คาน 27
ลอง พึง ดา ซึก
1 อานี อึณ มูห ฌาราง เฆ ดูอี อีซาเรลัะ, เฆ อี มูห ดา ตาง อี อึบ อี แยต ดูอี แคง อึณโฮม เฆ บอ ดา ซึก อู แหรณ วี บอ อู มาย็อห วี. อึณ มูห บอ ฌาราง เฆ อี โบง ฆาน คูนดีคัม. ดอน ซีนัม ดอน ซีนัม เฆ โบง ฆาน เฆ มาเฆียน เหมา มาเฆียน อัน. ดอน มาเฆียน อึณ บอ มึห ดูอี อา หมึณ ดี พวน แหรณ วี อี โบง ฆาน ตี.
2 อายาโซวบาม อี มูห ฆอน อาจาบาเดลัะ, อัน บอ อึบ บอ แยต เฆ โบง ฆาน มาเฆียน ดอ โฆว. ดูอี ปี อึบ อัน กอย อา หมึณ ดี พวน แหรณ วี. 3 ดูอี ตี บอ มูห ดูอี อาโมยว เพเรด บอ โบง ฆาน มาเฆียน ดอ โฆว.
4 มาเฆียน ฮาอา บอ มูห อาดอดา อี มูห อาโมยว อาโฮวฮีด. อัน บอ แบน ดา ตาง อี แยต เฆ โบง ฆาน. บอ อามีกาโลด มูห ดา อี แยต พึง ตี. พึง เฆ ตี มึห อา หมึณ ดี พวน แหรณ วี.
5 มาเฆียน ฮาโอย บอ มูห อาบีนายา อี มูห ฆอน ดา อี หลู ดี เฌาพรา อี จืร อาเยฮอยาดา. อัน อึบ แยต เฆ ดา ซึก แคง พึง อัน อี มึห อา หมึณ ดี พวน แหรณ วี. 6 อาบีนายา ตี บอ แบน ดา ซึก แคง พึง โอย ฆึร วี บอ แบน ฆีณ เฆ. ฆอน อีมาย อัน อี จืร อามีจาบาด บอ วี ปลูะ อัน, วี อึบ แคง พึง ตี.
7 มาเฆียน อึณพวน บอ มูห อาซาเฮลัะ อี มูห วา อายอพัะ. ฆอน อีมาย อัน อี จืร อาเฌบาดี บอ วี ปลูะ อัน. พึง เฆ มืร มึห อา หมึณ ดี พวน แหรณ วี.
8 มาเฆียน อึณพัน บอ มูห อาซาโฮด อี มูห หลูกหลาน อาอีจาฮา. อัน แยต พึง อัน อี กอย อา หมึณ ดี พวน แหรณ วี.
9 มาเฆียน อึณเดา บอ มูห อาอีรา อี มูห ฆอน อาอีเกซา บอ อาโมยว อาเดกอ. พึง เฆ ตี มืร มึห อา หมึณ ดี พวน แหรณ วี.
10 มาเฆียน อึณบู บอ มูห อาเฮเลด อี มูห อาโมยว เบลอนี ครึร อาเอพารีม. พึง เฆ ตี มึห อา หมึณ ดี พวน แหรณ วี.
11 มาเฆียน อึณดา บอ มูห อาซีเบเค อี ตัห โดง จืร อาฮูซา อี มูห ดูอี อาโมยว อาเฌนรา. พึง อัน ตี มึห อา หมึณ ดี พวน แหรณ วี.
12 มาเฆียน อึณดีม บอ มูห อาบีเอจา อี ตัห โดง จืร อานาโทด อี มูห ครึร อาเบนยาม. พึง อัน มืร มึห อา หมึณ ดี พวน แหรณ วี.
13 มาเฆียน ฆึร บอ มูห อามาฮาเร อี ตัห โดง จืร อาเนตอพา. อัน อี อึบ อี แยต เฆ โบง ฆาน. อัน มูห ดูอี อาโมยว อาเฌนรา. พึง อัน ตี มึห อา หมึณ ดี พวน แหรณ วี.
14 มาเฆียน ฆึร ดี เหลห บอ มูห อาบีนายา อี ตัห โดง จืร บีราโทน อี มูห ดูอี อาโมยว อาเอพารีม. พึง อัน ตี มึห อา หมึณ ดี พวน แหรณ วี.
15 มาเฆียน ฆึร ดี ฮาอา บอ มูห อาเฮลัะเด อี ตัห โดง จืร เนตอพา อี มูห ดูอี อาโมยว อาออซันเยลา. พึง อัน ตี มึห อา หมึณ ดี พวน แหรณ วี.
16 เฆ ดา ตาง อี อึบ ครึร เฆ ดูอี อีซาเรลัะ เฆ จืร ปาย นี. แคง ครึร อารูเบน บอ มูห อาเอลีเอฌา อี มูห ฆอน อาฌีคารี. แคง ครึร อาซีเมโอน บอ มูห อาเซพาดี อี มูห ฆอน อามาคา.
17 แคง ครึร อาเลวี บอ มูห อาฮาซาบี อี มูห ฆอน อาเกมูเอน. แคง หลูกหลาน อาโรน บอ มูห อาฌาโดก.
18 แคง ครึร อายูดา บอ มูห อาเอลีฮู อี มูห อีกัด อาดาวีด. แคง ครึร อาอีซาคา บอ มูห อาโอวมารี อี มูห ฆอน อามีคีลา.
19 แคง ครึร อาเฌบูโลน บอ มูห อาอีซามายา อี มูห ฆอน อาออบาดี. แคง ครึร อานาบทาลี บอ มูห อาเยรีมูด อี มูห ฆอน อาจาเรลัะ.
20 แคง ครึร อาเอพารีม บอ มูห อาโฮวเซ อี มูห ฆอน อาฌาฌียา. แคง ครึร อามานาเซ อี กอย บลาก นา เฆต ซีแง บอ มูห อาโยวเอลัะ อี มูห ฆอน อาเบตายา.
21 แคง ครึร อามานาเซ อี กอย บลาก นา เลห ซีแง บอ มูห อาอีตอ อี มูห ฆอน อาซาคารา. แคง ครึร อาเบนยาม บอ มูห อายาเซลัะ อี มูห ฆอน อาบานา.
22 แคง ครึร อาดาน บอ มูห อาจาเรน อี มูห ฆอน อาเยโรวฮัม. ดูอี เฆ ตี, เฆ มูห ดา ตาง อี อึบ อี แยต แคง ครึร ดูอี อีซาเรลัะ.
23 คูนดีคัม อาดาวีด ยี ตู ดึห ฌาราง เฆ ดูอี อาซาก อี หณัม โนว อา ฆึร ซีนัม. โคว, เฌาพรา แฮะ กาแซณ ดี ดูอี อาโมยว อีซาเรลัะ ดี แตห เฆ แบร กืน, แตห เฆ กอ ปี ซีมัณ อี กอย แคง เบลณ. 24 อายอพัะ อี มูห ฆอน นาง เจรูยา ตึอน, อัน แบน ดา อี แดม ฌาราง เฆ อีมาย แคง มาน มืง. มาแล, อัน ยี ตู นับ ดี โบง แตห อึณ ฮอต โตต. เฌาพรา ยี รู กาเซา ดี เฆ ดูอี อีซาเรลัะ โกบ โบง เฆ ปาย ตี. โคว, ฌาราง ดูอี เรา ดูอี กาง เฆ ตี, อึณ ตู บา แคง บับ ปี แดม อูน คูนดีคัม อาดาวีด ตึอน.
ลอง ดา อี อึบ โกรวกราม คูนดีคัม
25 อาฌามาวีด อี มูห ฆอน อาดีเอน, อัน บอ อึบ โกรวกราม แปะ แฮะ อูน แคง โฮว คูนดีคัม. อาโยวนาทาน อี มูห ฆอน อาอูฌียา, อัน บอ อึบ โกรวกราม อี กอย แคง มืง ปี อึบ คูนดีคัม ดอน โปละ. อึณ มูห โกรว อี กอย บอ แคง เรา บอ แคง โฮว จา ดอน โปละ.
26 อาเอจารี อี มูห ฆอน อาเกลูบ บอ อึบ ดูอี อี รัณ มาน เฆ โดง นา คูนดีคัม.
27 อาซีมี อี มูห ดูอี อาโมยว รามา บอ รัณ มาน มางูน. อาฌาบาดี อี มูห ดูอี อาโมยว ซีพามี, อัน อึบ โดง ดี แฆบ อูน เบล มางูน บอ โบง อึม มางูน.
28 อาบาลัะฮานาน อี มูห ดูอี อาโมยว เฆตา, อัน ยอด ลึมลา มาน เฮ นามัน บอ เฮ ดีปู อี กอย ดี ดัง นอน นา เฆต ซีแง. อาโยวอาด บอ ยอด แมน โดง อูน เฆ นามัน.
29 อาซีตาเร อี ตัห มืง ซาโรน, อัน ยอด แมน พึง มามัก อี กอย ดี ดีลัยะ ซาโรน. อาซาพัด อี มูห ฆอน อาตาเล, อัน บอ ยอด แมน พึง มามัก อี กอย โดบ ดีลัยะ ปอ อู โปละ.
30 อาโอวบีลา อี มูห ดูอี อาโมยว อาซามาน, อัน โลว ยอด แมน พึง มังปร็อง กาฮาต. อาเยเดยา อี ตัห มืง เมรอนอด โลว ยอด แมน พึง มาลา.
31 อายาจี อี มูห ดูอี อาโมยว อาฮาการีด โลว ยอด แมน พึง มาบู ฆาย มาแป. ดูอี เฆ ตี บอกาเฆลียด เฆ มูห โตต ดูอี อี อึบ อี ยอด แมน โกรวกราม คูนดีคัม อาดาวีด.
32 อาโยวนาทาน อี มูห บึร อาดาวีด, อัน บอ แบน อามาด ตาง อี ดัว อากยาม อางยาน บอ นับ ดี มาโนว นา บอด นา หมึอม. อัน บอ มูห ดูอี อี นับ แปะ. บอ อาเยฮีลา อี มูห ฆอน อาฮาคาโมน บอ แบน ซารา อี มาโนว เฆ ฆอน คูนดีคัม.