1 ดอ แฮะ ฌัม ซีแง อา ฆึร ดี อึณพวน แคง มาเฆียน ตึอน, เฆ ดูอี อีซาเรลัะ บอ ยืน ปี ดี โฮม บอ ชึบ ครึง จาน, วี ดึห กาปูห ฮับ แดง ฆีณ เฆ โกบ โหลห เฆ หมาบ เฆ. 2 ดอ อัน ตี เฆ บอ กาย็อห ดี ดูอี อาโมยว เฮา. เฆ มืร จ็อง ดี อาต เฌาพรา, กาลาง หมาบ เฆ บอ หมาบ ฆูณ เฆ ดา เฆ. 3 อาดา โอย นารี เฆ จ็อง บอ โทม เฆ ตีห บับ ดารา เฌาพรา อี มูห เฌาพรา ปี กรึบ เฆ. แฮะ ฮอต เฆ บอ กาลาง หมาบ เฆ, ปี วี กรึบ เฌาพรา อาดา ปอ โอย นารี. 4 เฆ ดูอี แคง ครึร อาเลวี, เฆ อี แยต ดูอี กืน, เฆ มืร จ็อง แดง กาโช็ง, ดัด ตาง กาเซา ดี เฌาพรา อี มูห เฌาพรา ปี กรึบ เฆ. ดูอี เฆ ตี บอ มูห อายอซู, อาบานี, อากาตาเมลา, อาเซบานี, อาปูนานี, อาเซรัะพี, อาบานี ปอ อู วี บอ อาเคนานี. 5 อึณ บอ มูห อายอซู, อากาตาเมลา, อาบานี, อาฮาซาบานี, อาเซรัะพี, อาโฮวคียา, อาเซบานี บอ อาเบซาฮี. เฆ ดูอี ครึร อาเลวี ตี, เฆ วี ต็อห, “แตห เบ ยีต จ็อง, อืบ เฌาพรา อี มูห เฌาพรา อี อึบ เบ,” แตห เบ บอ กาลาง ดี อัน เฌา ต็อห, “เย ดี อืบ แม เฌา เซเซ ดอน โจว ดอน บาน. แม มึห อาพูง ดังโคว ตาง กาเซา. แม แฮะ ตาง หลึอม ดอน โมยว. แม บอ ตาง หลึอม แคะ ปี นับ เย ดี อืบ. 6 อึณ บอ มูห มี แม เฌา อู กาดัง อี มูห เฌาพรา. แม เฌา แฮะ โบง แตห อึณ มึห บอ ฆางหราว บอ เบลณ อี แฮะ จา, แฮะ กาว็อห. แม แฮะ โบง บอ ซีมัณ อี แฮะ กืน กาเซา. แม แฮะ โบง บอ กาดาย บอ โตต ดอน โมยว อี กอย แดง กาดาย. แม แฮะ โบง บอ อึม นัมมูกซารา บอ อาโมยว อี กอย แคง อึม ตี ดอน โมยว. แคะ กอย อาโมยว อี มึห อาซาก, แม แฮะ แตห เฆ อีม. บอ ดอน โมยว อี กอย แคง ฆางหราว, เฆ ดี ฆึบ กรึบ แม เฌา.

7 แม เฌา บอ มูห เฌาพรา อี แฮะ ร็อห อาบราม ตึอน, แฮะ แตห อัน เลห แคง มืง อูรัะ อี มูห โดง กอย เฆ ดูอี อาโมยว คาลาเด. แม วี แตห บอ จืร กามาย ดี อัน, แตห อัน วี จืร อาบราฮัม. 8 แม เฌา มืร แฮะ ยึร, อัน แฮะ มึห น็อห ซี โดบ ซีคยา แม เฌา. แม เฌา มืร ดัว กาดีก ซัดฌา ดี อัน. แม แฮะ กาแซณ ต็อห ดี ดึห มืง ดูอี กานัณ, มืง ดูอี เฮทีด, มืง ดูอี อาโมวรีด, มืง ดูอี เพเรซีด, มืง ดูอี เยบูซีด บอ มืง ฆีฆาซีด, แตห มืง เฆ ตี วี แบน มืง หลูกหลาน อัน. แม เฌา มืร แฮะ โบง โดบ กาดีก ซัดฌา แม ตี โกบ มึห แม เฌา น็อห ซืร น็อห หมาน.

9 แม เฌา มืร แฮะ ยึร, เฆ ฆูณ ดัง เย แฮะ คัม ปี คาหนาบ อี เฮา ดอ กอย เฆ แคง มืง แอฆึบ. แม เฌา มืร แฮะ ยึร โฆรห ปี ซาคึร เฆ ดอ กอย เฆ โคบ อึม ดีโหนง เรณ. 10 แม เฌา มืร แฮะ โบง บยัะ อี หมึอม อาม กาเซา ดี คูนดีคัม พาโรว บอ ดี เฆ อามู อามาด อัน บอ ดี เฆ ดูอี แคง มาน มืง อัน. โคว, แม เฌา แฮะ นับ, เฆ แฮะ ปีพูง เฆ บอ คาหนาบ เฆ ดูอี ปี อึบ แม เฌา. กอ ฌัม ดอ ตี นี เฆ ดูอี ดอน มาน ดอน มืง แฮะ ยึร ลอง อัน ตี บอ นับ แคะ ตาง ปวน แม เฌา. 11 แม เฌา แฮะ โบง แตห อึม ดี โหนง เรณ ลาย กาย็อห, แตห อึณ แบน อึณเตณ ดี เฆ ฆูณ ดัง เย, แตห เฆ วี ปึอน ดี ฮาว แดง กาดาย เฮณ. เฆ อี วี คูงครัห โดบ เฆ ตึอน, เฆ แฮะ วี เจต ยัม โตต แคง อึม ลึก. อึณ บอ ปี แม แฮะ ดึห มาว บยัว โลง แคง อึม ลึก. 12 ดอ กาแต ซีแง, แม เฌา แฮะ แตห อึณอูะ แยต เฆ. อึณอูะ ตี แฮะ ปี ร็อง. แคง หมึร แม ปี วี แตห อึณ มึห บลาง เงา อี ปี ร็อง, แตห เฆ ปึอน ดี ยึร ดอ ฮาว เฆ โดบ อึณเตณ.

13 แม เฌา บอ ตัห แคง ฆางหราว, โลง ดี นอน ซีนาย บอ กาลาง โฆรห ดี เฆ ดูอี ปี อึบ แม เฌา. แฮะ ฮอต แม เฌา บอ ดัว ดารา อี มูห อี หมาน ดี เฆ. แม ดัว บอ อามีง แบน โมยว แบน โมยว อี หมึอม ดี เฆ. 14 แม เฌา บอ มาโนว แตห เฆ กัม ซีแง บอด อี มูห ซีแง ดีเหลา. แม เฌา แฮะ กาลาง ดี อาโมวแซ อี มูห แดเจณ แม, แฮะ แตห อัน กาลาง ดี เฆ ดูอี กืน ลอง ดารา บอ อามีง บอ ปี จัร แม แบน โมยว แบน โมยว. 15 ดอ กาปราณ เฆ ปี ดี โฮม แม เฌา บอ แตห เฆ โฮม คามูน อี เลห โลง แคง ฆางหราว. ดอ ซี เดียง เฆ อึม, แม เฌา แฮะ แตห อึม เลห แคง ดัห มาว, แตห เฆ ปึอน ดี เดียง. แม เฌา มืร กาลาง แตห เฆ ฮาว ลึบ รึบ มืง แปะ แฮะ กาแซณ แม เฌา ดี ดัว ดี เฆ. ดอ อัน ตี แม เฌา แฮะ โจะ แด แม บอ ดืง ลอง อัน ตี. 16 มาแล, เฆ ฆูณ ดัง เย, เฆ ยี วี ปีคึก น็อห เฆ บอ ดืร กาเซา, อาว ฮู วี โดบ ดารา แม เฌา. 17 เฆ วี แวน วี ปีว อี หมึอม อาม กาเซา แปะ แฮะ โบง แม เฌา. เฆ มืร อาว ฮู วี โหลห นา บอด นา หมึอม แปะ แฮะ โบง แม. เฆ วี กาบัห ดี แม เฌา บอ โจะ ดาง ดูอี อู วี, แตห อัน วี แยต เวณ เฆ แคง มืง แอฆึบ, วี แบน หมาย อี. มาแล, แม เฌา, แม มูห เฌาพรา อี นับ ดี เฆฌู อี. แม มืร มึห น็อห กาเว เฆ. แม ตู หงึย รู บอ ร็อก กาเซา เฆ. โคว, แม ตู แวน เฆ. 18 เฆ แฮะ วี โหลว อารึบ มามัก บอ ต็อห อึณ มูห เฌาพรา อี แฮะ แตห เฆ เลห แคง มืง แอฆึบ. เฆ ปี บอ แฮะ โบง ปาย ตี บอ แฮะ โบง ลูต แบน โมยว แบน โมยว มืร, แม ยี ตู แวน เฆ.

19 โกบ มึห แม เฌา น็อห ร็อก กาเว, แม ตู แวน เฆ แคง แปร กาฮ็อห. บอ อึณอูะ อี ปี ร็อง อี แยต เฆ ฮาว โดบ อึณเตณ ดอ กาแต ซีแง, แม เฌา ตู ดึห แวน. บอ เงา อี ปี ร็อง อี แตห อึณ บลาง แคง หมึร แม เฌา ตู แตห อึณ ยัด. แม แตห เฆ ปึอน ดี ยึร โดง ดี ฮาว เฆ เซเซ. 20 แม เฌา บอ วี ดัว น็อห พึอม แม, แตห แม มาโนว เฆ. แม เฌา มืร ตู จู ดัว คามูน มานา แตห เฆ โฮม. แม บอ ดัว อึม ดี เฆ แตห อึณ เฮียง เฆ เซเซ. 21 โจว กอย เฆ แคง แปร กาฮ็อห อาดา พวน ฆึร ซีนัม, แม เฌา บอ ดัว แคะ ปี โลว เฆ ดอน โมยว. ครึง ปี ตา เฆ มืร ตู บรีม ตู ราม. เปลา เฆ มืร ตู เซา ตู อ็อห.

22 แม เฌา วี แตห เฆ แป ออง คูนดีคัม ดูอี อาโมยว เฮา, แตห เฆ ปึอน บอ มาน มืง บอ กาดาย โดง กอย เฆ ตี, แตห เฆ มึห แบน โปละ แบน โปละ. เฆ แฮะ กาโฆห ปึอน มืง อาซีโฮน อี มูห มืง ปี อึบ คูนดีคัม เฮซาโพน บอ มืง บาซัน อี มูห มืง ปี อึบ คูนดีคัม อาออคัะ ตึอน. 23 แม เฌา แฮะ แตห หลูกหลาน เฆ แบร กืน, แตห อึณ กอ ปี ซีมัณ แคง เบลณ. แม แฮะ แตห ฆอน เฆ ปึอน ดี ลึบ รึบ มืง แปะ แฮะ กาแซณ แม ดี ดัว ดี ฆูณ เฆ. 24 เฆ มืร แฮะ กาโฆห แป ดูอี แคง มืง กานัณ. แม เฌา แฮะ คาหนาบ ดูอี แคง มืง ตี, วี แตห เฆ ดูอี ปี อึบ แม มึห ปวน หลึอม เฆ ดูอี แคง มืง ตี, แตห เฆ ปึอน ดี โบง แคะ ปี อึง เฆ บอ ดี คูนดีคัม เฆ บอ ดี ดูอี แคง มืง ตี. 25 เฆ ดูอี ปี อึบ แม เฌา แฮะ วี ปึอน ดี รึบ มืง อี มึห แรง อี มัน ซีคยา. เฆ บอ รึบ บอ กาดาย อี มูห กาดาย บอด กาดาย หมึอม. แคง กาง เฆ ตี มืร, แฮะ มึห โกรวกราม อี บอด อี หมึอม กอ โนะ. เฆ แฮะ ปึอน บอ อึม คึม อี แฮะ ฮอต ฆึห. บอ มาน มางูน บอ กาปึม เฮ นามัน บอ เฮ อี มึห เบล แบน โมยว แบน โมยว, เฆ แฮะ ปึอน โตต. เฆ มืร แฮะ ปึอน ดี โฮม แคะ ปี ม็อก เฆ. เฆ มืร แฮะ ปึอน ดี กอย ดาคึย, กอย ฆยามซา โบยว โบยว เกยา เกยา. ปาย ตี แม เฌา แฮะ เฆฌู กืน กาเซา เฆ.

26 มาแล, ดูอี ปี อึบ แม เฌา เฆ ตี, เฆ วี กาบัห ดี แม, ตู วี โทม โฆรห แม เฌา บอ วี แวน ดารา แม. เฆ บอ วี ง็อห ยัม ดา อี บยาน โฆรห เฌาพรา อี ดัว ซาดีก, แตห เฆ วี ตัห กรึบ แม เฌา. เฆ แฮะ แคณ กาเซา แม เฌา. 27 แม เฌา มืร วี แตห รันซู เฆ แป เฆ บอ วี อึบ วี คาหนาบ เฆ. ดอ แฮะ ฌัม เฆ ดูก ตาง ตี, เฆ บอ วี ดัด กาลาง แตห แม เฌา โทม. แม เฌา อี กอย ฆางหราว, แม มืร โทม โฆรห เฆ. แม เฌา มืร วี กาเว เฆ บอ แตห เฆ มึห ดา ตาง อี นับ ดี จอย เฆ, แตห เฆ ปึอน ดี ลอด ดี รันซู เฆ ตี.

28 ดอ แฮะ ฮอต ปึอน เฆ ดี วี กอย ดาคึย, อาว ฮู มึห อาเพ อาเร, เฆ ปี วี โบง อี ตู หมึอม. แฮะ ปาย ตี แม เฌา ปี วี แตห รันซู เฆ วี แป เฆ. ปี บอ แฮะ ปาย ตี มืร, ดอ วี โหลห เฆ หมาบ เฆ, ดอ วี ดัด เฆ ดี แม เฌา, แม เฌา อี กอย ฆางหราว, แม บอ โทม โฆรห เฆ บอ วี คยอด เฆ. โกบ มึห แม น็อห ร็อก น็อห กาเว อี แฮะ ตาง กาเซา, แม เฌา แฮะ จอย เฆ แบน เฌณ แบน เฌณ.

29 แม เฌา ปี บอ แฮะ ดัว ซาดีก, แตห เฆ โบง โดบ ดารา แม มืร, โกบ มึห เฆ น็อห ปีคึก, เฆ วี แวน ดารา อี มูห ดารา อี ปึอน ดัว อาซาก ดี เฆ ดอน อี อี โบง โดบ. เฆ ยี แฮะ ดืร, แฮะ โหนก กาเซา, ตู โทม โฆรห แม เฌา. 30 แม เฌา บอ คัม ปี โบง เฆ ตี, แบน ซีนัม แบน ซีนัม. แม เฌา ปี บอ แฮะ แตห น็อห พึอม แม มาโนว เฆ, ดอ กาลาง ดา อี บยาน โฆรห เฌาพรา ดี เฆ, เฆ มืร ตู ดึห ดี โทม. ปาย ตี แม เฌา บอ แตห ดูอี อาโมยว เฮา ตัห แป เฆ. 31 ปี บอ แฮะ ปาย ตี โกบ มึห แม เฌา น็อห กาเว บอ ร็อก กาเซา, แม เฌา ตู เบลห ตู แวน, ตู ปยาต เฆ. แม เฌา บอ มูห เฌาพรา อี นับ ดี กาเว, นับ ดี เฆฌู อี.

32 อึย แม เฌาพรา, แม เฌา บอ มูห เฌาพรา อี ตาง กาเซา. แม บอ มูห เฌาพรา อี อึบ เย. แม เฌา บอ มึห อาพูง ดังโคว อี ตาง, อี หมึอม โยว กาเซา. แม เฌา แฮะ ดึอม กาแซณ ดี ร็อก เย. แม มืร โบง โดบ กาดีก ซัดฌา แปะ แฮะ ดัว แม ตี. ซีณ ดอ มูห โจว บาน คูนดีคัม อี อึบ มืง อาซูรา เฆ แฮะ คาหนาบ เย. กอ วี ฌัม อาตึร นี, เย แฮะ คัม ดูก ตาง กาเซา. เฆ อี มูห ดูอี ปี อึบ แม เฌา บอ มูห คูนดีคัม บอ อามู อามาด อัน, บอ ดา อี หลู ดี เฌาพรา, ดา อี บยาน โฆรห เฌาพรา บอ เฆ ฆูณ ดัง เย, เฆ บอกาเฆลียด แฮะ กาดูห โตต ดี คัม ดูก ตาง ตี. แตห แม เฌา โนว ดูก ตาง แปะ แฮะ คัม เฆ ตี. แกวะ แตห แม ทาง อึณ ตู บอ คึกคัม บอ ลึก. 33 แปะ แฮะ ดัม แม เฌา หมาบ ดี เย, แฮะ ซืร แฮะ หมาน. เย แฮะ โบง อี ตู หมึอม. อี มูห แม เฌา, แม ยี โบง ซืร ซืร หมาน หมาน. 34 เย บอกาเฆลียด บอ มูห คูนดีคัม, บอ มูห อามู อามาด อัน, บอ มูห ดา อี หลู ดี เฌาพรา, บอ มูห เฆ ฆูณ ดัง เย, อาว มึห อี โบง โดบ ดารา แม เฌา. เฆ มืร ตู โทม โฆรห ปี ดัม อูน แม เฌา บอ โฆรห ปี ดัม แม ซาดีก ดี เฆ. 35 ดอ กอย เฆ แคง มืง เฆ, เฆ ตู กรึบ แม เฌา. โกบ แฮะ กืน ปี เฆฌู แม เฌา ดี เฆ, เฆ บอ ปึอน ดี กอย ดาคึย แคง มาน มืง เฆ อี แฮะ กาว็อห, อี มูห กาดาย บอด กาดาย หมึอม แปะ แฮะ ดัว แม ดี เฆ. เฆ ยี ตู บยอง น็อห, ตู แวน อี ตู หมึอม ปี โบง เฆ.

36 ดอ ตี นี เย แฮะ วี กาดูห ดี แบน หมาย อี เฮา ดอ กอย เย แคง มืง แปะ แฮะ ดัว แม เฌา ดี เฆ ฆูณ ดัง เย. แม แฮะ ซี แตห เฆ วี ปึอน ดี โฮม บอ เบล แบน โมยว แบน โมยว อี บอด อี หมึอม แคง มืง ตี. 37 อึณ ยี มูห โกบ หมาบ ตาง แปะ แฮะ โบง เย ตี, แคะ บอ มึห อี แฮะ แบร อี แฮะ กยัะ แคง มืง ตี, แฮะ วี แบน โตต โกรว คูนดีคัม แปะ แฮะ แตห แม เฌา อึบ เย. เฆ มืร แฮะ อึบ เย, แตห เฆ บอ โบง ปี ซี โบง เฆ ดี เย บอ ดี โดว ซัดดาวา เย. เย มืร แฮะ คัม ดูก คัม หณาบ กาเซา.

38 โกบ อึณ ปาย ตี แคะ กอย เย ดูอี อีซาเรลัะ, เย แฮะ ลาย โพรม ดี ดัว กาดีก ซัดฌา อี มัน ซีคยา บอ แดม อูน แคง แปะ ลอง อัน ตี. บอ มูห ดา กาณา อี อึบ เย, บอ มูห ดูอี แคง ครึร อาเลวี, บอ มูห ดา อี หลู ดี เฌาพรา เย, เฆ มืร ดอก ฌึม ดี แปะ ตี.”