1 คูนดีคัม อาซาโลวโมว แฮะ อูน น็อห ดี ซัม โฮว เฌาพรา, แตห อึณ แบน โดง ดี กรึบ เฆ เฌาพรา. อัน คราม ดี ซัม บอ โฮว โดง ดี กอย อัน. 2 อัน มืร คาน เฆ ดูอี บู หมึณ วี, แตห เฆ แบน อี กาฆอด อี กาโย็ง โกรว แบน โมยว แบน โมยว. อัน มืร คาน ดา หมึณ วี, แตห เฆ แบน อี ลึร มาว แดง นอน. อัน มืร จัร เฆ บอ โอย แหรณ ดี เดา มาย็อห วี, แตห เฆ แบน อี แยต อี อึบ ดูอี เฆ ตี.

3 อาซาโลวโมว มืร จัร ดาลาม อัน ฮาว กาลาง ดี คูนดีคัม อาฮีรัม อี อึบ มืง ทูโรว ต็อห, “โอว หมาณ, แตห แม ย็อง ดัว เฮ อารีด แม ดี โอว, แตห อึณ ปี ปี ดึอม โบง แม ดี อาดาวีด อี มูห ฆูณ โอว ดอ ซัม อัน โฮว อัน ตึอน. 4 โอว มืร แฮะ ครึง ดี ซัม โฮว เฌาพรา อี มูห เฌาพรา ปี กรึบ โอว. โดง ตี อึณ ดี แบน โดง ซีงา บอด อาดา เฌาพรา. เฆ ดี บอ ดึห ตัห อึณกรึห อูห หงูน โดะ หลู ดี อัน เฌา. โดง ตี เฆ ดี บอ เบลห คามูน อี ซีงา บอด ดี อาต อัน เฌา เซเซ. เฆ ดี หลู บอ ปี ดี หลู อี โดะ ดี เงา ดอน หมึร ดอน หณา. บอ ซีแง ดีเหลา, ซีแง ลืนโมน, ซีแง บลอย แบน โมยว แบน โมยว, แตห เฆ กรึบ เฌาพรา อี มูห เฌาพรา ปี กรึบ เย. อัน เฌา มืร แฮะ ดัม อูน, แตห เฆ ดูอี อีซาเรลัะ โบง ปาย ตี เซเซ.

5 โอว มืร แฮะ ซูงพยาด แคง น็อห โอว, โอว ดี โบง โฮว เฌาพรา อี ตาง กาเซา บอ หมึอม อาม กาเซา. โคว, เฌาพรา ปี กรึบ โอว, อัน มูห เฌาพรา อี ตาง หลึอม เฌา แบน กาดัง แบน กาดัง. 6 โกบ อึณ ปาย ตี อึณ ยี ตู มึห อาเซ อี ปึอน ซัม โฮว เฌาพรา. ฆางหราว ปี บอ แฮะ จา แฮะ ตาง กาเซา มืร, อึณ ยี ตู ฆลึม แตห อัน เฌา กอย. โอว มืร ตู ปึอน ซัม โฮว แตห อัน เฌา กอย. อึณ มูห มี โดง ดี ตัห หลู อึณกรึห อูห หงูน บอ ปี ดี หลู อี โดะ ดี เงา แบน โมยว แบน โมยว.

7 โคว, แตห แม ตึย ดูอี อู วี อี มึห อางยาน, อี นับ ดี จึม ครีว เฆ รึอน, นับ ดี จึม บ็อง เดณ บอ ฮีน, นับ บอ ดี โบลห ราง โบห บอ ดอก โดว แปะ. ดูอี ตี, แตห อัน บอ แหลว ดี ด็อะ ดี จีณ บีก คอง เฆ บีก เรณ แฆ, บอ บีก เงียน. แตห อัน ตัห โบง รึม ฆาน โดบ เฆ ดา ซารา อี กอย แคง มืง ยูดา บอ แคง มืง เยรูซาแลม อี มูห ดูอี แปะ แฮะ ร็อห อูน อาดาวีด อี มูห ฆูณ โอว.

8 โอว แฮะ นับ เฆ ดูอี แม, เฆ กยัะ ดี ฆัร เฮ. แตห เฆ ฮาว ฆัร เฮ อารีด, เฮ อึณเก บอ เฮ นัมซา อี กอย ดี นอน เลบานูน, วี ตึย ตัห ดี โอว. โอว มืร ดี จัร เฆ ดูอี โอว, แตห เฆ วี ฮาว จอย ดูอี แม เฆ ตี. 9 แตห เฆ ปึอน ดี แรน อูน กืน เฮ อาดา ปี ดี ซัม โฮว เฌาพรา ตี. โอว มืร ดี ซัม แตห อึณ ตาง, แตห อึณ ชีด, แตห อึณ หมึอม อาม กาเซา. 10 โอว มืร ดี ดึห ดีฆาว เคาคยูง อา หมึณ กอรัะ, เคาบาลี อา หมึณ กอรัะ, อึม มางูน อา หมึณ กาเปาบอ นามัน อา หมึณ กาเปา, วี ตึย ฮาว แตห อึณ แบน ปี ดี โฮม เฆ ดูอี แม อี รัณ ฆาน ตี.”

11 แฮะ ฮอต, คูนดีคัม อาฮีรัม อี อึบ มืง ทูโรว มืร วี แดม แปะ, ตึย ฮาว ดี อาซาโลวโมว ต็อห, “เฌาพรา แฮะ ร็อก ดูอี ปี อึบ อัน. โคว, อัน เฌา มืร แฮะ โจะ มยูก แม, แตห แม แบน คูนดีคัม อี อึบ เฆ.”

12 อัน ปี วี ต็อห, “แตห เอ อืบ เฌาพรา อี มูห เฌาพรา ปี กรึบ เฆ ดูอี อีซาเรลัะ. อัน มูห เฌาพรา อี พาน เบลห ฆางหราว บอ กาดาย. อัน เฌา แฮะ กาเว บอ คูนดีคัม อาดาวีด, แฮะ แตห อัน มึห ฆอน อีมาย อี หล็อก แหลม, อี มึห อางยาน บอ นับ ดี ครึง ดี ซัม โฮว เฌาพรา บอ โฮว อาดา โดว บรีม อัน.

13 ดอ ตี นี โอว ดี จัร อาฮูรัมอาพี อี มูห ดา ซารา อี มึห อางยาน อี หล็อก แหลม กาเซา, บอ แหลว ดี โบง แบน โมยว แบน โมยว, แตห อัน ฮาว โดง กอย แม. 14 มา อัน มูห ดูอี ครึร อาดาน. ฆูณ อัน บอ มูห ดูอี อาโมยว ทูโรว. อัน ตี มูห ดูอี อี มึห อางยาน อี นับ ดี จึม รึอน, จึม ครีว เฆ บ็อง เดณ. อัน นับ บอ ดี จึม ฮีน บอ โบลห มาว เฆ เฮ. อัน นับ ดี ด็อะ ดี จีณ บอ บีก คอง, บีก อี เรณ, บอ อี เรณ แฆ บอ บีก กาตัม ลูย. อัน บอ นับ ดี โบลห ดี ดอก ดอน โมยว. อัน มืร นับ ดี โบง โดบ ราง โบห แคะ ปี ซี จัร แม อัน โบง. แตห อัน โบง รึม ฆาน โดบ เฆ ดา ลาก แม, บอ เฆ ดา ลาก อาดาวีด อี มูห ฆูณ แม ตึอน.

15 ปาย ตี ดอ ตี นี แตห แม ดา กาณา โอว ตึย ตัห ดีฆาว เคาคยูง, ดีฆาว เคาบาลี, อึม มางูน บอ นามัน แปะ แฮะ ต็อห แม ดี ตึย ตี. 16 เย มืร ดี ฮาว ฆัร เฮ อี กอย ดี นอน เลบานูน, ตึย ฮาว แคะ ปี โลว แม. เย ดี โบง แป, ตึย ฮาว โดบ อึม นัมมูกซารา, แตห อึณ กอ ฌัม ดี มืง โยวพา. แฮะ ฮอต, แม บอ วี โตว เวณ ดี มืง เยรูซาแลม.”

17 แฮะ ฮอต ปาย ตี คูนดีคัม อาซาโลวโมว วี ดึห ฌาราง เฆ ดูอี อาโมยว เฮา อี กอย แคง มืง อีซาเรลัะ. คูนดีคัม อาดาวีด อี มูห ฆูณ อัน แฮะ ดึอม ดึห ฌาราง ดูอี แคง มืง ตี, อัน ปี วี ดึห ปอ อู เฌณ. อึณ บอ มึห ดูอี อาโมยว เฮา อู แซน ดี พัน หมึณ ดี โอย แหรณ ดี เดา มาย็อห วี. 18 อัน มืร คาน เบลห ดูอี บู หมึณ วี, แตห เฆ แบน อี กาฆอด อี กาโย็ง โกรว แบน โมยว แบน โมยว. อัน มืร คาน ดา หมึณ วี, แตห เฆ แบน อี ลึร มาว แดง นอน. อัน มืร จัร เฆ โอย แหรณ ดี เดา มาย็อห วี, แตห เฆ แบน อี แยต อี อึบ ดูอี เฆ ตี.