1 คูนดีคัม อาดาวีด อี มูห ฆูณ อาซาโลวโมว แฮะ ฮอต แรน อูน โดง ดี ซัม โฮว เฌาพรา. โดง ตี บอ มูห แคง มืง เยรูซาแลม แดง นอน โมวรียา, โดง ดึอม ตัห กาปลูห เฌาพรา ดี อาดาวีด. อึณ มูห โอ็ง กางน็อห อารอนา อี มูห ดูอี อาเยบูซีด ตึอน. 2 คูนดีคัม อาซาโลวโมว มืร กาจูห ดี ซัม โฮว เฌาพรา ตี ดอ มูห ซีแง ฮาอา, มาเฆียน ฮาอา, ซีนัม อึณพวน วาย แฮะ แบน อัน คูนดีคัม.

3 ดี บืน ดัง โฮว เฌาพรา ปี ซัม อูน อาซาโลวโมว ตี, นา โต็ง อัน เดา ฆึร กานีห. นา กาว็อห อัน อา ฆึร กานีห. เฆ บอ เฆา ตา กานีห ปี ดึอม เฆา เฆ เซเซ. 4 ดี ตึบ โดง ดี ลึบ นา อาต โฮว เฌาพรา ตี, บอ มึห โฮง อี ตาง อา ฆึร กานีห. อึณ บอ กาว็อห การัม โฮว เฌาพรา ตึอน. นา จา อัน อู มาย็อห ดี อา ฆึร กานีห. อัน บอ ดึห ครีว แฌด, ครีว ซีงา บอด, วี ปีด ดึก นา แคง.

5 แคง โฮว อัน บอ ดึห แบน เฮ อึณเก วี ดึก ดี แรง. อัน ปี วี ดึห ครีว แฌด, วี ปีด. อัน วี ดอก ฮับ บอ ราง เฮ จึก บอ ราง วัน ฮีน, แตห อึณ ชีด. 6 อัน ดึห บอ แซณ บอด, ฮับ ดี โฮว เฌาพรา แตห อึณ ชีด, แตห อึณ หมึอม ยอด. บอ ครีว ปี ปีด ดึก อัน, เฆ ดึห ตัห แคง มืง พาลาวีม ตึอน. 7 อัน วี ดึห ครีว, ปีด ดึก ดี มานัก โฮว เฌาพรา บอ ดี มา มาโลห, ดี บลัะ มาโลห บอ ดี แรง. อัน โบง บอ ราง อามู อามาด เฌาพรา อี จืร เครูบ.

8 โฮง อี ซีงา บอด หลึอม โตต, นา โต็ง อัน บอ นา กาว็อห อัน อา ฆึร กานีห. อึณ บอ การัม นา กาว็อห โฮว เฌาพรา. ดี แรง โฮง ตี อัน ดึห ครีว เดา มาย็อห ทาเลน, ปีด ดึก นา แคง. 9 อัน บอ ดึห ครีว พัน ฆึร เซเคน, โบง แบน มาฮีน. ดี แรง คร็อง แดง มืร, อัน ปีด โตต ครีว.

10 คูนดีคัม วี จัร เฆ โบง ราง อามู อามาด เฌาพรา อา กาดัง อี จืร เครูบ. อัน วี ดึห ครีว, ปีด ดึก, วี อูน แคง โฮว โดง อี ซีงา บอด หลึอม โตต.

11 เพียง ราง เครูบ อา กาดัง ตี แฮะ อึณบลัห โต็ง อา ฆึร กานีห. เครูบ อู กาดัง มึห เพียง อู บลาก โต็ง พัน กานีห. เพียง อู บลาก บอ ฮาว ทีะ ดี แรง โฮว เฌาพรา. ปอ อู บลาก บอ โต็ง พัน กานีห, บอ วี ฮาว ทีะ ดี เพียง ปอ อู กาดัง. 12 ปอ อู กาดัง อึณ บอ ปาย ตี. เพียง บอ อึณบลัห อู บลาก โต็ง พัน กานีห. เพียง อาดา อู บลาก บอ ฮาว ทีะ ดี แรง โฮว เฌาพรา. เพียง ปอ อู บลาก บอ ฮาว ทีะ ดี เพียง กาดัง ดอ โฆว ตึอน. 13 เพียง โดว ฆาย ตี แฮะ อึณบลัห โนะ แคะ กาว็อห โฮง อา ฆึร กานีห. ฆาย แฮะ จ็อง, วี มางัห ยอด แคง โฮว ตาง.

14 บีก ฆ็อง โดง ซีงา บอด หลึอม โตต ตึอน, อาซาโลวโมว บอ ดึห เซณ อี เงียน เบลณ, อี คอง, อี เรณ แฆ บอ เซณ กาตัม ลูย, วี ด็อะ แตห อึณ เลห ราง อามู อามาด เฌาพรา อี จืร เครูบ.

15 คูนดีคัม อาซาโลวโมว วี โบง ร็อง อา ณ็อง. อู ณ็อง บอ จา โอย ฆึร ดี พัน กานีห. อัน วี ซัม นา อาต โฮว เฌาพรา ตึอน. ดี กาแดะ ฆีณ ร็อง ดอน ณ็อง, อึณ บอ มึห กาแบห อี จา พัน กานีห. 16 แดง ฆีณ ร็อง เฆ ตี, อัน วี ดึห วัน, โบง แบน กาวัง แบน กาวัง, แตห อึณ ลาย ดาณ ฮาว. อัน วี ดึห ราง เบล มาจัก อู มาย็อห โบ็ง แปะ แฮะ โบง อัน ตา บ็อง เดณ, วี ฮอย โดบ วัน ตึอน. 17 ร็อง อา ณ็อง ตี แฮะ ซัม อูน ดี อาต โฮว เฌาพรา บอ อา บลาก. ณ็อง อี กอย บลาก นา เตต, เฆ ดาง แตห อัน จืร ยาคีน. ณ็อง อี กอย บลาก นา กัว, เฆ ดาง แตห อัน จืร ปอจัะ.