1 ดอ มึอน เฌาพรา แฮะ ดึอม กาลาง ดี ดา อี บยาน โฆรห เฌาพรา อี จืร อาเยเรมี. วาย อัน ตี อึณ บอ ฌัม อาคราว ดอ แบน อาซายรัด คูนดีคัม อี อึบ มืง บีราซี. ดอ มูห ซีนัม ดอ โฆว อัน, คูนดีคัม อาซายรัด ตี แฮะ ดัว อามีง ลอง ดูอี อีซาเรลัะ แตห เฆ ดูอี บอ มาน บอ มืง นับ. อึณ ยี มูห เฌาพรา อี แฮะ กาซูห น็อห คูนดีคัม, แตห อัน ดัว อามีง ตี, แตห อึณ บอ โดบ แปะ แฮะ ดึอม กาลาง อาเยเรมี ตึอน. อามีง ตี คูนดีคัม บอ จัร ดา จาเร อัน, แตห เฆ แดม อูน.

2 อึณ ต็อห, “คูนดีคัม อาซายรัด อี อึบ มืง บีราซี, อัน แฮะ กาลาง ต็อห, ‘เฌาพรา อี อึบ ฆางหราว, อัน แฮะ ดัว ดอน มืง แดง กาดาย นี, แตห โอว อึบ. อัน เฌา มืร แฮะ วี ดัม โอว, แตห โอว ซัม โฮว อาดา อัน เฌา แคง มืง เยรูซาแลม อี กอย แคง มืง ยูดา. 3 อึณ บอ มูห ดูอี ปี อึบ เฌาพรา อี กอย กาแต เบ นี. โอว หมาณ, แตห เฌาพรา ปี กรึบ เฆ กอย รึม โดบ เฆ, แตห เฆ วี เวณ แคง มืง เยรูซาแลม อี กอย แคง มืง ยูดา, แตห เฆ วี เวณ ซัม โฮว เฌาพรา อี มูห เฌาพรา ปี กรึบ เฆ ดูอี อีซาเรลัะ. อัน เฌา บอ มูห เฌาพรา อี กอย แคง มืง เยรูซาแลม ตี. 4 เฆ ดูอี อีซาเรลัะ อี ซี กอย, เฆ บอ กอย ดี เหมา อาว ต็อห, แตห เฆ ดูอี อี กอย กาตัด เฆ ตี จอย เฆ. บอ มูห รึอน, บอ มูห ครีว, บอ มูห โกรวกราม บอ โดว ซัดดาวา, บอ มูห ปี ซี หลู เฆ แบน โมยว แบน โมยว, แตห เฆ หลู, แตห อึณ จอย เฆ ดูอี อี เวณ ซัม โฮว เฌาพรา แคง มืง เยรูซาแลม ตี.’” แคะ ตี อามีง แปะ แฮะ แดม ดัว คูนดีคัม ตึอน.

5 วาย อัน ตี เฆ อี มูห ดา ตาง แคง ครึร ดูอี อายูดา บอ แคง ครึร ดูอี อาเบนยาม บอ เฆ ดา อี หลู ดี เฌาพรา อี มูห ครึร อาเลวี, เฆ อี มูห ดูอี ปี ซูต ปี จัร เฌาพรา บอกาเฆลียด, เฆ บอ แรน ดี ฮาว ดี มืง เยรูซาแลม, แตห เฆ ปึอน ดี ซัม โฮว เฌาพรา. 6 เฆ ดูอี อี กอย กาตัด เฆ ดูอี อีซาเรลัะ ตึอน, เฆ บอ หลู ปี ซี หลู เฆ แบน โมยว แบน โมยว. เฆ ปี วี ดัว บอ รึอน บอ ครีว บอ โดว ซัดดาวา บอ โกรวกราม เฆ อี มึห ดี ง็อห ดี คัน, ปี วี จอย เฆ ดูอี อีซาเรลัะ. 7 แดง ตี, คูนดีคัม อาซายรัด ปี วี ดึห เลห บอ อึณกรึห อี แฮะ ดึอม กอย แคง โฮว เฌาพรา. คูนดีคัม อาเนบูคัดเนจา แฮะ ดึอม ดึห เลห อึณกรึห ตี แคง มืง เยรูซาแลม, ปี วี ฮับ อูน แคง โฮว เฌา ปี กรึบ อัน. 8 คูนดีคัม อาซายรัด อี อึบ มืง บีราซี ตึอน, อัน บอ วี กาลาง ดี อามีซาเรคัด อี มูห ดา อี บัร โกรว อี มึห ดี ง็อห ดี คัน, แตห อัน ดึห เลห ตีห ดี ยอด อึณกรึห เฆ ตี, แตห อัน วี อาบ ดัว ดี อาเซซาบาจา อี มูห ดา กาณา อี อึบ มืง ยูดา ตึอน.

9 ฌาราง โกรว เฆ ตี, อึณ ปาย นี.

พาน ครีว อึณ กอย โอย ฆึร โบ็ง. พาน รึอน, อึณ กอย อู แหรณ โบ็ง. อาตึม อา ฆึร ดี ดีม บลัะ.

10 ซีลัยะ ครีว, โอย ฆึร โบ็ง. ซีลัยะ รึอน ปอ อู โมยว พวน มาย็อห ดี ฆึร โบ็ง. อึณกรึห อาโมยว เฮา อู แหรณ โบ็ง.

11 อึณกรึห ครีว เฆ รึอน บอกาเฆลียด, อึณ กอย พัน แหรณ ดี พวน มาย็อห โบ็ง. อึณกรึห ฌึร ตี อาเซซาบาจา วี ดึห ตัห ดอ วี แยต อัน เฆ ดูอี อีซาเรลัะ, แตห เฆ วี ตัห แคง มืง เยรูซาแลม. เฆ มูห ดูอี แปะ แฮะ ดึอม เหมต ฮาว อาเนบูคัดเนจา ดี มืง บาแบ ตึอน.