1 อาดา อู ซีแง คูนดีคัม อาดาวีด บอ แดะ ตัห โตต แคะ กอย เฆ ดา กาณา อี อึบ ดูอี อีซาเรลัะ. บอ มูห ดา ตาง อี อึบ ครึร เหมา ครึร อัน, บอ ดา กาณา อี ยอด แมน ลอง ปี โลว คูนดีคัม แบน โมยว แบน โมยว, บอ ดา ตาง อี อึบ ดา ซึก แบน มาย็อห แบน มาย็อห, บอ เฆ อี อึบ โกรวกราม บอ โดว ซัดดาวา คูนดีคัม, บอ เฆ อี อึบ โกรวกราม เฆ ฆอน คูนดีคัม. อัน แดะ บอ เฆ อี อึบ แคง โฮว คูนดีคัม บอ ดา ซึก อี กยัะ ดี กาโฆห, แตห เฆ ตัห กาฌูะ โตต แคง มืง เยรูซาแลม.

2 อาดาวีด มืร ยีต จ็อง นา อาต เฆ บอ กาลาง ดี เฆ ต็อห, “อึย เบ บีนอง อี มูห ดูอี ปี อึบ โอว, แตห เบ โทม โฆรห โอว. โอว แฮะ มึห น็อห ซี ซัม โฮว เฌาพรา อี มูห เฌาพรา ปี กรึบ เอ, แตห อึณ มึห โดง ดี อูน ฌีดืก เฌาพรา บอ แตห อึณ ปี โดง เบลห อัน เฌา เปลา อัน. โอว มืร แฮะ ฮอต แรน อูน โตต ดอน โมยว.

3 มาแล, เฌาพรา ยี วี แคร โอว, แกวะ แตห โอว โบง โอว ซัม โกบ แฮะ กาโฆห แฮะ ง็อห ยัม โอว ดูอี กืน กาเซา.

4 เฌาพรา อี มูห เฌาพรา ปี กรึบ ดูอี อีซาเรลัะ แฮะ ร็อห โอว, แตห โอว เลห แคง อึณโฮม ฆูณ โอว, แตห โอว แบน คูนดีคัม อี อึบ มืง อีซาเรลัะ เซเซ. อัน เฌา แฮะ ร็อห ดูอี แคง ครึร อายูดา แตห เฆ แบน อี อึบ มืง. แคง ครึร ดูอี อาโมยว อายูดา ตี, อัน เฌา แฮะ ร็อห อึณโฮม ฆูณ โอว. แคง อึณโฮม เย ตี, อัน เฌา มืร แฮะ อึง ดี แตห โอว แบน คูนดีคัม อี อึบ มืง อีซาเรลัะ.

5 อัน เฌา มืร แฮะ ม็องการา ดัว แตห โอว มึห ฆอน อีมาย กืน กาเซา. กาแต ฆอน โอว เฆ ตี, อัน แฮะ วี ร็อห อาซาโลวโมว, แตห อัน อึบ มืง อีซาเรลัะ อี มูห มืง ปี อึบ เฌาพรา. 6 เฌาพรา แฮะ วี กาลาง ดี โอว ต็อห, ‘ฆอน อีมาย แม อี จืร อาซาโลวโมว, อัน อี ดี ซัม อี ดี โบง โฮว อาดา โอว. โอว แฮะ ร็อห อัน, แตห อัน แบน ฆอน โอว. โอว มืร ดี แบน ฆูณ อัน. 7 เซ อัน มืร โบง โดบ ดารา โอว บอ โทม ปี กาลาง อูน โอว แตห อึณ ปี ปี โบง อัน ดอ ตี นี, โอว มืร ดี แตห อัน อึบ มาน มืง ตี เซเซ.’

8 โคว อัน ตี, ดอ ตี นี โอว จัร เบ ดูอี ปี อึบ โอว นา อาต เฌาพรา ปี กรึบ เอ บอ นา อาต ดูอี กืน อี มูห ดูอี อีซาเรลัะ, ดูอี ปี อึบ เฌาพรา, แตห เบ โบง โดบ ดารา แคะ ปี กาลาง อูน เฌาพรา ปี กรึบ เอ, แตห เบ บอ ปึอน ดี บึง ซีคยา มืง อี แฮะ หมึอม กาเซา นี. แตห เบ ปี วี ปึอน ดี ดัว คาฆูน ตี บอ ดี หลูกหลาน เบ ดอน โจว ดอน บาน.”

9 อัน วี กาลาง บอ ดี อาซาโลวโมว ต็อห, “อึย ฆอน กาโณม โอว, แตห แม บอ หณึม บึง เฌาพรา อี มูห เฌาพรา ปี กรึบ ฆูณ แม. แตห บอ น็อห บอ พึอม แม โบง ฆาน อัน เฌา. อัน เฌา บอ นับ อากยาม อางยาน บอ ปี คราม ปี โลว ดูอี แคง น็อห เฆ ดอน โมยว. เซ แม กอ เหรต อัน เฌา, อัน เฌา มืร ดี รับ ดี รวห แม. เซ แม ยี แวน อัน เฌา, อัน เฌา มืร ดี แวน แม, ตู วี โหลห แม ดอ เหมา.

10 แม โลว เฌณฌา ลอง ฆาน แปะ แฮะ ร็อห เฌาพรา แตห แม โบง. แตห แม มึห โปลม เฆ แฮณ ดี ซัม โฮว อัน เฌา อี ซีงา บอด.”

11 แฮะ ฮอต, อาดาวีด วี ดึห อารึบ โฮว เฌาพรา, บอ อารึบ โฮง แบน โฮง แบน โฮง, บอ โฮง โดง ดี อูน โกรวกราม, โฮง อี กอย คร็อง แดง, โฮง อี กอย นา แคง บอ โฮง โดง ซีงา บอด หลึอม โตต อี มูห โดง ดี แตห ดูอี ฆาย เฌาพรา ลาย กาล็อะ, วี อาบ ดัว โตต ดี อาซาโลวโมว.

12 อัน วี ดึห บอ อารึบ ปี บยัะ น็อห พึอม เฌาพรา แคง น็อห อัน ปี ปาย แวง โฮว เฌาพรา ตี, บอ โฮง อี กอย โรบ โฮว ตี, บอ โฮง โดง ดี อูน โกรว ปี ตัห หลู ดูอี แคง โฮว เฌาพรา ตี. อัน วี อาบ ดัว โตต ดี อาซาโลวโมว.

13 อัน วี กาลาง บอ ลอง เฆ ดา อี หลู ดี เฌาพรา บอ เฆ ดูอี อาโมยว อาเลวี, แตห เฆ แบน พึง แบน พึง โบง ฆาน แคง โฮว เฌาพรา, แตห เฆ ยอด ลึมลา ครึง ตา อี กอย แคง โฮว เฌาพรา ตี ดอน โมยว.

14 อัน ปี วี กาลาง อูน แคะ โลว จัน ครีว เฆ รึอน อาดา ปี ดี โลว โบง ครึง ตา, แตห เฆ ซัะ โดบ แคะ ปี กาลาง อูน อัน ตี เซเซ. 15 ครีว ปี ดี โลว ตา เฆ โบง เงา ออม, ครีว บอ ดัง เงา ออม ตี บอ รึอน ปี ดี โลว ตา เฆ โบง เงา ออม รึอน บอ ดัง เฆ แฮะ มึห โตต จัน อัน, แตห อึณ โดบ แคะ โลว เฆ อาดา ดอน โบ็ง. 16 บอ ครีว อาดา กาโช็ง ครีว โดง ดี เบลห เฆ คามูน ปี หลู เฆ บอ รึอน อาดา กาโช็ง รึอน มึห จัน อัน. 17 บอ ครีว อาดา มัง โซก บอ ซีลัยะ เฆ ก็อก, เฆ โลว ซัะ ตา เบล ซัะ ตี. บอ รึอน อาดา ซีลัยะ แบน โมยว แบน โมยว, เฆ โลว ซัะ ปาย ตี. 18 บอ ครีว แฌด อาดา กาโช็ง หลู โดง ดี โดะ อึณกรึห อูห หงูน, เฆ โลว ซัะ ปาย ตี. อาดาวีด วี ดัว ดี เฆ บอ อารึบ ลักเลา บอ อารึบ อามู อามาด เฌาพรา ครีว อี จืร เครูบ, อี แฮะ บลัห เพียง ฆาย, อี วี ปลึก ฌีดืก เฌาพรา. โกรว ฌึร ตี ดอน โมยว อัน วี อาบ ดัว โตต ดี ฆอน อัน อี จืร อาซาโลวโมว.

19 คูนดีคัม อาดาวีด วี ต็อห, “ฌึร ตี บอ ดอน โมยว แฮะ โดบ อารึบ แปะ แฮะ แดม อูน เฌาพรา อี แฮะ แตห โอว มึห อางยาน, แตห โอว นับ ลอง อัน ตี.”

20 แฮะ ฮอต, คูนดีคัม อาดาวีด วี กาลาง ดี ฆอน อัน อี จืร อาซาโลวโมว ต็อห, “แตห แม มึห น็อห โปลม บอ มึห น็อห ยัะ บอ โฆยวฆยา ดี โบง. แกวะ แตห แม มึห น็อห โยว บอ น็อห ลึร. เฌาพรา อี มูห เฌาพรา ปี กรึบ โอว, อัน ดี กอย รึม โดบ แม. อัน เฌา ตู เบลห ตู แวน แม, อัน ดี กอย รึม โดบ แม, แตห อึณ กอ ฌัม ปัน ดี โบง ฮอต โตต แม โฮว เฌาพรา ตี. 21 เฆ ดา อี หลู ดี เฌาพรา, บอ เฆ ดูอี อาโมยว อาเลวี แบน พึง แบน พึง, เฆ แฮะ ครึง ดี โบง ฆาน อาดา โฮว เฌาพรา ตี. เฆ ดูอี อี กยัะ อี แหลว ดี โบง ฆาน แบน โมยว แบน โมยว มืร, เฆ บอ มึห น็อห ซี จอย ซี โบง รึม โดบ แม. บอ เฆ ดา ตาง บอ ดูอี แคง เรา แคง มืง, เฆ บอกาเฆลียด ดี บอ โทม อามีง ปี เบลห อูน แม ดอน โมยว.”