1 คูนดีคัม อาดาวีด วี กาลาง ดี เฆ ดูอี กืน ต็อห, “ฆอน อีมาย โอว อี จืร อาซาโลวโมว ปี ร็อห เฌาพรา นี, อาซาก อัน ซี หนึม. อัน มืร หณัม ดึอม ครู ตัห มาเซ. ฆาน ปี ดี โบง อัน ยี มูห ฆาน อี อาเร ตาง. โคว, โฮว ตี อาว มูห โฮว อาดา ดูอี. อึณ มูห โฮว เฌาพรา. 2 แคะ ปี ปึอน โอว โบง, โอว มืร แฮะ แรน อูน อาดา โฮว เฌาพรา ตี. บอ มูห ครีว, รึอน, บ็อง เดณ, ฮีน, เฮ, แซณ ว็อง ลูย อาดา ดี ฮับ กาง อัน บอ แซณ เงียน คอง บอ แซณ บอด อี มึห ดีง็อห ดีคัน บอ มาว ลูย มาว ราว, โอว แฮะ ฮอต แรน อูน โตต ดอน โมยว, อึณ มืร แฮะ กืน กาเซา. 3 แดง โกรวกราม แปะ แฮะ แรน อูน โอว อาดา โฮว เฌาพรา อี ซีงา บอด ตี ดอ ตี นี โอว วี ดึห บอ รึอน บอ ครีว อี มูห โกรว โอว, วี หลู แตห อึณ โดบ แคะ ร็อก โอว ดี โฮว เฌาพรา อี มูห เฌาพรา ปี กรึบ โอว. 4 โอว มืร แฮะ หลู ครีว แฌด อี ตัห มืง โอวพี อาดา โอย แหรณ ทาเลน, รึอน แฌด บู แหรณ ทาเลน, แตห อึณ แบน อี ปีด ดี แรง โฮว เฌาพรา ตี. 5 โอว ซี แตห เฆ ดา ลาก บอ ตา ครีว เฆ รึอน ตี ดอน โปละ โดง กาอาบ โลว ตา. โคว, ดอ ตี นี โอว ซี ดีหมอด เบ บอกาเฆลียด, อาเซ ดี คัม ดี หลู โดว อัน โบง ฆาน ฌึร ตี?”

6 วาย อัน ตี เฆ อี มูห ดา ตาง อี อึบ ครึร เฆ แคง มืง อีซาเรลัะ, ดา กาณา อี อึบ อู แหรณ วี บอ อู มาย็อห วี, บอ ดา ตาง อี อึบ ฆาน คูนดีคัม แบน โมยว แบน โมยว, เฆ บอ กาโพรม ดี หลู แคะ มึห เฆ น็อห ซี หลู. 7 บอ มูห ครีว พัน แหรณ ทาเลน บอ แดงฆา ครีว อู หมึณ โบ็ง, รึอน อู หมึณ ทาเลน, บ็อง เดณ อู หมึณ ดี ดา แหรณ ทาเลน บอ ฮีน อู แซน ทาเลน. เฆ มืร หลู แตห อึณ แบน อาดา ปี ดี โบง โฮว เฌาพรา ตี. 8 เฆ อี มึห แซณ บอด มืร ตัห หลู, แตห อึณ แบน อาดา ปี ดี ซัม โฮว เฌาพรา ตี. เฆ มืร อาบ ดัว ดี อาเยฮีลา อี มูห ดูอี อาโมยว อาเฆนราโซน ตึอน. 9 เฆ ดูอี กืน มืร แฮะ หลู ดี เฌาพรา แคะ มึห เฆ น็อห ซี หลู, เฆ มืร โคย ดาคึย โกบ แฮะ ปึอน เฆ ดี หลู กืน แคะ ตี. คูนดีคัม อาดาวีด มืร โคย ดาคึย กาเซา.

10 ปาย ตี คูนดีคัม อาดาวีด มืร อืบ มยูก เฌาพรา, แตห เฆ ดูอี กืน โทม. อัน ต็อห, “อึย แม เฌาพรา อี มูห เฌาพรา ปี กรึบ ฆูณ ดัง เย ดูอี อีซาเรลัะ, แตห อี บอ อืบ มยูก แม เฌา ดอน โจว ดอน บาน.

11 แม เฌาพรา, แม แฮะ บอด มยาด กาเซา. แม บอ มึห อาพูง ดังโคว, มึห ซาเร บอ ปวน อี แป ดี อึบ โตต. แคะ บอ มึห โมยว อี กอย แคง ฆางหราว บอ อี กอย แดง กาดาย ดอน โมยว, อึณ บอ มูห โตต โกรว แม เฌา. แม เฌา มูห ดา กาณา อี ตาง กาเซา. แม มืร อึบ โตต ดอน โมยว.

12 อาพูง ซาเร บอ โกรวกราม ดอน โมยว อึณ มูห แม เฌา อี ดัว โตต ดอน โมยว. แม เฌา มืร ตา แฮณ เฆ อาพูง ดังโคว แม, อึบ โตต ดอน โมยว. แม เฌา มึห แฮณ เฆ อาพูง ดังโคว อี กาอาบ อืบ มยูก. แม บอ แตห ดูอี ดอน อี มึห โปลม มึห แฮณ.

13 โคว อัน ตี เย อืบ แม เฌาพรา อี มูห เฌาพรา ปี กรึบ เย. เย อืบ มยูก แม เฌา บอ ดาง ฆูง เฆฌู ดี แม. เย มืร อืบ มยูก แม เฌา อี มึห ปวน ตาง.

14 มาแล, บอ โอว บอ เฆ ดูอี ปี อึบ โอว เฆ นี เย ตู มึห ดีโคว มาเซ. แม ยี ควาง แตห เย มึห น็อห ซี หลู กืน ปาย นี. โคว, แคะ มึห เย ดอน โมยว แม เฌา อี ดัว. เย วี ดึห โกรวกราม ตี, วี หลู วีว ดี แม เฌา. 15 เย ดูอี อี กอย แดง กาดาย นี, แม เฌา ยี มาด เย ปี แคต, ปี บอ เฆ ฆูณ ดัง เย. โจว กอย เย แดง กาดาย นี, อึณ ปี กามึก, อาว ปึอน ลอด ยัม ดอ เหมา. 16 อึย แม เฌาพรา อี มูห เฌาพรา ปี กรึบ เย, เย มืร แฮะ ดึห โกรวกราม เย เฆ นี, ตัห หลู ดี แม เฌา, แตห เย บอ ปึอน ดี ซัม โฮว อาดา แม เฌา อี มึห ปวน ตาง. มาแล, โกรว เฆ ตี บอ มูห โตต โกรว แม เฌา. 17 อึย แม เฌาพรา ปี กรึบ โอว, โอว แฮะ นับ, แม เฌา แฌด ดี ยอด น็อห ดูอี ดอน อี. แม มืร อึง เฆ ดูอี อี มึห น็อห ซืร น็อห หมาน. โอว มืร แฮะ มึห น็อห ซืร น็อห หมาน บอ มึห น็อห ดาคึย ดี หลู. โอว วี ยึร บอ เฆ ดูอี อี กอย ดี นี, เฆ มืร แฮะ มึห น็อห โคย ดาคึย กาเซา โกบ แฮะ ปึอน เฆ ดี หลู ดี แม เฌา.

18 แม เฌาพรา อี มูห เฌาพรา ปี กรึบ เฆ ฆูณ ดัง เย อี มูห อาบราฮัม, อาแซก บอ อาโกบ, แตห เฆ ดูอี ปี อึบ แม เฌา นี มึห น็อห ปาย ตี เซเซ, แกวะ แตห อึณ กาดัด. แตห เฆ มึห น็อห ร็อก แม เฌา เซเซ.

19 โอว หมาณ, แตห ฆอน โอว อี จืร อาซาโลวโมว นี มึห น็อห ซี โบง โดบ โฆรห แม เฌา ดอน โมยว. แตห อัน บอ ปึอน ดี โบง, ปึอน ดี ซัม โฮว เฌาพรา โดบ แปะ แฮะ แรน อูน โอว นี.”

20 แฮะ ฮอต ปาย ตี อาดาวีด วี กาลาง ดี เฆ ดูอี กืน ต็อห, “แตห เบ อืบ มยูก เฌาพรา อี มูห เฌาพรา ปี กรึบ เบ.” ปาย ตี แคะ กอย เฆ ดูอี บอกาเฆลียด มืร กาโพรม ดี อืบ มยูก เฌาพรา อี มูห เฌาพรา ปี กรึบ ฆูณ ดัง เฆ. เฆ มืร มูด ฆึบ โลง, วี กรึบ เฌาพรา บอ คูนดีคัม.

21 บอ ฌัม ปา แคหณา เฆ วี โบง บลอย หลู ดี เฌาพรา. เฆ มืร หลู ปี ดี หลู อี โดะ ดี เงา บอ มูห มัก อาโล็ง อู แหรณ โดว, มาบู อาโล็ง อู แหรณ โดว, ฆอน มาบู อู แหรณ โดว. เฆ หลู บอ ปี ดี เดียง บอ ปี หลู อาโมยว เฮา อี แฮะ กืน กาเซา. อึณ มูห ปี หลู เฆ ดี เฌาพรา อาดา เฆ ดูอี อีซาเรลัะ บอกาเฆลียด. 22 ซีแง ตี เฆ มืร โฮม รึม โบยว โบยว เกยา เกยา, กอย ดาคึย กาเซา บอ โหลห เฌาพรา. เฆ มืร วี โจะ มยูก อาซาโลวโมว ปอ อู เฌณ, แตห อัน แบน คูนดีคัม. เฆ มืร ฆาว ปวน เฌาพรา บอ พ็อห นามัน ดี ฆีณ อัน, แตห อัน แบน คูนดีคัม. เฆ แตห บอ อาฌาโดก แบน ดา อี หลู ดี เฌาพรา. 23 ปาย ตี อาซาโลวโมว บอ แบน คูนดีคัม ตูต แดง มาลาง ปี ดัว เฌาพรา. อัน บอ วี ปลูะ ฆูณ อัน อี จืร อาดาวีด. แคะ ปี โบง อัน มืร ออง. เฆ ดูอี อีซาเรลัะ บอกาเฆลียด มืร โทม โฆรห อัน. 24 บอ มูห อามู อามาด คูนดีคัม, บอ มูห ดา โบว อี อึบ ดา ซึก อี กยัะ ดี กาโฆห บอ เฆ อี มูห ฆอน อาดาวีด, เฆ บอกาเฆลียด คัม ปี อึบ คูนดีคัม อาซาโลวโมว ตี.

25 เฌาพรา มืร โจะ มยูก อาซาโลวโมว แตห เฆ ดูอี อีซาเรลัะ บอกาเฆลียด ยึร. อัน เฌา มืร ดัว แตห อาซาโลวโมว มึห อาพูง ดังโคว ตาง หลึอม เฆ คูนดีคัม ดูอี อีซาเรลัะ ดอน กาดัง อี แฮะ ปวน ตัห อาต นี.

26 อาดาวีด อี มูห ฆอน อาเยเซ ตึอน, อัน มืร แฮะ อึบ มืง อีซาเรลัะ บอ มืง. 27 อัน มืร แฮะ อึบ อาดา พวน ฆึร ซีนัม. อัน บอ กอย แคง โฮว อัน ดี มืง เฮโบรว บู ซีนัม บอ แคง มืง เยรูซาแลม โอย ฆึร ดี โอย ซีนัม. 28 อัน แฮะ กัด กาเซา. อาซาก อัน มืร แฮะ โต็ง, อัน แฮะ กอย ดาคึย โกบ มึห อัน โกรวกราม รึอน เฆ ครีว กืน บอ โกบ ดูอี บอกาเฆลียด มืร โรวเซ อัน. วาย แฮะ ยัม อัน, ฆอน อีมาย อัน อี จืร อาซาโลวโมว บอ วี แบน คูนดีคัม ปลูะ อัน.

29 ลอง ปี โบง คูนดีคัม อาดาวีด ดอน โมยว จูห ซีณ ดอ โฆว อัน กอ ฌัม ดี กาแดะ อึณ แฮะ แดม อูน แคง บับ แปะ ปี แดม อาซามูเอน อี มูห ดา อี ยึร. บอ แคง บับ ปี แดม อานาทาน อี มูห ดา อี บยาน โฆรห เฌาพรา. บอ แคง บับ ปี แดม อาฆัด อี มูห ดา อี ยึร. 30 แคง บับ ปี แดม อูน เฆ โอย วี ตี, อึณ บอ แดม ลอง แฮะ มึห อัน ปวน ดี อึบ มาน มืง บอ ลอง แฮะ มึห อัน อาพูง ดังโคว บอ ลอง อี แฮะ โบว แบน ดี อัน. อึณ บอ แดม บอ ลอง มืง อีซาเรลัะ บอ มืง เฮา อี กอย ดอน นา ดอน โปละ.