1 เฆ ดา อี หลู ดี เฌาพรา บอ เฆ ดูอี ครึร อาเลวี อี แฮะ วี ตัห โดบ อาเฌรูบาเบน อี มูห ฆอน อาเซทีเอน บอ ดา ตาง อี หลู ดี เฌาพรา อี จืร อายอซู, เฆ บอ มูห อาเซรายา, อาเยเรมี, อาเอซารา,

2 อามารียา, อามาลูก, อาฮาดูด,

3 อาเซคานี, อาเรฮูม, อาเมเรมูด,

4 อาอีตอ, อาคีเนโซน, อาพียัะ,

5 อามียามีน, อามาตา, อาบีลาฆา,

6 อาเซมายา, อายอยารีม, อายีตายา,

7 อาซาลาอู, อามอก, อาฮีลาคี บอ อายีตายา. ดูอี เฆ ตี, เฆ มูห ดา ตาง แคง ดา อี หลู ดี เฌาพรา บอ แคง บีนอง วอแว เฆ ดอ มูห โจว บาน อายอซู ตึอน.

8 เฆ ดูอี ครึร อาเลวี บอ มูห อายอซู, อาบีนูอี, อากาตาเมลา, อาเซรัะพี, อายูดา บอ อามาดทานี. อามาทานี บอ บีนอง อัน มูห ดูอี อี แยต เฆ ดูอี อี ต็อห โหมว อี ดาง ฆูง เฆฌู ดี เฌาพรา. 9 อึณ บอ มูห บอ อาบากาปูกี ฆาย อาอูนี บอ บีนอง วอแว ฆาย. บอ เฆ บอ เฆ ดูอี อี ต็อห โหมว ดอ กรึบ เฆ เฌาพรา เฆ กอย ลาย กายอด.

10 อายอซู วี มึห ฆอน อี จืร อายออีคีม. อายออีคีม วี มึห ฆอน อี จืร อาเอลาเซบ. อาเอลาเซบ วี มึห ฆอน อี จืร อายอยาตา. 11 อายอยาตา วี มึห ฆอน อี จืร อาโยวนาทาน. อาโยวนาทาน วี มึห ฆอน อี จืร อายาดูอา.

12 ดอ แบน อายออีคีม ดา ตาง อี หลู ดี เฌาพรา, อึณ บอ มึห เฆ ดา อี หลู ดี เฌาพรา อี อึบ แคง อึณโฮม ฆูณ ดัง เฆ. อาเมรายา อึบ แคง อึณโฮม อาเซรายา, อาฮานานียา อึบ แคง อึณโฮม อาเยเรมี.

13 อาเมซูลัม อึบ แคง อึณโฮม อาเอซารา, อาเยโฮวนัน อึบ แคง อึณโฮม อามารียา.

14 อาโยวนาทาน อึบ แคง อึณโฮม อามาจีคู, อาโยว อึบ แคง อึณโฮม อาเซคานี,

15 อาอาดนา อึบ แคง อึณโฮม อาฮารีม, อาเฮลาเก อึบ แคง อึณโฮม อาเมรายูด.

16 อาซาคารา อึบ แคง อึณโฮม อาอีตอ, อาเมซูลัม อึบ แคง อึณโฮม อาคีเนโซน.

17 อาฌีคารี อึบ แคง อึณโฮม อาพียัะ, อาบีลาเด อึบ แคง อึณโฮม อามาตา บอ แคง อึณโฮม อามาดียา.

18 อาซามูอา อึบ แคง อึณโฮม อาบีลาฆา, อาโยวนาทาน อึบ แคง อึณโฮม อาเซมายา.

19 อามาตาเน อึบ แคง อึณโฮม อายอยารีม, อาออจี อึบ แคง อึณโฮม อายีตายา.

20 อากาเล อึบ แคง อึณโฮม อาซาลาอู, อาเอบา อึบ แคง อึณโฮม อามอก.

21 อาฮาซาบี อึบ แคง อึณโฮม อาฮีลาคี บอ อาเนทาเนลา อึบ แคง อึณโฮม อายีตายา.

22 อึณ บอ มึห เฆ ดูอี อี มูห ดา ตาง อี อึบ แคง อึณโฮม ครึร อาเลวี อี กอย ดอ มูห โจว บาน เฆ ดา อี หลู ดี เฌาพรา อี จืร อาเอลาเซบ, อายอยาตา, อายอฮานัน บอ อายาดูอา. จืร เฆ ตี, บอ จืร เฆ ดา อี หลู ดี เฌาพรา, เฆ แฮะ แดม อูน ดอ อึบ คูนดีคัม อาตารีด มืง บีราซี ตึอน. 23 อึณ บอ มึห เฆ ดา ตาง อี มูห ฆีณ อึณโฮม ครึร อาเลวี อี กอย ซีณ ดอ โฆว อัน, กอ วี ฌัม โจว บาน อายอฮานัน อี มูห ฆอน อาเอลาเซบ ตึอน. จืร เฆ ดูอี ตี, เฆ แฮะ แดม อูน แคง บับ ลอง เฆ คูนดีคัม แคง มืง อีซาเรลัะ. 24 เฆ อี มูห ดา ตาง ตี เฆ จืร อาฮาซาบี, อาเซราพี, อายอซู อี มูห ฆอน อากาตาเมลา บอ บีนอง วอแว เฆ. เฆ ดูอี ตี แฮะ กอย แบน พึง แบน พึง อี ลาย กายอด. เฆ โลว ต็อห โหมว อี อืบ เฌาพรา บอ ดาง ฆูง เฆฌู ดี อัน เฌา. เฆ ต็อห ลาย เวียะ ลาย เวียะ, แตห อึณ โดบ ปี ดึอม อูน คูนดีคัม อาดาวีด อี มูห ดูอี ปี อึบ เฌาพรา ตึอน.

25 เฆ อี บัร มาโลห โฮว เฌาพรา บอ มูห อามาทานี, อาบากาปูกี, อาออบาดี, อาเมซูลัม, อาตาลาโมน บอ อาเอโคบ. ดูอี เฆ ตี เฆ บอ บัร โฮง โดง อูน เฆ โกรวกราม อี กอย โคบ บาง มาโลห แคง โฮว เฌาพรา ตึอน. 26 เฆ แฮะ โบง ฆาน เฌาพรา ดอ มูห โจว บาน อายออีคีม อี มูห ฆอน อายอซู บอ หลาน อายอฌาดัก. อึณ มูห บอ โจว บาน ดา กาณา ตาง อี จืร อาเนฮามี บอ ดอ โจว บาน ดา อี หลู ดี เฌาพรา อี จืร อาเอซารา อี บอ มูห ดา จาเร.

27 ดอ ต็อห เฆ ดี หลู แรง มืง เยรูซาแลม ตึอน, เฆ บอ แดะ โตต แคะ กอย เฆ ดูอี ครึร อาเลวี ตึอน อี กอย ดอน โปละ ดอน นา, แตห เฆ ตัห กาฌูะ แคง บลอย ตี, แตห เฆ ต็อห โหมว บอ โชห แชณ, บัห ดีง, กรีด บอ ดีง ดีเรา, แตห เฆ อืบ เฌาพรา บอ ดาง ฆูง เฆฌู ดี อัน เฌา. 28 เฆ ดูอี อี ต็อห โหมว ตี แฮะ ตัห แคง เรา อี กอย นา เรต มืง เยรูซาแลม บอ แคง มืง เนตอพา. 29 เฆ บอ ตัห แคง เรา อี กอย กาตัด มืง เบดกีลัะฆา, มืง ฆีบา บอ แคง มืง อาฌามาวีด. เฆ มืร แฮะ ตัห กาฌูะ แคง บลอย ตี. เฆ ดูอี อี ต็อห โหมว ตี, เฆ แฮะ ดึอม แด เรา แด กาง อี กอย โรบ มืง เยรูซาแลม ตี. 30 ปัน ตี เฆ ดา อี หลู ดี เฌาพรา บอ เฆ ดูอี ครึร อาเลวี เฆ มืร โบง แตห เฆ ซีงา บอด โดบ ปี ดัม ดารา. เฆ โบง แตห บอ ดูอี กืน บอ มาโลห บอ แรง มืง ซีงา บอด ปาย ตี.

31 แฮะ ฮอต, โอว มืร แดะ เฆ อี มูห ดา ตาง อี อึบ เฆ ดูอี อายูดา, แตห เฆ โฮะ แดง แรง มืง ตึอน. โอว มืร กาย็อห เฆ ดูอี อี ต็อห โหมว แตห เฆ แบน อา พึง, แตห เฆ ต็อห โหมว อี อืบ เฌาพรา ดอ แลบ มืง. อาดา อู พึง, แตห เฆ ฮาว บลาก อาอัห, ฮาว โดบ แรง มืง, แตห เฆ กอ ฌัม ดี มาโลห อี จืร มาโลห เอียง มัก. 32 บอ อาโฮวซายา บอ เฆ ดา ตาง อี อึบ ดูอี อายูดา อาดา อู กาแต, เฆ บอ วี ฮาว โดบ ดี ปัน เฆ อี ต็อห โหมว ตี. 33 บอ เฆ ดา อี หลู ดี เฌาพรา ฮาว โดบ. อึณ บอ มูห อาฌารียา, อาเอซารา, อาเมซูลัม, 34 อายูดา, อาเบนยาม, อาเซมายา บอ อาเยเรมี. 35 อึณ บอ มึห ดา อี หลู ดี เฌาพรา มัง อี อี บูด เวา โดบ ดี ปัน เฆ. อี วี ฮาว ดาม เฆ ตี บอ มูห อาซาคารา อี มูห ฆอน อาโยวนาทาน. อัน มูห บอ หลาน อาเซมายา. อาเซมายา บอ มูห ฆอน อามาทานี. อามาดทานี บอ มูห ฆอน อามีฆายา. อามีฆายา บอ มูห ฆอน อาฌากูรา. อาฌากูรา บอ มูห ฆอน อาซาบ ตึอน. 36 วาย อัน ตี อึณ บอ วี มึห เฆ บีนอง อัน อี จืร อาเซมายา, อาจาเรน, อามีลาเล, อากีลาเล, อามาอีนา, อาเนทาเนลา, อายูดา บอ อาฮานานี. ดูอี เฆ ตี, เฆ บอ โฆ็ง อึณกรึห ปี ดึอม ต็อห อาดาวีด ดี ดอย ดี บัห. อาดาวีด บอ มูห ดูอี ปี อึบ เฌาพรา. อาเอซารา อี มูห ดา จาเร ตึอน อัน บอ แบน อี แยต ฮาว เฆ พึง ตี. 37 ดอ ฌัม เฆ โคบ มาโลห อี จืร มาโลห โตห อึม, เฆ ปี วี โฮะ ดี อึณแตง อี วี ฮาว ซืร ดี มืง อาดาวีด ตึอน. แฮะ ฮอต เฆ บอ กาโลห นา กัว กาง อาดาวีด ตี, บอ วี ฮาว โดบ แรง มืง วี ฮาว ฌัม ดี มาโลห อี จืร มาโลห อึม. มาโลห ตี กอย บลาก นา เลห ซีแง.

38 เฆ ดูอี อาดา ปอ อู พึง อี ต็อห โหมว ตึอน, เฆ บอ วี แลบ ฮาว แดง แรง มืง บลาก นา อาฆัะ. บอ โอว บอ เฆ ดูอี กืน อาดา อู กาแต, เย บอ วี ฮาว โดบ เฆ. เย บอ กาโลห โฮว จา โดง มึห กาฟาง เงา, วี ฮาว โดง กอย แรง มืง อี จืร แรง กาว็อห. 39 เย บอ กาโลห ดี ตี, วี ฮาว แดง มาโลห อี จืร มาโลห อาเอพารีม, มาโลห บรีม บอ มาโลห ฆา. บอ กาโลห โฮว จา อี จืร โฮว ฮานาเนลา บอ โฮว จา อี จืร อู มาย็อห. เย กอ วี ฮาว ฌัม บอ ดี มาโลห อี จืร มาโลห มาบู. เย บอ ฮาว ตืก ดี โคบ มาโลห อี มึห กาปึม.

40 วาย อัน ตี บอ อา พึง บอ เฆ พึง อี ต็อห โหมว ตึอน บอ โอว บอ เฆ ดา ตาง อาดา อู กาแต เย ตัห ฌัม โตต ดี ฆลัะ แคง แวง โฮว เฌาพรา. 41 แคง พึง โอว ตี อึณ วี มึห บอ เฆ ดา อี หลู ดี เฌาพรา อี บูด เวา. เฆ จืร อาเอยาคีม, อามาอาเซยา, อามีนียามีน, อามีฆายา, อาเอลีออเน, อาซาคารา บอ อาฮานานียา. 42 อึณ บอ วี มึห บอ อามาอาเซยา, อาเซมายา, อาเลอาซา, อาออจี, อาเยโฮวนัน, อามาลาคียา, อาเอลัม บอ อาเอเฌน. เฆ อี ต็อห โหมว ตึอน เฆ บอ ต็อห โดบ ดา ซารา เฆ อี จืร อาเยจาราฮี. 43 ซีแง ตี เฆ บอ หลู ปี ดี หลู กืน กาเซา. เฆ ดูอี กืน มืร โบยว โบยว เกยา เกยา โคว, เฌาพรา แฮะ แตห เฆ โบยว แตห เฆ เกยา. อีบึณ เฆ ฆอน เฆ มืร ตัห ลึบ บลอย อี แฮะ โบยว แฮะ ดาคึย ตี. ฮัม เฆ อี แฮะ โบยว แฮะ เกยา แคง มืง เยรูซาแลม ตี, อึณ กอ ลึห ฮาว โต็ง กาเซา.

44 ดอ อัน ตี เฆ บอ ดาง แตห อึณ มึห ดา อี อี อึบ โฮง โดง อูน เฆ โกรวกราม ปี หลู เฆ แคง โฮว เฌาพรา. อึณ มูห ปี หลู แบน โมยว แบน โมยว บอ ปี หลู เบล ดัง บอ ปี หลู ฆึร บูน อู บูน. ดูอี เฆ ตี บอ แบน อี แฆบ อูน ปี โลว ตัห ฮับ เฆ ดูอี เรา ดูอี กาง, แตห อึณ แบน ปี ดี โฮม เฆ ดา อี หลู ดี เฌาพรา บอ เฆ ดูอี ครึร อาเลวี, แตห อึณ โดบ ปี ดัม อูน ดารา ดี เฆ. เฆ ดูอี อายูดา มืร แฮะ โบยว ดาคึย บอ อึง ปี โบง เฆ ดา อี หลู ดี เฌาพรา บอ เฆ ดูอี ครึร อาเลวี เฆ ตึอน. 45 เฆ แฮะ คัม ดี โบง ฆาน เฌาพรา, แฮะ โบง แตห บอ โดว เฆ ซีงา, แตห อึณ โดบ ปี ดัม ดารา. บอ เฆ อี ต็อห โหมว แคง โฮว เฌาพรา บอ เฆ อี บัร โฮว เฌาพรา, เฆ มืร โบง โดบ แคะ ปี ดัม อูน คูนดีคัม อาดาวีด ฆาย ฆอน อัน อี จืร อาซาโลวโมว ตึอน. 46 ซีณ ดอ มูห โจว บาน คูนดีคัม อาดาวีด บอ โจว บาน ดา ซารา อี นับ โหมว, อี จืร อาซาบ ตึอน, อึณ แฮะ มึห ดูอี อี แยต เฆ ดูอี ต็อห โหมว. เฆ ต็อห โหมว อี อืบ เฌาพรา บอ โหมว อี ดาง ฆูง เฆฌู ดี อัน เฌา. 47 ปาย ตี ดอ มูห โจว บาน อาเฌรูบาเบน ฆาย อาเนฮามี มืร, เฆ ดูอี อีซาเรลัะ บอกาเฆลียด, เฆ บอ หลู ดัว ดี เฆ ดูอี อี ต็อห โหมว บอ ดี เฆ ดูอี อี บัร โฮว เฌาพรา. เฆ บอ ดัว แคะ ปี โลว เฆ ดอน ซีแง ดอน ซีแง. เฆ ดูอี กืน แฮะ ฮอต หลู ปี ดี หลู เฆ ดี ดูอี ครึร อาเลวี, เฆ ดูอี ครึร อาเลวี บอ วี กาย็อห ดัว ดี เฆ ดา อี หลู ดี เฌาพรา อี มูห หลูกหลาน อาโรน แคะ แตห เฆ มึห แคะ ปี โลว เฆ.