1 คูนดีคัม อาดาวีด ตึอน แฮะ กัด กาเซา. อาซาก อัน มืร แฮะ กืน. เฆ ปลึก ฮึบ ดี อัน มืร, อาว ฮู ซีอูณ. 2 โคว อัน ตี, แดเจณ อัน บอ ต็อห ดี อัน, “แตห เอ เหรต ดีบยา ชีด อี ซี หนึม คอ อู วี, ดัว ดี แม คูนดีคัม, แตห อัน กอย รึม โดบ แม, ยอด ลึมลา แม, แตห อัน อีด โดบ แม, แตห อึณ ซีอูณ ดี แม.”

3 ปัน ตี เฆ บอ เหรต ดีบยา อี ชีด แคง มืง อีซาเรลัะ ตึอน ดอน โปละ. เฆ บอ ยึร นาง เอพีซาก, อัน มูห ดูอี ตัห มืง ซูนีม. เฆ บอ ตึย ฮาว อัน โดง กอย คูนดีคัม. 4 นาง ตึอน ยี ชีด กาเซา. อัน บอ ลึมลา คูนดีคัม. คูนดีคัม ยี ตู อีด รึม, กอย รึม โดบ อัน.

5 วาย ตี, อึณ มึห อาตอนียา อี มูห ฆอน นาง ฮากีด ตึอน. อัน โจะ โดว บรีม อัน ต็อห, “โอว อี ดี แบน คูนดีคัม.” โคว, อัน แตห อี อึณปราย แรน มังปร็อง เฆ ลักเลา บอ ดูอี พัน ฆึร วี, แตห เฆ ฮาว แยต ดี อาต อัน. 6 ฆูณ อัน ยี ตู ดึอม แคร อัน, แตห อัน โบง อี ล็อะ น็อห อัน, ตู ดึอม ต็อห, “เหมา อึณ ปาย ปี โบง แม ปาย ตี?” อาตอนียา แฮะ ชีด กาเซา. อัน แฮะ ฆึอด ดาม อาบาซาโลม.

7 อัน บอ ซังคยาง ดี อายอพัะ อี มูห ฆอน นาง เจรูยา. อัน บอ ซังคยาง บอ ดี ดา อี หลู ดี เฌาพรา อี จืร อาบาทา ตึอน, แตห ฆาย กอย บลาก อัน. แฮะ ฮอต, ฆาย จอย อัน.

8 อึณ ยี มูห ดา อี หลู ดี เฌาพรา อี จืร อาฌาโดก บอ อาบีนายา อี มูห ฆอน อาเยฮอยาดา ตึอน, ดา อี บยาน โฆรห เฌาพรา อี จืร อานาทาน บอ อาซีมี ฆาย อาเรอี บอ ดา โบว อี มึห โปลม ตาง, เฆ บอกาเฆลียด กอย รึม โดบ อาดาวีด, ตู ฮาว บลาก อาตอนียา.

9 อาตอนียา ตึอน บอ หลู มัก อาโล็ง เฆ มาบู. อัน บอ ง็อห โดว เฆ ตี โคบ มาว จอแฮลีก อี กอย กาตัด โดง จืร เอโรวเก. อัน บอ บาง วา อัน บอกาเฆลียด อี มูห ฆอน คูนดีคัม อาดาวีด. อัน บาง บอ ดูอี อายูดา อี มูห อามู อามาด คูนดีคัม ตึอน. 10 อัน ยี ตู แดะ ตู บาง ดา อี บยาน โฆรห เฌาพรา อี จืร อานาทาน, อาบีนายา บอ ดา โบว ตึอน. อัน มืร ตู บาง วา อัน อี จืร อาซาโลวโมว ตึอน.

11 ปัน ตี อานาทาน ตึอน บอ กาลาง ดี นาง เบดเซบา อี มูห มา อาซาโลวโมว ตึอน. อัน ดีหมอด ต็อห, “แม นาง แฮะ ยึร ลอง อาตอนียา อี มูห ฆอน นาง ฮากีด ตึอน? อัน แฮะ ปรา ดี แบน คูนดีคัม, ตู แตห คูนดีคัม อาดาวีด นับ. 12 โกบ อึณ ปาย ตี ดอ ตี นี โอว ดี แตห อากยาม อางยาน ดี แม, แตห อึณ คยอด อาซาก แม บอ อาซาก อาซาโลวโมว อี มูห ฆอน แม. 13 แตห แม วี ลึบ ฮาว โดง กอย คูนดีคัม อาดาวีด, วี ต็อห, ‘อึย แม คูนดีคัม อี อึบ โอว, แม แฮะ ดึอม กาแซณ ดี โอว ต็อห, “ฆอน แม อี จืร อาซาโลวโมว อี ดี แบน คูนดีคัม ปลูะ โอว. อัน ดี อึบ มืง วาย โอว.” แม แฮะ ฮอต กาลาง อูน ปาย ตี อาว มูห? เซ อึณ ปาย ตี เหมา อึณ ปาย อาตอนียา ซอ วี ปึอน ดี อึบ บึง มืง?’ 14 ดอ ซีงยา กาลาง แม โฆรห ตี ดี คูนดีคัม, โอว ดี วี ลึบ ตัห จอย แม กาลาง โฆรห.”

15 อัน แฮะ ฮอต กาลาง โฆรห ตี, นาง เบดเซบา ตึอน บอ ลึบ ฮาว แคง อีด โดง กอย คูนดีคัม อี แฮะ กัด กาเซา. นาง เอพีซาก อี ตัห มืง ซูนีม ตึอน บอ ยอด ลึมลา อัน. 16 นาง เบดเซบา บอ ครึบเครา กรึบ คูนดีคัม. แฮะ ฮอต, คูนดีคัม บอ ดีหมอด อัน ต็อห, “มาเซ ปี โลว แม?”

17 อัน บอ ต็อห, “อึย แม ดา กาณา อี อึบ โอว, แม แฮะ ดึอม ฆาว ปวน เฌาพรา อี มูห เฌาพรา ปี กรึบ แม. แม แฮะ ดึอม ดืง แตห เฌาพรา โทม. แม แฮะ กาแซณ ดี โอว อี มูห แดเจณ แม. แม แฮะ ต็อห, ‘ฆอน แม อี จืร อาซาโลวโมว อี ดี แบน คูนดีคัม ปลูะ โอว. อัน ดี อึบ มืง วาย โอว.’ 18 แม ยอด, ดอ ตี นี, อาตอนียา ตึอน แฮะ วี แบน คูนดีคัม. แม คูนดีคัม อี มูห ดา กาณา อี อึบ โอว, แม ยี ตู นับ ลอง อัน ตี. 19 อัน แฮะ หลู มามัก เฆ มาบู. อัน บอ แดะ บอ บาง แคะ กอย ฆอน แม คูนดีคัม. บอ ดา อี หลู ดี เฌาพรา อี จืร อาบาทา, บอ อายอพัะ อี อึบ ดา ซึก แม ตึอน, อัน แฮะ บาง. อี มูห อาซาโลวโมว, อัน ยี ตู แดะ, ตู บาง. 20 อึย แม คูนดีคัม อี อึบ โอว, เฆ ดูอี อีซาเรลัะ บอกาเฆลียด บัร ดี ยอด, โยว แม ดี แตห อาเซ อึบ มืง ตี วาย แม คูนดีคัม นี. 21 เซ แม ตู กาลาง อูน ซีคยา, เซ แม คูนดีคัม ฮี ยัม ปี ดา ดา แม เฆ ตึอน, บอ โอว บอ ฆอน โอว อี จืร อาซาโลวโมว, ยาย ดี กาดูห ดี คัม ดูก กาเซา.”

22 ดอ กาลาง อัน โฆรห ตี ดี คูนดีคัม, ดา อี บยาน โฆรห เฌาพรา อี จืร อานาทาน บอ ลึบ ตัห. 23 อี เฮา บอ กาลาง ดี คูนดีคัม ต็อห, “ดา อี บยาน โฆรห เฌาพรา อี จืร อานาทาน แฮะ ตัห.” แฮะ ฮอต, อานาทาน บอ ตัห ฌัม โดง กอย คูนดีคัม. อัน บอ กรึบ ฆึบ ดี อาต คูนดีคัม ต็อห, 24 “อึย แม คูนดีคัม, แม มูห ดา กาณา อี อึบ โอว. กาลาง ดี โอว, อึณ มูห แม อี แฮะ ต็อห, ‘อาตอนียา อี ดี แบน คูนดีคัม ปลูะ โอว. อัน ดี อึบ มืง วาย โอว?’ อึณ หมาน, แม แฮะ มึห ดี ต็อห ปาย ตี? 25 อาตึร นี อาตอนียา แฮะ โลง, แฮะ หลู กืน มัก อาโล็ง อี ฆลัณ. บอ มาบู อัน ง็อห กืน. อัน แฮะ แดะ แฮะ บาง แคะ กอย ฆอน แม บอ ดา โบว อี อึบ ดา ซึก บอ ดา อี หลู ดี เฌาพรา อี จืร อาบาทา ตึอน. เฆ ตี แฮะ กาโพรม ดี โฮม ดี เดียง กอย รึม โดบ อัน. เฆ ดัด ต็อห, ‘แตห อาซาก อาตอนียา กอย เซเซ.’

26 อี มูห โอว บอ อาฌาโดก อี หลู ดี เฌาพรา บอ อาบีนายา อี มูห ฆอน อาเยฮอยาดา บอ อาซาโลวโมว อัน ยี ตู แดะ, ตู บาง. 27 แม คูนดีคัม, แม มูห ดา กาณา อี อึบ โอว, แตห แม กาลาง ดี โอว, อาเซ อี ดี แบน คูนดีคัม อี ดี ปลูะ แม? แฮะ หมาน, อึณ มูห แม, อี แฮะ แตห อัน โบง ปาย ตี แกวะ แตห เย นับ?”

28 ปัน ตี คูนดีคัม อาดาวีด วี ต็อห, “แดะ นาง เบดเซบา ตัห.” แฮะ ฮอต, นาง ตึอน วี ตัห โดง กอย คูนดีคัม. วี กอย นา อาต อัน. 29 คูนดีคัม บอ วี ดืง ต็อห, “เฌาพรา แฮะ นับ, โอว ตู กาโลว. อัน เฌา แฮะ คยอด อาซาก โอว, แตห โอว ลอด แคง ดูก ดอน โมยว. 30 อาตึร นี, โอว ดี โบง แคะ ปี ดึอม ดืง โอว, แตห บอ เฌาพรา โทม อี มูห เฌาพรา ปี กรึบ ดูอี อีซาเรลัะ. โอว แฮะ ดึอม ต็อห, ‘ฆอน แม อี จืร อาซาโลวโมว อี ดี ปึอน ดี แบน คูนดีคัม ปลูะ โอว. อัน ดี อึบ มืง วาย โอว.’ โอว ดี โบง แตห อึณ ปาย ตี อาตึร นี.”

31 นาง เบดเซบา บอ มูด ฆึบ ดี อาต คูนดีคัม. อัน วี ต็อห, “แตห แม คูนดีคัม อี อึบ โอว กอย เซเซ.”

32 คูนดีคัม วี ต็อห, “แดะ อาฌาโดก อี มูห ดา อี หลู ดี เฌาพรา บอ อานาทาน อี มูห ดา อี บยาน โฆรห เฌาพรา บอ อาบีนายา อี มูห ฆอน อาเยฮอยาดา ตึอน, แตห เฆ ตัห.” เฆ ตึอน บอ ลึบ ตัห ฌัม ดี อาต คูนดีคัม. 33 คูนดีคัม วี ต็อห ดี เฆ, “แตห เบ แดะ แคะ กอย ดูอี อี โดบ โอว. แตห เบ แดะ บอ ฆอน โอว, อี จืร อาซาโลวโมว, แตห อัน ป็อะ มาโลว โอว, ฮาว ดี โตห อึม อี จืร ฆีโฮน. 34 เบ ฮี ฌัม โดง ตี, อาฌาโดก อี มูห ดา อี หลู ดี เฌาพรา บอ อานาทาน อี บยาน โฆรห เฌาพรา, ฆาย โลว พ็อห นามัน ดี ฆีณ อัน, แตห อัน แบน คูนดีคัม อี อึบ มืง อีซาเรลัะ. แฮะ ฮอต, เบ โลว บูด เวา บอ ดัด ตาง ต็อห, ‘แตห คูนดีคัม อาซาโลวโมว กอย เซเซ.’ 35 วาย ตี เบ โลว วี กาโพรม ดี ตัห โดบ อัน, แตห อัน ตัห ตูต แดง มาลาง โอว, แตห อัน วี อึบ มืง กาดาง โอว. โอว แฮะ แตห อัน อึบ ดูอี อีซาเรลัะ บอ ดูอี อายูดา.”

36 อาบีนายา อี มูห ฆอน อาเยฮอยาดา ตึอน, อัน วี ต็อห, “แตห อึณ แบน ปาย ตี. เฌาพรา อี มูห เฌาพรา ปี กรึบ แม ดา กาณา โอว, แตห บอ อัน โพรม ปี ต็อห แม ตี. 37 เฌาพรา แฮะ กอย รึม โดบ แม คูนดีคัม ปาย เหมา, แตห อัน วี กอย รึม โดบ อาซาโลวโมว ปาย ตี. ดอ อึบ อัน มืง เอ แตห อัน มึห อาพูง ดังโคว ตาง หลึอม อาพูง ดังโคว แม คูนดีคัม อาดาวีด.” 38 ปัน ตี อาฌาโดก อี มูห ดา อี หลู ดี เฌาพรา บอ อานาทาน อี บยาน โฆรห เฌาพรา บอ อาบีนายา อี มูห ฆอน อาเยฮอยาดา บอ เฆ ดูอี เคเรซี เฆ ดูอี เบลัะซี เฆ บอ กาโพรม ดี ฮาว แตห อาซาโลวโมว ป็อะ มาโลว คูนดีคัม อาดาวีด, แตห อัน ฮาว ดี โตห อึม ฆีโฮน ตึอน. 39 อาฌาโดก อี มูห ดา อี หลู ดี เฌาพรา, อัน บอ ดึห เลห กาเปา นามัน แคง ทึบ บีก บอด ตึอน, บอ พ็อห นามัน ตี ดี ฆีณ อาซาโลวโมว, แตห อัน แบน คูนดีคัม. แฮะ ฮอต, เฆ บอ บูด นึง แป. ดูอี เฆ ตึอน บอกาเฆลียด บอ กาโพรม ดี ดัด ต็อห, “แตห คูนดีคัม อาซาโลวโมว นี กอย เซเซ.” 40 แคะ กอย ดูอี บอกาเฆลียด, เฆ บอ กาโพรม ดี วี โดบ ตัห อัน. เฆ บอ บูด เวา บอ โคย กาเซา. เฆ บอ โบยว, แตห กาดาย กอ ดีเยณ โกบ ซีนัน ซีนืง เฆ.

41 อาตอนียา บอ เฆ อี ลาย โพรม โดบ อัน ตึอน, เฆ แฮะ ฮอต โฮม, แฮะ ฮอต เดียง, เฆ บอ ยึร โฆรห ซีนัน ซีนืง ตึอน. อายอพัะ บอ ยึร ฮัม บูด เวา ตึอน. อัน ดีหมอด ต็อห, “โฆรห อี ซีนัน ซีนืง แคง มืง บอ มืง ตี, อึณ มูห โกบ มาเซ?”

42 ดา อี หลู ดี เฌาพรา ตึอน, อี จืร อาโยวนาทาน อี มูห ฆอน อาบาทา, อัน บอ ตัห. อาตอนียา บอ ต็อห ดี อัน, “ตัห ตัห, แม มูห ดูอี บอด. แม มืร ดี กาลาง ลอง บอด.”

43 อาโยวนาทาน วี ต็อห ดี อาตอนียา, “อาว มูห ลอง บอด. ดา กาณา เอ อาดาวีด แฮะ ดาง อาซาโลวโมว แตห อัน แบน คูนดีคัม. 44 คูนดีคัม แฮะ จัร อาฌาโดก อี มูห ดา อี หลู ดี เฌาพรา บอ อานาทาน อี บยาน โฆรห เฌาพรา บอ อาบีนายา อี มูห ฆอน อาเยฮอยาดา บอ ดูอี เคเรซี เฆ ดูอี เบลัะซี, แตห เฆ ฮาว โดบ อาซาโลวโมว, แตห อัน ป็อะ มาโลว คูนดีคัม ตึอน.

45 อาฌาโดก อี มูห ดา อี หลู ดี เฌาพรา บอ อานาทาน อี บยาน โฆรห เฌาพรา แฮะ ตัห ฌัม ดี โตห อึม ฆีโฮน, แฮะ พ็อห นามัน ดี ฆีณ อัน, แตห อัน แบน คูนดีคัม. แฮะ ฮอต, เฆ บอ วี ตัห. เฆ บอ โคย กาเซา. โฆรห เฆ ซีนัน ซีนืง แคง มืง บอ มืง. โฆรห ปี ยึร เบ ตึอน แฮะ มูห โฆรห เฆ ตี. 46 อาว วัน แคะ ตี. อาซาโลวโมว แฮะ ฮอต ตูต แดง มาลาง อาดาวีด. 47 เฆ อามู อามาด คูนดีคัม แฮะ ฮอต กาโพรม ดี ฮาว ม็องการา แตห ดี คูนดีคัม อาดาวีด. เฆ บอ ต็อห, ‘เฌาพรา อี มูห เฌาพรา แม, แตห อัน อืบ มยูก อาซาโลวโมว, แตห อัน ตาง หลึอม แม, แตห อาพูง ดังโคว อัน ตาง หลึอม แม.’ คูนดีคัม มืร มูด ฆึบ แดง กาโช็ง อีด อัน ต็อห, 48 ‘อึย แม เฌาพรา อี มูห เฌาพรา ปี กรึบ ดูอี อีซาเรลัะ, โอว อืบ แม เฌา. อาตึร นี, แม แฮะ เฆฌู โอว, แตห โอว ยึร อี ดี ปลูะ โอว, แบน คูนดีคัม วาย โอว.’”

49 ปัน ตี แคะ กอย เฆ แคต อาตอนียา ตึอน บอ โยว บอ กาโพรม ดี เตา ฮาว อู วี อู บลาก. 50 อาตอนียา มืร โยว อาซาโลวโมว. โคว, อัน บอ ฮาว โดง หลู เฆ ดี เฌาพรา, ปา กาโตต บัต อี กอย ดี กาโช็ง หลู.^a 51 อี เฮา บอ กาลาง ดี อาซาโลวโมว ต็อห, “อาตอนียา ตึอน แฮะ โยว แม คูนดีคัม. อัน แฮะ ปา กาโตต บัต อี กอย ดี กาโช็ง หลู. อัน ต็อห, ‘แตห คูนดีคัม อาซาโลวโมว ดืง กาแซณ ดี โอว อาตึร นี, แกวะ แตห อัน ง็อห ยัม โอว ดี มาปัวะ ลาง.’”

52 อาซาโลวโมว วี ต็อห, “เซ อัน บอ มูห ดูอี บอด, โอว ตู โบง มาเซ ดี อัน. เซ ฮี ยึร หมาบ อัน, อัน โลว ยัม.” 53 คูนดีคัม อาซาโลวโมว บอ จัร ดูอี อัน ฮาว, แตห เฆ ดึห เลห อัน ดี กาโช็ง หลู ตึอน. อัน บอ ตัห มูด ดี อาต คูนดีคัม อาซาโลวโมว. แฮะ ฮอต, คูนดีคัม อาซาโลวโมว วี ต็อห ดี อัน, “แตห แม เวณ ดี กาง แม.”