1 เฆ อี มูห ดา ตาง อี อึบ อี แยต เฆ ดูอี อีซาเรลัะ เฆ บอ ฮาว กอย แคง มืง เยรูซาแลม. เฆ บอ กาตาม แตห เฆ ดูอี กืน ฆึร อึณโฮม อู อึณโฮม ฮาว กอย แคง มืง เยรูซาแลม อี มูห มืง อี ซีงา บอด. เฆ อี ซี ฆีด ตึอน, เฆ บอ วี ฮาว กอย แคง เรา แคง มืง อี มูห โดง บรีม เฆ. 2 แคะ กอย เฆ ดูอี กืน บอ กาโพรม ดี อืบ เฆ ดูอี อี มึห น็อห ซี กอย แคง มืง เยรูซาแลม ตึอน.

3 ฌาราง เฆ ดูอี อี แฮะ ฮาว กอย แคง เรา แคง มืง อี กอย แคง กาดาย มืง ยูดา อึณ ปาย นี. อึณ มูห ดา อี หลู ดี เฌาพรา, ดูอี แคง ครึร อาเลวี, ดูอี อี โบง ฆาน แคง โฮว เฌาพรา บอ หลูกหลาน เฆ อี แฮะ ดึอม แบน หมาย คูนดีคัม อาซาโลวโมว ตึอน. เฆ บอ กอย แดง กาดาย เฆ, ราง อาเซ ราง อัน. 4 เฆ อี ยี ตัห กอย แคง มืง เยรูซาแลม บอ มูห ดูอี แคง ครึร อายูดา บอ แคง ครึร อาเบนยาม. เฆ ดูอี อี อึบ แคง ครึร อายูดา อี แฮะ ตัห กอย แคง มืง เยรูซาแลม, อึณ มูห อาทายา อี มูห ฆอน อาอูฌียา. อัน บอ มูห หลาน อาซาคารา. อาซาคารา บอ มูห ฆอน อามารียา. อามารียา วี มูห ฆอน อาเซพาดี. อาเซพาดี วี มูห ฆอน อามาฮาลาเลน. อามาฮาลาเลน บอ มูห ฆอน อาเพเรด. 5 อึณ มูห บอ อามาอาเซยา อี มูห ฆอน อาบารัก. อัน บอ มูห หลาน อากอลาฮาจา. อากอลาฮาจา บอ มูห ฆอน อาฮาจายา. อาฮาจายา บอ มูห ฆอน อาตายา. อาตายา บอ มูห ฆอน อายอยารีม. อายอยารีม บอ มูห ฆอน อาซาคารา. อาซาคารา บอ มูห ฆอน อาเซลา. 6 อึณ บอ มูห บอ เฆ หลูกหลาน อาเพเรด อี กอย แคง มืง เยรูซาแลม ตี. เฆ อีมาย กอย พวน มาย็อห ดี เดา ฆึร ดี ดา วี. เฆ บอกาเฆลียด แฮะ แบน ดา ซึก.

7 เฆ หลูกหลาน อาเบนยาม บอ มูห อาซาลาอู อี มูห ฆอน อาเมซูลัม บอ หลาน อายอตัะ. อายอตัะ บอ มูห ฆอน อาเบตายา. อาเบตายา บอ มูห ฆอน อากอลายา. อากอลายา บอ มูห ฆอน อามาอาเซยา. อามาอาเซยา บอ มูห ฆอน อายาแก. อายาแก บอ มูห ฆอน อาเยซายา. 8 อึณ บอ มูห บอ อากาเบ บอ อาซาลาย อี มูห บีนอง อี โดบ อาซาลาอู อี กอย แคง มืง เยรูซาแลม ตึอน. เฆ บอกาเฆลียด กอย ดีม มาย็อห ดี อา ฆึร ดี ดา วี. 9 อึณ บอ มูห บอ อาโยวเอลัะ อี มูห ฆอน อาฌีคารี, อี แฮะ แบน ดา ตาง อี อึบ เฆ. บอ อายูดา อี มูห ฆอน อาฮาเซโนว. อัน แฮะ แบน ดา อี ดาม อาโยวเอลัะ อึบ มืง ตี.

10 เฆ ดา อี หลู ดี เฌาพรา อี กอย แคง มืง เยรูซาแลม บอ มูห อายีตายา บอ ฆอน อายอยารีม อู วี บอ อายาคีน, 11 อาเซรายา อี มูห ฆอน อาฮีลาคี, อี มูห บอ หลาน อาเมซูลัม. อาเมซูลัม บอ มูห ฆอน อาฌาโดก. อาฌาโดก บอ มูห ฆอน อามารายูด. อามารายูด บอ มูห ฆอน อาฮีโตบ อี แฮะ แบน ดา ตาง อี อึบ แคง โฮว เฌาพรา. 12 อึณ มึห บอ เฆ บีนอง เฆ ดูอี ตี อี โบง ฆาน แคง โฮว เฌาพรา. อี มูห ดา ซึก, เฆ บอกาเฆลียด กอย ดา มาย็อห ดี อา ฆึร ดี อา วี. อึณ มูห บอ อาตายา อี มูห ฆอน อาเยโรวฮัม. อาเยโรวฮัม บอ มูห ฆอน อาเบลาลียา. อาเบลาลียา บอ มูห ฆอน อาอัมฌี. อาอัมฌี บอ มูห ฆอน อาซาคารา. อาซาคารา บอ มูห ฆอน อาบาซูรา. อาบาซูรา บอ มูห ฆอน อามาลาคียา. 13 อึณ บอ มูห บอ บีนอง อาตายัะ อี มูห ฆีณ อึณโฮม, เฆ บอกาเฆลียด กอย อา มาย็อห ดี พวน ฆึร ดี อา วี. อึณ บอ มูห อามาซา อี มูห ฆอน อาจาเรลา. อาจาเรลา บอ มูห ฆอน อาฮาเซ. อาฮาเซ บอ มูห ฆอน อาเมซีลามูด. อาเมซีลามูด บอ มูห ฆอน อาอีเมรา. 14 อึณ มูห บอ อีกัด บอ วา อามาซา อี แฮะ แบน ดา ซึก อี มึห โปลม ตาง. เฆ บอกาเฆลียด กอย อู มาย็อห ดี อา ฆึร ดี ดา วี. อาจาบาเดลัะ อี มูห ฆอน อาฮากาตอลีม บอ แบน ดา ตาง อี อึบ เฆ.

15 เฆ ดูอี แคง ครึร อาเลวี อี กอย แคง มืง เยรูซาแลม บอ มูห อาเซมายา อี มูห ฆอน อาฮาซูบ. อาฮาซูบ บอ มูห ฆอน อาฌารีกัม. อาฌารีกัม บอ มูห ฆอน อาฮาซาบี. อาฮาซาบี บอ มูห ฆอน อาบูนี. 16 อึณ ปี วี มึห บอ อาซาปาเซ บอ อายอจาบาด อี แบน ดา ตาง แคง ครึร อาเลวี. เฆ โบง ฆาน นา เรต โฮว เฌาพรา. 17 อึณ บอ มูห บอ อามาทานี อี มูห ฆอน อามีฆา บอ มูห หลาน อาฌาบาดี. อาจาบาดี บอ มูห ฆอน อาซาบ. อาซาบ ตี มูห ดูอี อี แยต เฆ ดา อี อี ต็อห โหมว, แยต บอ ดอ ซาคึร เฆ บอ ดาง ฆูง เฆฌู ดี เฌาพรา. อึณ บอ มูห อาบากาปูกี อี มูห ดา อี ดาม อามาทานี แคง พึง บีนอง อัน. อึณ บอ มูห อาบาตัะ อี มูห ฆอน อาซามูอา. อัน บอ มูห หลาน อากาลาน. อากาลาน บอ มูห ฆอน อาเยดูทูน. 18 เฆ ดูอี แคง ครึร อาเลวี บอกาเฆลียด กอย อา มาย็อห ดี ดา ฆึร ดี พวน วี. บอ เฆ บอกาเฆลียด กอย แคง มืง เยรูซาแลม.

19 อึณ บอ มูห บอ อาเอโคบ บอ อาตาลาโมน บอ เฆ บีนอง วอแว อัน, เฆ กอย อู มาย็อห ดี บู ฆึร ดี อา วี. เฆ มูห ดูอี อี บัร มาโลห มืง.

20 เฆ อี เฮา อี มูห ดูอี อีซาเรลัะ บอ ดา อี หลู ดี เฌาพรา บอ ดูอี ครึร อาเลวี, เฆ บอ กอย แคง กาดาย ดูอี อายูดา ดอน นา ดอน โปละ อี มูห คาฆูน แปะ แฮะ อาบ ฆูณ ดัง เฆ ดี เฆ.

21 เฆ ดูอี อี โบง ฆาน แคง โฮว เฌาพรา, เฆ บอ กอย โดง อี จืร ออพีลา. บอ อาฌีฮา บอ อาฆีซาบา, ฆาย บอ แบน ดา ตาง อี อึบ เฆ.

22 ดา ตาง อี อึบ ดูอี ครึร อาเลวี อี กอย แคง มืง เยรูซาแลม บอ มูห อาออจี อี มูห ฆอน อาบานี. อัน บอ มูห หลาน อาฮาซาบี. อาฮาซาบี บอ มูห ฆอน อามาทานี. อามาทานี บอ มูห ฆอน อามีฆา. อาออจี ตี บอ มูห หลูกหลาน อาซาบ อู วี. เฆ ดูอี ตี บอ แบน ดา อี ต็อห โหมว ดอ กรึบ เฆ เฌาพรา แคง โฮว เฌาพรา. 23 คูนดีคัม แฮะ ดึอม ดัว อามีง ลอง เฆ ดา อี ต็อห โหมว ตี, แตห เฆ นับ ปี โลว โบง เฆ ดอน ซีแง ดอน ซีแง.

24 อึณ บอ มูห อาเบซาฮี อี มูห ฆอน อาเมจาเบน. อัน มูห หลูกหลาน อาเฌนรา แคง ครึร อายูดา. อัน บอ แบน ดา อี จอย คูนดีคัม ลอง อาเร เฆ ดูอี อีซาเรลัะ ดอน โมยว.

25 เฆ ดูอี กืน อี กอย แคง เรา แคง มืง อี กอย เครียะ มาน เฆ โดง นา เฆ บอ มูห ดูอี อายูดา มัง อี, เฆ บอ กอย แคง มืง กีรียาดอาบา, บอ แคง มืง ดีโพน, แคง มืง เยกาดเอลา บอ แคง เรา อี กอย นา เรต มืง เฆ ตี. 26 มัง อี เฆ บอ ฮาว กอย บอ แคง มืง ยอซู, มืง มอลาดา, มืง เบดเบลีด, 27 มืง ฮาฌาซูอาน, มืง บีราเซบา บอ แคง เรา อี กอย โคบ มืง เฆ ตี. 28 มัง อี กอย บอ แคง มืง ฌีกาลาด บอ แคง มืง เมกอนา บอ แคง เรา อี กอย นา เรต มืง เฆ ตี. 29 เฆ กอย บอ แคง มืง เอนรีมโมน, แคง มืง โฌวรา, มืง ยาโมด, 30 บอ แคง มืง จานอ, มืง อาตูลัม บอ แคง เรา อี กอย นา เรต มืง เฆ ตี. เฆ กอย บอ แคง มืง ลาคีด บอ แคง โดง นา อี กอย กาตัด มืง ตี. เฆ กอย บอ แคง มืง อาเจกา บอ แคง เรา นา เรต มืง ตี. โดง กอย เฆ ดูอี อายูดา ตี, อึณ จูห ดี มืง บีราเซบา กอ วี ฌัม ดี ดีลัยะ ฮีนนูม.

31 เฆ ดูอี อาเบนยาม บอ กอย แคง มืง ฆีบา, มืง มีกมาด, มืง อายา บอ มืง เบดาเอน บอ แคง เรา นา เรต มืง เฆ ตี. 32 เฆ กอย บอ แคง มืง อานาโทด, มืง โนวบัะ, มืง อายา, 33 มืง ฮาจอ, มืง รามา, มืง กีดดีม, 34 มืง ฮาดีด, มืง เจโบวยีม, มืง เนปาลาด. 35 เฆ กอย บอ แคง มืง ลอตา เฆ มืง ออนอ บอ แคง ดีลัยะ อี จืร โดง กอย ลักซามา.

36 เฆ ดูอี แคง ครึร อาเลวี มัง อี อี แฮะ กอย กาแต เฆ ดูอี อายูดา บอ วี ฮาว กอย กาแต เฆ ดูอี อาเบนยาม.