1 วาย คูนดีคัม อาฮับ แฮะ ฮอต ยัม, เฆ ดูอี แคง มืง โมวอาบ บอ ลาย กาบัห ดี ดูอี อีซาเรลัะ. 2 อาฮาฌียา ตึอน บอ โจห ดี กาแบห อี กอย ดี โคบ โฮง อัน นา คร็อง แดง, บอ แบน เซา ดี อัน. อัน บอ จัร แดเจณ อัน ฮาว. อัน ต็อห ดี เฆ, “เบ ฮาว โดง กอย เฌา บาลัะเซโบว อี กอย มืง เอโครน ตึอน. เบ ดีหมอด ลอง เซา โอว นี, โยว อึณ ดี แกน, ตู แกน.”

3 ดอ อัน ตี อามู อามาด เฌาพรา บอ กาลาง ดี อาเอลียา อี ตัห มืง ทีซาบี ตึอน. อัน ต็อห, “แม ยีต ฮาว, แตห แม ลาย กาตูณ ดี เฆ แดเจณ คูนดีคัม ซามารี ตึอน, แตห แม กาลาง ดี เฆ ต็อห, ‘โกบ ทาง เบ อาว ฮู มึห เฌาพรา แคง มืง อีซาเรลัะ, เบ กอ โลว ฮาว ดีหมอด เฌา บาลัะเซโบว ดี มืง เอโครน.’ 4 โกบ ปาย ตี เฌาพรา วี กาลาง ต็อห, ‘แม อาว ฮู ปึอน ยีต แดง กาโช็ง โดง อีด แม ตี. แม ดี ยัม อาคัร หมาน.’” แฮะ ฮอต, อาเอลียา บอ ฮาว.

5 แดเจณ อาฮาฌียา เฆ ตึอน บอ วี ตัห โดง กอย คูนดีคัม เฆ. อัน บอ ดีหมอด เฆ ต็อห, “อึณ ปาย เหมา เบ วี ตัห.” 6 แดเจณ อัน, เฆ บอ กาโพรม ดี กาลาง ดี อัน. เฆ ต็อห, “อึณ มึห ดูอี อู วี ลาย กาตูณ ดี เย, อัน กาลาง ดี เย. อัน ต็อห, ‘แตห เบ วี เวณ โดง กอย คูนดีคัม อี จัร เบ ตัห ตึอน, กาลาง ดี อัน แคะ ปี ต็อห เฌาพรา. อัน ต็อห, “โกบ ทาง แม อาว ฮู มึห เฌาพรา แคง มืง อีซาเรลัะ นี, แม กอ โลว ฮาว ดีหมอด เฌา บาลัะเซโบว แคง มืง เอโครน ตึอน. โคว อัน ตี, แม อาว ฮู ปึอน ยีต แดง กาโช็ง โดง แฮะ โฮะ อีด แม ตี, แม อาว ฮู ปึอน วี โลง. แม ดี ยัม อาคัร หมาน.”’”

7 คูนดีคัม วี ดีหมอด เฆ ต็อห, “ดูอี ปี ลาย กาตูณ เบ ตี, อี กาลาง โฆรห ฌึร ตี, อัน มูห ดูอี ปาย เหมา?”

8 เฆ ตึอน วี ต็อห, “ดูอี วี ตี มึห ฮึก กืน. อัน มึห ฮึก บอ โดว บอ ชึบ แซะ ฮูน ดี ณอย อัน.” อัน วี ต็อห, “แฮะ มูห อาเอลียา, ดูอี อี ตัห มืง ทีซาบี ตึอน.”

9 อัน บอ จัร ดา ตาง อี อึบ ดา ซึก พัน ฆึร วี, แตห อัน บอ เฆ พัน ฆึร วี ตึอน ฮาว ฌัม โดง กอย อาเอลียา. อาเอลียา ยี กอย แดง นอน. เฆ บอ ตัห ฌัม โดง กอย อัน ตี, วี กาลาง ดี อัน ต็อห, “อึย แม ดา อี ปี ตึย เฌาพรา, คูนดีคัม แฮะ ต็อห, แตห แม วี โลง, ตัห โดง กอย อัน.”

10 อาเอลียา วี กาลาง ดี เฆ ดูอี ปี ตึย คูนดีคัม ตึอน วี ต็อห, “เซ แฮะ หมาน มูห โอว ดา อี ปี ตึย เฌาพรา, แตห เงา ตัห แคง ฆางหราว, แตห อึณ กาซึม บอ แม อี อึบ ดา ซึก, บอ ดูอี แม พัน ฆึร วี อี โดบ แม.” อัน แฮะ ฮอต กาลาง, เงา บอ ตัห แคง ฆางหราว บอ กาซึม เฆ ตึอน บอ อัน บอ ดูอี อี โดบ อัน พัน ฆึร วี, เฆ บอ กาซึม โตต.

11 คูนดีคัม ปี วี จัร ปอ อู พึง อี มูห พัน ฆึร วี บอ ดา อี อึบ เฆ, แตห เฆ วี ฮาว. เฆ บอ กาลาง ต็อห, “อึย แม ดา อี ปี ตึย เฌาพรา, คูนดีคัม แฮะ ดัม ต็อห, แตห แม วี ตัห ครัน ครัน.”

12 อาเอลียา ปี วี กาลาง ดี เฆ ต็อห, “เซ แฮะ หมาน, มูห โอว ดา อี ปี ตึย เฌาพรา, แตห เงา เลห แคง ฆางหราว, แตห อึณ กาซึม แม บอ ดูอี เฆ อี โดบ แม พัน ฆึร วี ตี.” อัน แฮะ ฮอต กาลาง, เฌาพรา บอ แตห เงา โจห แคง ฆางหราว, โลง กาซึม บอ ดา อี อึบ พึง ตี บอ ดูอี พัน ฆึร วี ตึอน. เฆ บอ กาซึม โตต.

13 แฮะ ฮอต, คูนดีคัม ปี วี จัร ปอ อู พึง ฮาว. ดา อี อึบ ดา ซึก พัน ฆึร วี บอ ดา ซึก พัน ฆึร วี, เฆ วี ฮาว, แฮะ โนะ โอย พึง บอ โอย เฌณ คา นี. เฆ พึง ฮาโอย ตี แฮะ ฮอต ตัห ฌัม, ดา อี อึบ เฆ บอ ครึบเครา ดี อาต อาเอลียา. เฆ บอ ดองบาน อัน ต็อห, “อึย แม ดา อี ปี ตึย เฌาพรา, โอว หมาณ, แกวะ แตห เย ยัม. บอ โอว, บอ เฆ ดูอี อี โดบ โอว พัน ฆึร วี นี, แตห แม กาเว. 14 เงา แฮะ โจห ตัห แคง ฆางหราว, แฮะ กาซึม อา พึง ตึอน, บอ ดูอี อึบ เฆ แฮะ กาซึม โตต. ดอ ตี นี โอว หมาณ, แตห เย ลอด ยัม.”

15 ดอ อัน ตี อามู อามาด เฌาพรา บอ กาลาง ดี อาเอลียา ต็อห, “แตห แม โลง โดบ เฆ, อาว โลว โยว เฆ.” อาเอลียา บอ โลง โดบ เฆ ตึอน, ฮาว โดง กอย คูนดีคัม. 16 อัน บอ กาลาง ต็อห, “เฌาพรา ต็อห ดี แม, แตห แม แฮะ จัร ดีแบ แม, แตห เฆ ฮาว ดีหมอด ดี เฌา บาลัะเซโบว ดี มืง เอโครน ตึอน. โกบ ทาง แม, มืง อีซาเรลัะ นี อาว มึห เฌาพรา อี ปึอน ดีหมอด, แม แฮะ โบง ฌึร ตี. โกบ อึณ ปาย ตี แม ตู ปึอน ยีต โดง อีด แม. แม ตู ปึอน โลง. แม ดี กาดูห ดี ยัม อาคัร หมาน.”

17 ปาย ตี คูนดีคัม ตึอน บอ ยัม. อึณ บอ หมาน แคะ ปี ต็อห เฌาพรา ดี อาเอลียา. โกบ ตู มึห คูนดีคัม อาฮาฌียา ฆอน อีมาย, อาโยวรัม บอ วี แบน คูนดีคัม. อาเยโฮวรัม อี มูห ฆอน อายอซาพาด แฮะ แบน คูนดีคัม แคง มืง ยูดา อาดา อา ซีนัม. ดอ อัน ตี อาโยวรัม แฮะ แบน คูนดีคัม อี อึบ มืง อีซาเรลัะ.

18 ลอง แปะ แฮะ โบง อาฮาฌียา อี ซี ฆีด เฆ ตึอน, แฮะ แดม อูน แคง บับ ลอง คูนดีคัม แคง มืง อีซาเรลัะ.