เฆ อี ดอก ฌึม ดี แปะ ตี, อึณ บอ มูห ดา กาณา ตาง อาเนฮามี อี มูห ฆอน อาฮาคี บอ อาเฌเดกี,

2 อาเซรายา, อาจารีบายา บอ อาเยเรมี,

3 อาบาซูรา, อามารียา บอ อามาลาคียา,

4 อาฮาดูด, อาเซบานี บอ อามาลูก,

5 อาฮารีม, อาเมเรมูด บอ อาออบาดี,

6 อาดาเนลัะ, อาฆีเนโซน บอ อาบารัก,

7 อาเมซูลัม, อาพียัะ บอ อามียามีน,

8 อามาจีพียา, อาบีลาฆา บอ อาเซมายา. เฆ บอกาเฆลียด มูห ดา อี หลู ดี เฌาพรา.

9 บอ เฆ ดูอี ครึร อาเลวี, เฆ อี ฮับ จืร เฆ. อึณ มูห อายอซู อี มูห ฆอน อาจานี, อาบีนูอี อี มูห ฆอน อาเฮนาตัะ อู วี บอ อากาตาเมลา

10 บอ เฆ บีนอง วอแว เฆ ตี อี มูห อาเซบานี, อาโฮวคียา, อาเฆลีตา, อาเบลายา บอ อาฮานัน,

11 อามีฆา, อาเรโฮบ บอ อาฮาซาบี,

12 อาฌากูรา, อาเซราพี บอ อาเซบานี,

13 อาโฮวคียา, อาบานี บอ อาเบนีนู.

14 เฆ อี มูห ดา ตาง อี แยต เฆ ดูอี กืน, อึณ บอ มูห อาบาโรด, อาบาฮาดโมวอาบ, อาเอลัม, อาจาตูะ บอ อาบานี,

15 อาปูนานี, อาฌากาด บอ อาเบเบ,

16 อาตอนียา, อาบีฆาวี บอ อาตีน,

17 อาตัะ, อาเฮจัะกียา บอ อาเอฌูรา,

18 อาโฮวคียา, อาฮาโซม บอ อาเบฌา,

19 อารีม, อานาโทด บอ อาเนเบ,

20 อามากาบยาซา, อาเมซูลัม บอ อาเฮฌีรา,

21 อาเมจาเบน, อาฌาโดก บอ อายาดูอา,

22 อาเบลาทียา, อาฮานัน บอ อานายา,

23 อาโฮวเซ, อาฮานานียา บอ อาฮาโซบ,

24 อาฮาลอ, อาบีลาฮาน บอ อาซอเบก,

25 อาเรฮูม, อาฮาซาบานา บอ อามาอาเซยา,

26 อาฮียา, อาฮานัน บอ อานัน,

27 อามาลูก, อาฮารีม บอ อาบานา. ดูอี เฆ ตี ดอน อี แฮะ ฮับ จืร เฆ ดี แปะ ตึอน ดอ ดอก เฆ ฌึม.

28 แคะ กอย เย อี มูห ดูอี อีซาเรลัะ บอกาเฆลียด, บอ มูห ดา อี หลู ดี เฌาพรา, บอ มูห ดูอี แคง ครึร อาเลวี, ดูอี อี บัร โฮว เฌาพรา, ดูอี อี ต็อห โหมว บอ ดูอี อี โบง ฆาน แคง โฮว เฌาพรา, เย บอกาเฆลียด แฮะ กาย็อห ดี อาโมยว ดูอี เฮา อี กอย โคบ เย โกบ โดบ เย ดารา เฌาพรา บอ เย บอ อีบึณ เย บอ ฆอน เย อี แฮะ นับ ดี โทม, อี แฮะ มึห อางยาน 29 บอ เฆ อามู อามาด เย, เย บอกาเฆลียด วี ดืง บอ กาแซณ ลอง ดี คัม เย ดี โบง โดบ ดารา เฌาพรา. อึณ มูห ดารา แปะ แฮะ อาบ ดัว อัน เฌา ดี อาโมวแซ ตึอน อี มูห แดเจณ อัน เฌา. เย ลาย กาแซณ แตห เย คัม ดี โทม โดบ ดารา เฌาพรา อี มูห เฌาพรา ปี กรึบ เย. อึณ บอ มูห ดารา แบน โมยว แบน โมยว บอ อามีง อัน บอ ปี ดัม เฌาพรา เย โบง, เย แฮะ คัม ดี โดบ. เย มืร ดืง แตห เฌาพรา ดัม กาเซา หมาบ ดี เย เซ เย ฮี หลึร ฮี บลืง.

30 เย มืร คัม กาดีก ซัดฌา ลอง อัน ตี, อาว ปึอน แตห ฆอน อีบึณ เย คัด ดึห ดูอี อาโมยว เฮา. บอ ฆอน อีมาย เย, อาว ฮู ปึอน แตห เฆ คัด ดึห ฆอน อีบึณ ดูอี อาโมยว เฮา อี กอย กาแต เย นี.

31 เซ ดูอี อาโมยว เฮา บอ ตัห ย็อง โดว ซัดดาวา บอ โกรวกราม บอ ปี ดี โฮม ดี ฮาบ ดอ มูห ซีแง บอด, ซีแง ดีเหลา, เย ตู ปึอน จึห, อาว ปึอน ลาย การ็อห ลาย กาปลูะ ดี เฆ. บอ เซ ฮี ฌัม ซีนัม อึณบู ดอน เฌณ, เย ตู ปึอน โบง มาน เฆ โดง นา. นี ปี ทูก อี เฮา ดี เย มืร, เย โลว ควาง ดี เฆ, อาว ปึอน ดึห.

32 ดอน ซีนัม ดอน ซีนัม, เย ดอน อี โลว หลู รึอน เซเคน โอย บูน อู บูน. แตห อึณ แบน ปี ดี จัร แคง โฮว เฌาพรา. 33 เย โลว หลู บอ อาดา ปี ดี กรึบ เย เฌาพรา แคง โฮว เฌาพรา. อึณ บอ มูห คามูน ปี โลว เบลห เย แดง กาโช็ง บอ โหงว ดีฆาว ปี โลว หลู ดอน ซีแง ดอน ซีแง บอ โดว ปี ดี หลู อี โดะ ดี เงา บอ ปี ดี หลู ดอ มูห ซีแง ดีเหลา, ซีแง ลืนลับ บอ ดอ โบง เย บลอย อาโมยว เฮา, บอ ปี ดี หลู อี ฆ็อห แวน หมาบ บอ อึณกรึห ปี ดี ตา อี ซีงา บอด แคง โฮว เฌาพรา, เย แฮะ กาแซณ ดี หลู โตต ดอน โมยว.

34 เย บอกาเฆลียด, บอ มูห ดา อี หลู ดี เฌาพรา, บอ มูห ดูอี แคง ครึร อาเลวี, บอ มูห ดูอี เรา ดูอี กาง, เย กาตาม, แตห เย นับ, อึณ ดี โจห อึณโฮม เหมา อี โลว หลู เฮ ดี กาโช็ง หลู อี มูห โดง ดี โดะ เย ปี ดี หลู ดี เฌาพรา อี มูห เฌาพรา ปี กรึบ เย, แตห อึณ บอ โดบ ปี ดัม อูน อัน เฌา. เฆ บอ โลว หลู เฮ ตี อู ซีนัม อู เฌณ, อาคราว อาเซ อาคราว อัน.

35 ดอน ซีนัม เย กาแซณ ดี บอ ดึห กาโย็ง โหงว ปี โซะ เย ดี อาต, ดึห บอ เบล ปี ปีด ปี ซัม เย อี มูห เบล ดัง อี ซีน ดี เฮ อัน, วี หลู โกรว ตี แคง โฮว เฌาพรา.

36 เย ดี ดึห ฆอน อีมาย เย อี มูห ฆอน ฆีณ, ตึย เฆ ตัห โดง กอย เฆ ดา อี หลู ดี เฌาพรา แคง โฮว เฌาพรา, หลู เฆ ดี เฌาพรา, แตห อึณ โดบ ปี ดัม อูน ดารา. เย ดี บอ หลู บอ มัก, มาบู บอ มาแป อี มูห โดว ฆอน ฆีณ ดอน โดว.

37 เย ดี บอ ดึห บอ กาแปะ คามูน อี มูห ดีฆาว ปี โซะ เย ดี อาต, วี หลู. เย ดี บอ หลู บอ ปี ดี หลู อาโมยว เฮา อี มูห อึม มางูน, นามัน บอ เบล ปี ปีด ปี ซัม เย ดอน โมยว. เย ดี บอ หลู ฌึร ตี ดี เฆ ดา อี หลู ดี เฌาพรา แคง โฮว เฌาพรา. เย ดี บอ ดึห บอ โหงว เฆ ดีฆาว ฆึร บูน อู บูน, วี หลู ดี เฆ ดูอี ครึร อาเลวี. โคว, อึณ มูห เฆ อี แฆบ อูน ฆึร บูน อู บูน ดี เย ดูอี ดอน อี อี รัณ มาน เฆ โดง นา แคง เรา แคง มืง เย นี. 38 ดา อี หลู ดี เฌาพรา อี มูห หลูกหลาน อาโรน ตึอน, อู วี โลว กอย โดบ เฆ ดูอี ครึร อาเลวี ดอ แฆบ เฆ ฆึร บูน อู บูน ตี. แคง ฆึร บูน อู บูน แปะ แฮะ แฆบ ตัห เฆ ตี, เฆ ดูอี อาเลวี ปี วี โลว ดึห เลห ฆึร บูน อู บูน, วี ฮาว อูน แคง โฮว เฌาพรา. 39 เฆ ดูอี อีซาเรลัะ บอ ดูอี ครึร อาเลวี, เฆ ดี หลู ปี ดี หลู เฆ, บอ มูห โหงว, ดีฆาว, อึม มางูน บอ นามัน, ฮับ อูน โตต ฌึร ตี แคง โฮง โดง อูน เฆ โกรวกราม ปี ดี ตา เฆ แคง โฮว เฌาพรา อี มูห โดง กอย เฆ ดา อี หลู ดี เฌาพรา. เฆ โลว อูน โกรวกราม ตี บอ ดี โดง กอย เฆ ดูอี อี โบง ฆาน แคง โฮว เฌาพรา บอ ดี โดง กอย ดูอี อี บัร มาโลห แคง โฮว เฌาพรา บอ ดี เฆ ดา อี ต็อห โหมว. เย บอกาเฆลียด มืร กาแซณ ดี โบง ปาย ตี. เย มืร ดี ยอด ลึมลา โฮว เฌาพรา เซเซ. เย ตู เบลห แวน อัน.