1 คูนดีคัม อาซาโลวโมว อี มูห ฆอน อาดาวีด ตึอน อัน แฮะ แกร ดี มึห ปวน อี มัน ซีคยา, แตห อัน อึบ มืง อีซาเรลัะ บอ มืง. โคว, เฌาพรา อี มูห เฌาพรา ปี กรึบ อัน แฮะ ม็องการา ดัว นา หมึอม ดี อัน, แตห อัน มึห อาพูง ดังโคว ตาง กาเซา.

2 คูนดีคัม อาซาโลวโมว มืร กาลาง ดี เฆ ดูอี อีซาเรลัะ บอกาเฆลียด อี มูห ดา โบว อี อึบ ดูอี อู แหรณ วี บอ อี อึบ อู มาย็อห วี. อัน กาลาง บอ ดี เฆ ดา อี ซูงพยาด ดารา บอ ดี เฆ ดา ตาง อี อึบ อี แยต เฆ ดูอี อีซาเรลัะ บอ ดี เฆ อี มูห ฆีณ อึณโฮม ดอน อี. 3 อัน แตห เฆ บอกาเฆลียด ฮาว ดี มืง กีปอง อี มูห โดง ดี กรึบ เฆ เฌาพรา. โคว, ทึบ บีก บอด กอย ดี ตี. อึณ มูห ทึบ โดง ลาย กาตูณ เฌาพรา ฆาย ดูอี แปะ แฮะ โบง อูน แดเจณ เฌาพรา อี จืร อาโมวแซ ดอ กอย เฆ แคง แปร กาฮ็อห ตึอน. 4 คูนดีคัม อาดาวีด แฮะ ดึอม ดึห ฌีดืก เฌาพรา ดี มืง กีรียาดอารีม, วี อูน แคง มืง เยรูซาแลม แคง ทึบ บีก ปี ซัม อัน ตึอน. 5 อี มูห กาโช็ง หลู บ็อง เดณ ปี โบง อาเบฌาเลน อี มูห ฆอน อาอูรี บอ หลาน อาฮูรา อึณ ยี ซี กอย ดี มืง กีปอง. อึณ กอย นา อาต ทึบ บีก บอด. โคว, คูนดีคัม อาซาโลวโมว บอ เฆ ดูอี กืน, เฆ บอกาเฆลียด กาโพรม ดี กรึบ เฌาพรา ดี ตี. 6 คูนดีคัม อาซาโลวโมว มืร ดึห โดว ซัดดาวา อู แหรณ โดว, โบง แตห อึณ แบน ปี ดี หลู อี โดะ ดี เงา บอ โดะ หลู แดง กาโช็ง หลู บ็อง เดณ อี กอย นา อาต ทึบ บีก บอด ตึอน, อี มูห โดง ลาย กาตูณ เฌาพรา ฆาย ดูอี.

7 แคง หมึร ตี เฌาพรา มืร ตัห กาปลูห ดี อาซาโลวโมว บอ กาลาง โฆรห ดี อัน ต็อห, “แตห แม หมาณ ปี ซี หมาณ แม, โอว ดี ดัว ดี แม.” 8 อาซาโลวโมว มืร วี กาลาง ดี เฌาพรา ต็อห, “แม เฌา แฮะ เฆฌู กืน กาเซา ดี อาดาวีด อี มูห ฆูณ โอว. แม มืร แฮะ วี แตห บอ โอว ปึอน ดี แบน คูนดีคัม วี ปลูะ อัน. 9 อึย แม เฌาพรา, โอว หมาณ, แตห แม โบง ดี โอว โดบ กาดีก ซัดฌา แปะ แฮะ ดัว แม ดี ฆูณ โอว อี มูห อาดาวีด ตี. โคว, แม เฌา มืร แฮะ แตห โอว แบน คูนดีคัม อี อึบ ดูอี กืน กาเซา, อี ปี กาปูห กอ ฮู นับ ดี ตีห. 10 โอว หมาณ แตห แม เฌา ดัว อางยาน ดี โอว, แตห โอว นับ ปี ดี ปาย ดี อึบ ดูอี กืน เฆ ตี. เซ อาว ปาย ตี, อาว มึห อาเซ อี ดี แป ดี อึบ ดูอี ปี อึบ แม เฌา อี แฮะ กืน กาเซา ตี.”

11 เฌาพรา วี กาลาง ดี อาซาโลวโมว ต็อห, “แม แฮะ ร็อห อี มูห อี หมาน. แม ตู หมาณ โกรวกราม บอ อาพูง เฆ ซาเร. แม มืร ตู หมาณ แตห แม ปึอน ดี ง็อห แวน รันซู แม. แม มืร ตู หมาณ, แตห อาซาก แม โต็ง. แม ยี หมาณ มี อางยาน, แตห แม แป ดี อึบ ดูอี กืน แปะ แฮะ อาบ โอว ดี แม, แตห แม แบน คูนดีคัม อี อึบ ซีคยา เฆ. 12 โกบ อึณ ปาย ตี โอว ดี ดัว อางยาน ตี ดี แม. แดง ตี โอว ดี วี ดัว บอ โกรวกราม บอ อาพูง เฆ ซาเร ดี แม. เฆ คูนดีคัม อี แฮะ ดึอม แบน ดี อาต แม บอ เฆ อี ดี แบน วาย แม อาว มึห คอ อู กาดัง อี ดี ครับ แม อี ดี การัม แม.”

13 ปาย ตี อาซาโลวโมว บอ วี เลห แคง มืง กีปอง โดง หลู เฆ ดี ทึบ บีก บอด ตึอน. อัน วี เวณ แคง มืง เยรูซาแลม บอ อึบ โตต มืง อีซาเรลัะ.

14 อัน บอ มึห ลักเลา อึณปร็อง อู แหรณ ดี พวน มาย็อห หลาง บอ อึณปร็อง อู หมึณ ดี อา แหรณ โดว. อัน บอ ดึห มัง กาล็อะ, ฮาว อูน แคง มืง เยรูซาแลม. อี ซี ฆีด ซี กอย เฆ ตึอน, อัน บอ อูน ปอ มืง. 15 ดอ แบน อัน คูนดีคัม ตี แคง มืง เยรูซาแลม รึอน เฆ ครีว แฮะ กืน กาเซา. เฆ วี มาด แตห อึณ ปี มาว. เฮ อารีด มืร แฮะ กืน กาเซา. เฆ วี มาด อึณ ปี เฮ ดีปู อี ลัต แคง แปร. 16 มังปร็อง กืน ปี ดึห ตัห ดัว เฆ ดี อาซาโลวโมว ตี, เฆ ดึห ตัห แคง มืง แอฆึบ บอ แคง มืง กูย. เฆ อี จึห อี ย็อง โกรว คูนดีคัม, เฆ แฮะ จึห ตัห มังปร็อง ตี แคง มืง กูย. 17 เฆ ดึห ตัห ลักเลา แคง มืง แอฆึบ, อู หลาง อาดา รึอน แฌด เดา มาย็อห เซเคน. บอ อึณปร็อง อู โดว เฆ ดัว รึอน แฌด อู มาย็อห ดี พัน ฆึร เซเคน. เฆ บอ ดึห โกรว ตี, วี ย็อง ดี คูนดีคัม ดอน กาดัง อี อึบ ดูอี เฮทีด บอ เฆ ดูอี อาราม.