. 9 โอว มืร ดัว อามีง, แตห เฆ วี โบง แตห โฮง ตี วี ซีงา, แตห เฆ วี ดึห ตัห โกรว ปี ตา เฆ แคง โฮว เฌาพรา ตึอน. บอ โหงว แปะ แฮะ หลู อี บอ ซีนัม อูห หงูน ปี ดี โดะ เฆ แคง เงา, แตห เฆ วี ตัห อูน แคง โฮง ตี ปี บรีม.

10 โอว บอ วี นับ บอ ลอง เฆ ดูอี อี ต็อห โหมว บอ ลอง เฆ ดูอี ครึร อาเลวี อี โบง ฆาน แคง โฮว เฌาพรา, เฆ ตู ปึอน ปี ดี โฮม เฆ. โคว, เฆ แฮะ วี ฮาว กอย ดี มาน เฆ บอ ดี โดง นา เฆ, ราง อาเซ ราง อัน. 11 โอว มืร เอห เฆ ดา ตาง อี อึบ มืง. โอว ต็อห ดี เฆ, “เหมา อึณ ปาย ปี เบลห แวน เบ โฮว เฌาพรา?” โอว วี แดะ ตัห ดูอี ครึร อาเลวี บอ ดูอี อี ต็อห โหมว, วี แตห เฆ โบง ฆาน เฆ.

12 ปัน ตี เฆ ดูอี อายูดา บอ วี กาโพรม ดี หลู ปี ดี หลู ฆึร บูน อู บูน. บอ มูห โหงว ดีฆาว, บอ มูห อึม มางูน บอ นามัน, เฆ ตัห ฮับ โตต แคง โฮว เฌาพรา. 13 โอว บอ ดาง แตห อึณ มึห ดูอี อี ปา รึอน, แตห เฆ อึบ โกรวกราม แคง โฮว เฌาพรา ตี. อึณ มูห อาเซลามี อี มูห ดา อี หลู ดี เฌาพรา บอ อาฌาโดก อี มูห ดา จาเร บอ อาเบตายา อี มูห ดูอี ครึร อาเลวี. อาฮานัน อี มูห ฆอน อาฌากูรา อี มูห บอ หลาน อามาทานี บอ แบน อี จอย เฆ. เฆ มูห ดูอี อี มึห น็อห ซืร น็อห หมาน. เฆ บอ โลว กาย็อห กาซาง ปี ดี โฮม ดี บีนอง วอแว เฆ อี โบง รึม ฆาน แคง โฮว เฌาพรา.

14 อึย แม เฌาพรา อี มูห เฌาพรา ปี กรึบ โอว, โอว หมาณ, แตห แม เฌา โหลห โอว เซเซ. แกวะ แตห แม เฌา บยัด แวน ลอง นา หมึอม แปะ แฮะ โบง โอว เซเซ อาดา โฮว แม เฌาพรา บอ อาดา ฆาน ปี ดี โลว โบง อี แคง โฮว แม นี.

15 ดอ อัน ตี โอว วี ยึร เฆ ดูอี อายูดา มัง อี, เฆ วี กรีด เบล มางูน ดอ มูห ซีแง ดีเหลา. มัง อี เฆ บอ ดึห มาลา เฆ, ฮาว ดาง โหงว เฆ ดีฆาว, ดาง อึม มางูน บอ เบล มางูน เฆ เบล ดีปู บอ โกรวกราม เฆ แบน โมยว แบน โมยว. เฆ บอ วี ลึบ ตัห แคง มืง เยรูซาแลม ดอ มูห ซีแง ดีเหลา ตี. โอว มืร ดัม ซาดีก ดี เฆ, แกวะ แตห เฆ ย็อง มาเซ ดอ มูห ซีแง ดีเหลา. 16 เฆ ดูอี อี ตัห แคง มืง ทูโรว อี กอย แคง มืง เยรูซาแลม ตี, เฆ บอ นับ ดี ตัห ย็อง มาฆา, ย็อง โกรวกราม แบน โมยว แบน โมยว ดี เฆ ดูอี อาโมยว อายูดา ดอ มูห ซีแง ดีเหลา. 17 ดอ อัน ตี โอว วี เอห เฆ ดา ตาง อี อึบ ดูอี อายูดา. โอว ต็อห, “แตห เบ วี โหลห หมาบ แปะ แฮะ โบง เบ. เบ แฮะ โบง แตห ซีแง ดีเหลา อาว ฮู มูห ซีแง อี ซีงา บอด. 18 แปะ แฮะ โบง เบ ตี แฮะ ปี แปะ แฮะ โบง ฆูณ ดัง เบ. โคว, เฌาพรา แฮะ แตห เอ บอ มืง คัม ดูก ตี ดอ ตี นี. เบ มืร แฮะ วี ปยาต ซีแง ดีเหลา, โบง แตห เฌาพรา แว รู กาเซา ดี เอ ดูอี อีซาเรลัะ.”

19 โอว มืร จัร เฆ, แตห เฆ กาบีด โตต มาโลห มืง ดอ บา ดี อับ อาต จูห ซีแง ดีเหลา. เซ หณัม วี ฌัม วาย ซีแง ดีเหลา, เฆ ตู ปึอน วึห ดอ เหมา. โอว มืร จัร เฆ แดเจณ โอว มัง อี, แตห เฆ บัร มาโลห มืง ดอน โปละ, แกวะ แตห อึณ มึห อี ดึห ลึบ คอ อู โมยว แคง มืง ดอ มูห ซีแง ดีเหลา. 20 วาย อัน ตี เฆ ดูอี อี ย็อง โกรว แบน โมยว แบน โมยว, เฆ บอ วี โลว ตัม นา เรต มืง เยรูซาแลม อู เฌณ อา เฌณ. 21 โอว วี ดัม ซาดีก ดี เฆ ต็อห, “เหมา อึณ ปาย ปี ตัห ตัม เบ โคบ แรง มืง ปาย นี? วาย นี, เซ เบ วี โบง ปาย ตี โอว ดี เหมต เบ.” ซีณ ดอ อัน ตี เฆ มืร อาว ฮู ยัะ ตัห ซีแง ดีเหลา ดอ เหมา. 22 โอว มืร กาลาง ดี เฆ ดูอี ครึร อาเลวี, แตห เฆ โบง แตห โดว เฆ ซีงา บอด, แตห อึณ โดบ ปี ดัม ดารา เฆ โบง, แตห เฆ ตัห บัร มาโลห มืง, แตห ซีแง ดีเหลา วี แบน ซีแง อี ซีงา บอด.

อึย แม เฌาพรา, โอว หมาณ, แตห แม เฌา โหลห แปะ แฮะ โบง โอว นี. แตห แม เฌา กาเว โอว บอ คยอด โอว. โคว, น็อห ร็อก กาเว แม เฌา แฮะ ตาง กาเซา.

23 บาน ดอ อัน ตี โอว วี ยึร เฆ อีมาย ดูอี อายูดา อี แฮะ วี ดึห อีบึณ อี มูห ดูอี อาโมยว อาจูด, ดูอี อาโมยว อัมโมน บอ ดูอี อาโมยว โมวอาบ. 24 ฆอน เฆ อาดา อู กาแต, บอ วี นับ ดี กาลาง มี โฆรห อาจูด บอ โฆรห มา เฆ, อาว ฮู วี นับ ดี กาลาง โฆรห ดูอี อายูดา. 25 โอว ดัม หมาบ ดี อีมาย เฆ ตี. ดืง เอห เฆ บอ มัห เฆ, รึต ฮึก ฆีณ เฆ. โอว มืร แตห เฆ ดืง แตห เฌาพรา โทม. โอว มืร ต็อห, “เบ อาว ฮู ปึอน ดัว ฆอน ดีบยา เบ, แตห เฆ ดึห ดูอี อาโมยว เฮา. เบ มืร อาว ฮู ปึอน แตห ฆอน อีมาย เบ ดึห ดูอี อาโมยว เฮา ดอ เหมา. 26 อึณ มูห อีบึณ ดูอี อาโมยว เฮา เฆ ตี, เฆ แฮะ โบง แตห คูนดีคัม อาซาโลวโมว กาลึบ. อัน แฮะ มูห คูนดีคัม อี แฮะ ตาง หลึอม คูนดีคัม เฆ ดูอี อาโมยว เฮา. เฌาพรา มืร แฮะ ร็อก อัน บอ อึง ดี แตห อัน แบน คูนดีคัม อี อึบ ดูอี อีซาเรลัะ บอกาเฆลียด. ปี บอ แฮะ ปาย ตี มืร, อึณ ยี มูห อีบึณ ดูอี อาโมยว เฮา เฆ ตี อี แตห อัน กาลึบ. 27 ดอ ตี นี โอว ยี ยึร, บอ เบ บอกาเฆลียด แฮะ โบง อี ฮาย กาเซา ฌึร ตี. เบ แฮะ วัห เฌาพรา บอ ดึห อีบึณ ดูอี อาโมยว เฮา. อาว กาอาบ เบ โบง ปาย ตี.”

28 อึณ บอ มึห อายอยาตา อี มูห ฆอน ดา ตาง อี หลู ดี เฌาพรา อี จืร อาเอลาเซบ. ฆอน อายอยาตา ตี อู วี, อัน แบน เอียะ อาซันบาลาด อี มูห ดูอี อาโมยว เบดโฮวโรน ตึอน. โอว บอ โฮว เลห อัน แคง มืง เยรูซาแลม.

29 อึย แม เฌาพรา อี มูห เฌาพรา ปี กรึบ โอว, แตห แม เฌา โหลห แปะ แฮะ โบง เฆ ดูอี ตี. เฆ แฮะ โบง แตห ฆาน ปี โบง เฆ ดา อี หลู ดี เฌาพรา อาว ฮู หมึอม โรวเซ. บอ แปะ แฮะ กาแซณ เฌาพรา ดี เฆ ดา อี หลู ดี เฌาพรา, บอ เฆ ดูอี ครึร อาเลวี, เฆ อาว ฮู โรวเซ.

30 ปัน ตี โอว แตห เฆ ดูอี อี หลู ดี เฌาพรา บอ เฆ ดูอี ครึร อาเลวี วี กาย็อห ดี ดอน อี อี มูห ดูอี อาโมยว เฮา. แฮะ ฮอต, โอว วี แตห เฆ มึห ฆาน ปี โลว โบง เฆ, ราง อาเซ ราง อัน. 31 โอว บอ แรน โตต ดอน โมยว, แตห เฆ ดูอี ตัห หลู เบล ดัง, หลู เฮ ปี ดี โลว เฆ ดอ หลู เฆ ปี ดี หลู อี โดะ แคง เงา, แตห ดอน อี นับ อาคราว ดี โลว หลู อัน, แตห อึณ มึห เซเซ, แกวะ แตห อึณ ลูด ดอ เหมา.

อึย แม เฌาพรา ปี กรึบ โอว, แตห แม เฌา โหลห ลอง อัน ตี, แตห แม ม็องการา ดัว นา หมึอม ดี โอว.