1 เฆ ดูอี ครึร อาเลวี อี มูห ดูอี แคง อาโมยว อาโควรา อี บัร มาโลห โฮว เฌาพรา บอ มูห อามาเซลาม อี มูห ฆอน อาโควเร บอ หลาน อาซาบ.

2 อัน วี มึห ฆอน อีมาย บู วี. อาซาคารา มูห ฆอน ฆีณ อัน, อายีตาเยน มูห วี ฮาอา, อาเฌบาดี มูห วี ฮาโอย, อายาซาเนน มูห วี อึณพวน. 3 อาเอลัม มูห วี อึณพัน, อาเยโฮวนัน มูห วี อึณเดา บอ อาเอลีออน มูห วี อึณบู.

4 อึณ ยี มูห บอ อาโอวเบนเอโดม. เฌาพรา แฮะ ม็องการา ดัว ดี อัน, แตห อัน มึห ฆอน อีมาย ดา วี. ฆอน อีมาย เฆ ตี บอ จืร อาเซมายา อี มูห ฆอน ฆีณ, อาเยโฮวฌาบาด อี มูห วี ฮาอา, อาโยวอา อี มูห วี ฮาโอย, อาซาคา อี มูห วี อึณพวน, อาเนทาเนลา อี มูห วี อึณพัน, 5 อาเมลา อี มูห วี อึณเดา, อาอีซาคา อี มูห วี อึณบู บอ อาบูลาเซ อี มูห วี อึณดา.

6 อาเซมายา อี มูห ฆอน ฆีณ อาโอวเบนเอโดม ตี, อัน ปี วี มึห ฆอน อีมาย บอ แบน อี อึบ อี แยต ดูอี แคง อึณกรึห เฆ. โคว, เฆ มึห โปลม มึห แฮณ. 7 ฆอน อาเซมายา ตี เฆ จืร อาออทานี, อาเรพาเอน, อาโอวเบด, อาเอจาบาด, อาเอลีฮู อาเซมาคี อี มูห วอแว อัน บอ แบน ดา ตาง อี อึบ อี แยต ดูอี แคง ครึร อาโมยว เฆ. โคว, บอ เฆ มูห ดูอี อี มึห โปลม เฆ แฮณ กืน. 8 ครึร อาโอวเบนเอโดม ตี เฆ อี มูห ดูอี อี กยัะ ดี โบง ฆาน เฌาพรา เฆ บอกาเฆลียด กอย เดา ฆึร ดี อา วี.

9 เฆ ดูอี อามาเซลาม อี กยัะ ดี โบง ฆาน เฌาพรา เฆ กอย ฆึร ดี ดา วี.

10 เฆ ดูอี อาโมยว อาเมนรารี บอ มูห อาโฮวซา. ฆอน อาโฮวซา บอ มูห อาซีมารี. อัน ปี ซัะ มูห ฆอน ฆีณ มืร, ฆูณ อัน ยี แฮะ อาบ แตห อัน ปี ฆอน ฆีณ. 11 อาฮีลาคี บอ มูห วี ฮาอา, อาทาบาลี มูห วี ฮาโอย บอ อาซาคารา มูห วี อึณพวน. อาโฮวซา บอ วอแว อัน โบง ฆาน แคง โฮว เฌาพรา ตี. เฆ บอกาเฆลียด กอย ฆึร ดี โอย วี.

12 พึง เฆ ตี เฆ แบน ดูอี บัร มาโลห โฮว เฌาพรา. เฆ มืร โบง ฆาน เฆ แคง โฮว เฌาพรา โดบ ดา ตาง อี แยต เฆ. ฆาน เฆ บอ ปี ฆาน ปี โบง วอแว เฆ. 13 บอ มูห ดูอี หนึม ดูอี กัด อาว ต็อห, ดอน พึง โลว กาตาม โดบ อึณโฮม อัน, แตห อัน นับ ดี โลว โบง ฆาน ดี เหมา.

14 เฆ กาตาม อี ดี กอย ดี มาโลห บลาก นา เลห ซีแง. อึณ บอ โจห อาเซลามี. แฮะ ฮอต เฆ วี กาตาม ฮับ จืร ฆอน อัน อี จืร อาซาคารา อี นับ ดี ดัว อางยาน. อัน บอ โลว กอย ดี บาง มาโลห บลาก นา กัว. 15 ดอ กาตาม เฆ อี ดี บัร มาโลห บลาก นา เตต, อึณ บอ โจห อาโอวเบนเอโดม. ฆอน อัน, เฆ โลว บัร โดง อูน เฆ โกรวกราม แคง โฮว เฌาพรา. 16 เฆ วี กาตาม ลอง อาซูเบม ฆาย อาโฮวซา. อึณ วี โจห แตห ฆาย บัร มาโลห บลาก นา เฆต ซีแง บอ มาโลห อี จืร ซาเลเคด อี ลึบ ดี อึณเตณ นา กัว. เฆ ดูอี อี บัร ตี แบน พึง แบน พึง โลว โบง ฆาน ปาย นี.

17 มาโลห อี กอย บลาก นา เลห ซีแง ตึอน, อู ซีแง โลว บัร เดา วี. มาโลห บลาก นา กัว โลว บัร อู ซีแง พวน วี. บอ นา เตต โลว บัร อู ซีแง พวน วี. บอ ดี กาง อูน เฆ โกรวกราม ตึอน มืร โลว บัร อา วี. 18 ดี แวง อี กอย บลาก นา เฆต ซีแง ดี อึณเตณ อี โฮะ นา กัว, เฆ บอ โลว บัร พวน วี. บอ ดี แวง ตี โลว บัร อา วี.

19 ดูอี เฆ ตี บอ มูห ดูอี ปี ร็อห เฆ แคง ครึร อาโควรา บอ แคง ครึร อาเมนรารี, แตห เฆ บัร มาโลห แคง โฮว เฌาพรา.

20 กาแต เฆ ดูอี อาโมยว อาเลวี ตี, อาฮียา บอ แบน ดา อี อึบ อี ยอด แมน โกรว แคง โฮว เฌาพรา บอ กาง โดง อูน เฆ โกรว หลู.

21 อาลาดาน อี มูห ดูอี อาโมยว อาเฆนราโซน, อี บอ มูห ดา ตาง แคง ครึร เฆ ตี, อัน มึห หลูกหลาน อี จืร อาเยฮีเอลี. 22 ฆอน อาเยฮีเอลี ตี จืร อาเฌทาม บอ อาโยวเอลัะ. ฆาย บอ แบน ดา ตาง อี อึบ อี ยอด แมน โฮว เฌาพรา.

23 แดง ตี บอ หลูกหลาน อามารัม, อาอีฌารา, อาเฮโบรว บอ อาออเฌลา แฮะ แบน ดูอี อี อึบ อี ยอด แมน โกรวกราม แคง โฮว เฌาพรา.

24 อาเซบูลา อี มูห ฆอน อาเฆโซม อี วี มูห ฆอน อาโมวแซ ตึอน, อัน บอ แบน ดา ตาง อี อึบ โกรวกราม เฌาพรา. 25 วอแว อาเฆโซม อี จืร อาเอลีเอฌา, อัน บอ วี มึห ฆอน อี จืร อาเรฮาบี. ฆอน อาเรฮาบี ตี บอ จืร อาเยซายา. ฆอน อาเยซายา บอ จืร อาโยวรัม. ฆอน อาโยวรัม บอ จืร อาฌีคารี. ฆอน อาฌีคารี บอ จืร อาเซลอมีด. 26 อาเซลอมีด เฆ บีนอง วอแว อัน, เฆ บอ แบน ดา ตาง อี อึบ โกรวกราม ดอน โมยว. อึณ บอ มูห คูนดีคัม อาดาวีด บอ เฆ ดา ตาง อี อึบ อี แยต ดูอี แคง ครึร เฆ, บอ เฆ ดา โบว ดา ตาง อี อึบ ดา ซึก แบน แหรณ, แบน มาย็อห อี แฮะ หลู อูน โกรวกราม เฆ ตี. 27 เฆ แฮะ ปึอน ตัห โกรวกราม มัง โมยว ดอ กาโฆห เฆ ดี รันซู. เฆ วี ตัห หลู แตห อึณ แบน โกรว ปี ดี จัร ปี ดี ตา แคง โฮว เฌาพรา. 28 อาว วัน มี แคะ ตี. อึณ บอ มึห บอ ปี หลู เฆ ดอ มูห โจว อาซามูเอน อี มูห ดูอี อี บยาน โฆรห เฌาพรา. อึณ มูห บอ อาซอลู อี มูห ฆอน อากีซา, บอ อาบานา อี มูห ฆอน อาเนรัะ, อายอพัะ อี มูห ฆอน นาง เจรูยา บอ เฆ อี เฮา อี แฮะ ดึอม หลู โกรว ตี. อาเซลอมีด เฆ บีนอง อัน ยี มูห ดา อี ยอด แมน โตต ดอน โมยว.

29 ดูอี อาโมยว อาอีฌารา อี จืร อาเคนานียา บอ ฆอน อัน, เฆ แฮะ ปึอน ดี แบน ดา กาณา อี อึบ มาน มืง บอ โลว ซูงพยาด อามู เฆ ดูอี อีซาเรลัะ.

30 แคง ดูอี อาโมยว อาเฮโบรว บอ มูห อาฮาซาบี บอ เฆ บีนอง วอแว อัน. เฆ กอย อู แหรณ ดี บู มาย็อห วี. เฆ มึห ซาเร ดอน อี. เฆ แฮะ มึห ปวน มึห อายา, แบน ดา กาณา อี อึบ ดูอี เรา ดูอี กาง บอ ยอด แมน ลอง ฆาน เฌาพรา กาแต เฆ ดูอี อีซาเรลัะ อี กอย บลาก นา เฆต ซีแง อึม แบลง ยอดาน. 31 โดบ แคง ฌาราง แปะ แฮะ แดม อูน เฆ, อาเยรียา แฮะ แบน ดา ตาง อี อึบ อี แยต ดูอี อาโมยว อาเฮโบรว ตี. ดอ แฮะ อึบ คูนดีคัม อาดาวีด มาน มืง อาดา พวน ฆึร ซีนัม, เฆ บอ โครห ดี ยอด แคง ฌาราง บอ ยึร, อึณ มึห ดูอี อี มึห อางยาน บอ นับ ดี โบง แบน โมยว แบน โมยว แคง ดูอี อาโมยว อาเฮโบรว ตี. เฆ บอ ยึร ดูอี ตี กอย แคง มืง เยฌีรา อี กอย แคง กาดาย มืง ฆีเลอาด. 32 คูนดีคัม อาดาวีด บอ ร็อห เฆ ดา ตาง อี อึบ อี แยต เฆ ดูอี อาโมยว อาเยรียา. เฆ กอย อา แหรณ ดี บู มาย็อห วี. อัน มืร แตห เฆ แบน ดา ตาง อี อึบ มาน มืง อัน บอ อึบ ดอน โมยว, แตห เฆ โดบ ซีคยา เฌาพรา. เฆ โลว อึบ ดูอี อาโมยว อารูเบน, อาโมยว อาฆัด บอ อาโมยว อามานาเซ อู กาแต.