1 อาดาวีด ตึอน แฮะ ราม กาตัด ดี ยัม. อัน กาลาง อูน โฆรห ดี อาซาโลวโมว อี มูห ฆอน อัน.

2 อัน ต็อห, “อาว เหลณ โอว ดี บอ ยัม ปี ดอน อี แดง กาดาย นี. โคว อึณ ปาย ตี แตห แม มึห โปลม, แตห แม โบง ปี กาอาบ อีมาย โบง. 3 แตห แม โทม โฆรห เฌาพรา อี มูห เฌาพรา ปี กรึบ แม. แตห แม โดบ ปี กาลาง อูน อัน. แตห แม โดบ อากยาม อางยาน บอ ดารา ปี อูน อัน เฌา. อัน เฌา แฮะ ดึอม แดม อูน ลอง อัน ตี แคง บับ ดารา อาโมวแซ ตึอน. เซ แม โบง ปาย ตี แม บอ ฮาว นา เหมา, แม บอ โบง โมยว เหมา, อาว ชึม มาเซ. 4 ปาย ตี เฌาพรา ดี บอ คัม กาดีก ซัดฌา ปี ดึอม ดัว อัน ดี โอว. อัน แฮะ ดึอม ต็อห, ‘เซ ฆอน แม เฆ หลูกหลาน แม บอ โดบ ซีคยา อึณเตณ ปี โลว ว็อะ เฆ, เซ เฆ บอ ดึห โตต แคะ กอย น็อห พึอม เฆ, โดบ เซเซ นา มูห นา หมาน ปี ต็อห โอว ดอน โมยว, เซ เฆ โบง ปาย ตี เฆ ดี บอ ปึอน ดี อึบ มาน มืง ปี อึบ แม เซเซ.’

5 แม มืร แฮะ นับ ลอง ปี โบง อายอพัะ อี มูห ฆอน นาง เจรูยา ตึอน. อัน แฮะ ง็อห ดา โบว โอว อา วี อี อึบ ดา ซึก ดูอี อีซาเรลัะ. อัน แฮะ ง็อห อาบานา อี มูห ฆอน อาเนรัะ บอ อามาซา อี มูห ฆอน อาเยซา. ดอ ตู กาโฆห เอ, อัน แฮะ วี โบง เวียะ ดี ฆาย แปะ แฮะ โบง ฆาย ดอ ลาย กาโฆห เอ. อัน แฮะ ง็อห แวน ปาย ตี แตห อึณ แบน หมาบ ดี อัน. อึณ ปี แซะ อี รีด ดี ณอย อัน, บอ คูดีณ ปี ชึบ อัน, อึณ แบ หนาม ดูอี ตู มึห หมาบ. 6 แตห แม โบง ดี อัน แคะ มึห แม อางยาน. แม ยี โลว โบง แกวะ แตห อัน กัด ยัม ดาคึย.

7 อึณ ยี มูห ฆอน อาบาจี อี มูห ดูอี ฆีเลอาด เฆ ตึอน, แตห แม เฆฌู เฆ, แตห เฆ ปึอน ดี ลึบ แคง พึง เฆ อี โฮม ดี รึม โดบ แม. โคว, ดอ กาดูห โอว ดี เตา ดี อาบาซาโลม อี มูห อีกัด แม ตึอน, เฆ ตี แฮะ โบง เฆฌู ดี โอว.

8 บอ อาซีมี อี มูห ฆอน อาฆีรา, อี กอย เรา บาฮูรีม, อี มูห ดูอี อาโมยว อาเบนยาม ตึอน, อัน ซี กอย โดบ แม. อัน แฮะ ดึอม ดืง, แฮะ เอห กาเซา โอว ดอ ฮาว โอว ดี มืง มาฮานาอีม ตึอน. ดอ วี ตัห โอว, อัน บัร ดี รวห โอว ดี แบลง ยอดาน ตึอน. โอว มืร แฮะ ดืง แตห บอ เฌาพรา โทม. โอว แฮะ ต็อห ดี อัน, ‘โอว ตู แตห แม ยัม ดี มาปัวะ ลาง.’ 9 มาแล, วี ตี แม แกวะ ต็อห, อัน ตู มึห หมาบ. โคว, แม แฮะ มึห อางยาน. แม ดี บอ นับ, อึณ โลว โบง ปาย เหมา ดี อัน. ฮึก ฆีณ อัน ปี บอ โบห ลูย, แตห แม ง็อห ยัม อัน, แตห อัน โลง มืง มารานัะ.” แคะ ตี อาดาวีด แฮะ ดัว อากยาม อางยาน ดี อาซาโลวโมว.

10 วาย อัน ตี อาดาวีด บอ ยัม โดบ ดา ดา อัน เฆ ตึอน. เฆ บอ ดีบ อัน แคง มืง อัน. 11 อาดาวีด แฮะ อึบ บึง มืง อีซาเรลัะ, แฮะ โนะ พวน ฆึร ซีนัม. อัน แฮะ อึบ กอย แคง มืง เฮโบรว อาดา บู ซีนัม บอ อึบ กอย แคง มืง เยรูซาแลม โอย ฆึร ดี โอย ซีนัม. 12 อาซาโลวโมว บอ วี อึบ บึง มืง วาย แฮะ ยัม ฆูณ อัน อี มูห อาดาวีด. อัน บอ กอย ซีคยา, อาว มึห อี ซี กาบัห ดี อัน.

13 วาย ตี, อาตอนียา อี มูห ฆอน นาง ฮากีด ตึอน, อัน วี ตัห โดง กอย นาง เบดเซบา อี มูห มา อาซาโลวโมว ตึอน. นาง เบดเซบา ดีหมอด อัน ต็อห, “แม แฮะ ตัห ดาคึย?” อัน วี ต็อห, “โอว แฮะ ตัห ดาคึย.”

14 อัน ปี วี ต็อห, “โอว มึห ปี ซี กาลาง ดี แม.” ปัน ตี นาง ตึอน วี ต็อห, “แตห แม กาลาง. อาว ลืก.”

15 อัน บอ ต็อห, “แม แฮะ นับ ลอง โอว ซอ ฮอต อึบ มาน มืง นี. ดูอี อีซาเรลัะ บอกาเฆลียด แฮะ โพรม ดี ตัห โดบ โอว, แตห โอว แบน อี อึบ บึง โตต มาน มืง. มาแล, มาน มืง แปะ แฮะ วี บลืง, แปะ แฮะ วี มูห วา โอว, อี วี อึบ. โคว, เฌาพรา ซี แตห อึณ แบน ปาย ตี. 16 ดอ ตี นี, โอว ซี หมาณ อู โมยว ดี แม. แม แกวะ แวน โฆรห ปี หมาณ โอว.” นาง ตึอน วี ต็อห, “แตห แม กาลาง.”

17 อัน บอ ต็อห, “โอว หมาณ, แตห แม กาลาง ดี คูนดีคัม อาซาโลวโมว, แตห โอว ดึห นาง เอพีซาก อี ตัห มืง ซูนีม ตึอน, แตห อัน แบน อีบึณ โอว. แกวะ แตห คูนดีคัม แวน โฆรห แม ตี.”

18 นาง เบดเซบา วี ต็อห, “แฮะ มูห. โอว ดี กาลาง ดี คูนดีคัม ดาง แม.”

19 นาง เบดเซบา บอ ฮาว ฌัม โดง กอย คูนดีคัม อาซาโลวโมว ตึอน, แตห อัน ปึอน ดี กาลาง ดี อัน ดาง อาตอนียา ตึอน. ฆอน อัน อี มูห คูนดีคัม บอ ยีต ฮาว รวห มา อัน. อัน แฮะ ฮอต มูด ฆึบ บอ วี ตูต แดง มาลาง อัน. อัน บอ จัร เฆ ฮาว ดึห มาลาง ปอ อู โบ็ง, แตห มา อัน ตูต. มา อัน บอ ตูต บลาก อาอัห อัน. 20 ปัน ตี อัน บอ กาลาง ต็อห, “โอว ซี หมาณ อาเร ตู ตาง ดี แม. แม แกวะ แวน โฆรห มา แม.” คูนดีคัม ตึอน วี ต็อห, “แตห แม หมาณ, โอว ตู แวน โฆรห แม, มา.”

21 นาง ตึอน บอ ต็อห, “โอว หมาณ, แตห แม ดัว นาง เอพีซาก อี ตัห มืง ซูนีม ตึอน, แตห อัน แบน อีบึณ อีกัด แม อี จืร อาตอนียา.”

22 คูนดีคัม อาซาโลวโมว วี ต็อห ดี อัน, “อึณ ปาย เหมา, ปี หมาณ แม นาง เอพีซาก อี ตัห มืง ซูนีม ตี ดาง อาตอนียา? อัน มูห อีกัด โอว. แม ปี ตู หมาณ บอ มาน มืง เฆ นี แตห ดี อัน. หมาณ บอ ดา อี หลู ดี เฌาพรา อาบาทา, บอ อายอพัะ อี มูห ฆอน นาง เจรูยา ตึอน ดัว ดี อัน.”

23 คูนดีคัม อาซาโลวโมว บอ ดืง แตห บอ เฌาพรา โทม. อัน ต็อห, “แตห เฌาพรา ดัม หมาบ กาเซา ดี โอว, เซ โอว ตู วี ง็อห อาซาก อัน โกบ หมาณ อัน ฌึร ตี. 24 ดอ ตี นี, เฌาพรา แฮะ แตห โอว อึบ ซีคยา มาน มืง ฆูณ โอว อี มูห อาดาวีด. เฌาพรา แฮะ จูห ดี โบง ดี โอว, แตห อึณ แบน ปี ดัว อัน กาดีก ซัดฌา ลอง หลูกหลาน โอว ดี ลาย ดี ดาม แบน คูนดีคัม. โคว, อาตอนียา โลว ยัม อาตึร นี.” 25 อัน แฮะ ฮอต กาลาง โฆรห ตี, อัน บอ จัร อาบีนายา, อี มูห ฆอน อาเยฮอยาดา, แตห อัน ฮาว ง็อห ยัม อาตอนียา.

26 อี มูห ดา อี หลู ดี เฌาพรา อี จืร อาบาทา ตึอน, คูนดีคัม บอ ต็อห ดี อัน, “แม ฮาว ดี มืง อานาโทด ดี โดง นา โดง รัณ แม ตึอน. แฮะ กาอาบ โอว ง็อห ยัม แม. มาแล, ดอ ตี นี โอว หณัม แตห แม ยัม โกบ แยต แม ดี อาต ฆูณ โอว ดอ ดึห ตัห เบ ฌีดืก เฌาพรา อี มูห เฌาพรา อี อึบ โตต ดอน โมยว. แม มืร แฮะ คัม ดูก แบน โมยว แบน โมยว ปี ดึอม คัม ฆูณ โอว.” 27 ปาย ตี อาซาโลวโมว อาว ฮู แตห อัน แบน ดา อี หลู ดี เฌาพรา. อึณ บอ แบน ปี ดึอม กาลาง เฌาพรา ลอง ครึร อาเอลี อี ดึอม กอย ดี มืง ซีโลว ตึอน.

28 อึณ ยี มูห อายอพัะ ตึอน, บอ อัน แฮะ โดบ อาตอนียา, ยี ตู โดบ อาบาซาโลม ตึอน. ดอ ยึร อัน ลอง อาตอนียา ฆาย อาบาทา, อัน บอ เตา ฮาว ดี ทึบ บีก บอด. อัน บอ ปา กาโตต บัต อี กอย ดี กาโช็ง หลู ตึอน. 29 อี เฮา บอ กาลาง ดี อาซาโลวโมว ลอง อายอพัะ แฮะ เตา ฮาว ดี ทึบ บีก บอด, กอย ดี กาโช็ง หลู ตึอน. อาซาโลวโมว บอ จัร อาบีนายา อี มูห ฆอน อาเยฮอยาดา ตึอน ต็อห, “แตห แม ฮาว ง็อห แวน อัน.”

30 อาบีนายา ตึอน บอ ฮาว ฌัม ดี ทึบ บีก ตึอน บอ ต็อห ดี อายอพัะ, “คูนดีคัม จัร แม, แตห แม เลห ตัห นา เรต.” อัน วี ต็อห, “โอว ตู เลห, แตห โอว ยัม ดี นี.” แฮะ ฮอต, อาบีนายา วี เวณ กาลาง ดี คูนดีคัม ต็อห, “อายอพัะ กาลาง ปาย นี ดี โอว.”

31 คูนดีคัม วี ต็อห, “โบง โดบ ปี ต็อห อัน. ง็อห ยัม อัน. แฮะ ฮอต, แม วี ดีบ อัน. แตห แม ง็อห แวน ดูอี อี แฮะ ง็อห อาซาก อี ดอ ตู มึห ดีโคว. ปาย ตี บอ โอว บอ ครึร ฆูณ โอว อาว ฮู โลว คัม หมาบ อัน. 32 เฌาพรา ดี วี แตห อัน คัม หมาบ อัน. อัน แฮะ ง็อห ยัม อา วี ตึอน, ตู แตห ฆูณ โอว นับ ลอง อัน ตี. อี มูห ฆอน อีมาย อาเนรัะ ตึอน, อี จืร อาบานา, อี มูห ดา โบว อี อึบ ดา ซึก อีซาเรลัะ บอ ฆอน อาเยซา อี จืร อามาซา, อี มูห ดา โบว อี อึบ ดา ซึก ดูอี อายูดา, ฆาย อา วี ตี แฮะ มูห ดูอี หมึอม หลึอม อัน. 33 แตห อายอพัะ บอ หลูกหลาน อัน โลว คัม หมาบ ฌึร ตี เซเซ. อี มูห อาดาวีด เฆ ฆอน อัน บอ หลูกหลาน อัน, แตห เฆ ปึอน นา บอด นา หมึอม เซเซ, แตห เฆ บอ อึบ บึง มืง ตี เซเซ.”

34 อาซาโลวโมว แฮะ ฮอต ต็อห ปาย ตี อาบีนายา อี มูห ฆอน อาเยฮอยาดา ตึอน, อัน บอ วี ฮาว ง็อห อายอพัะ แตห อัน ยัม. เฆ บอ ดีบ อัน ดี กาดาย โดง กอย บรีม อัน แคง แปร กาฮ็อห. 35 คูนดีคัม บอ แตห อาบีนายา อี มูห ฆอน อาเยฮอยาดา ตึอน วี กาดาง แบน ดา โบว อี อึบ ดา ซึก อัน. อี มูห ดา อี หลู ดี เฌาพรา อี จืร อาฌาโดก ตึอน, คูนดีคัม บอ แตห อัน วี ปลูะ อาบาทา.

36 ปัน ตี คูนดีคัม บอ จัร เฆ แดะ อาซีมี ตึอน บอ ต็อห ดี อัน, “แตห แม ซัม กาง แม แคง มืง เยรูซาแลม, แตห แม กอย ดี ตี. อาว ปึอน เลห. อาว ปึอน ฮาว นา เหมา. 37 แม ฮี เลห ฮาว นา ตัะ แบลง คีดาโรน ตึอน, แม ดี วี คัม หมาบ แม. แตห แม ซาดีก, แตห แม โนว. แม ดี ยัม อาคัร หมาน.”

38 อาซีมี วี ต็อห ดี คูนดีคัม, “โฆรห ปี กาลาง แม ตี แฮะ มูห แฮะ หมาน. โอว มืร ดี โบง โดบ แคะ ปี ต็อห แม ตี.” ปัน ตี อาซีมี บอ กอย เหลณ แคง มืง เยรูซาแลม ตึอน.

39 อึณ แฮะ ปวน ฮาว โอย ซีนัม. ดอ อัน ตี หมาย อาซีมี อา วี บอ ฮาว โดง กอย อาคีด อี มูห ฆอน อามาคา, อี มูห คูนดีคัม อี อึบ มืง ฆาทัะ ตึอน. อี เฮา บอ ต็อห ดี อาซีมี, “หมาย แม, ฆาย กอย ดี มืง ฆาทัะ.” 40 อาซีมี บอ นับ ลอง อัน ตี, อัน บอ อึณปราย กอบ มาลา อัน, บอ ฮาว ดี มืง ฆาทัะ อี มูห โดง กอย อาคีด, แตห อัน เหรต หมาย อัน ตึอน. อัน บอ แดะ ตัห ฆาย.

41 ปัน ตี อาซาโลวโมว บอ ยึร ลอง อาซีมี แฮะ เลห นา เรต มืง เยรูซาแลม, ฮาว ดี มืง ฆาทัะ, แฮะ วี ตัห. 42 อัน บอ จัร เฆ ฮาว แดะ อาซีมี บอ ต็อห ดี อัน, “โอว แฮะ แตห แม กาแซณ ดืง แตห บอ เฌาพรา โทม. โอว แฮะ ดัม ซาดีก ดี แม ต็อห, ‘เซ แม ฮี ฮาว ปอ โปละ, แม โลว ยัม ซีแง อัน ตี อาคัร หมาน.’ โอว แฮะ ฮอต กาลาง อูน ปาย ตี อาว มูห? แม มืร แฮะ อึร ต็อห, ‘โฆรห ปี กาลาง แม ตี, แฮะ มูห.’ 43 เซ อึณ ปาย ตี โกบ อึณ ปาย เหมา, แม ปี ตู โนว ซีคยา โฆรห ปี กาแซณ แม ดี อาต เฌาพรา. บอ โฆรห ปี ดัม อูน โอว ดี แม?”

44 คูนดีคัม บอ กาลาง ดี อาซีมี ต็อห, “แคง น็อห แม, แม นับ โตต ดอน โมยว หมาบ แปะ แฮะ ดึอม โบง แม ดี ฆูณ โอว อี มูห อาดาวีด. โคว, เฌาพรา ดี แตห แม วี คัม หมาบ แม ตี. 45 อึณ ยี มูห โอว คูนดีคัม อาซาโลวโมว, เฌาพรา ดี ม็องการา แตห ดี โอว, แตห โอว ปึอน ดี อึบ มืง ปี ดึอม อึบ อาดาวีด. เฌาพรา ดี แตห มืง ตี กอย เซเซ.”

46 แฮะ ฮอต, คูนดีคัม บอ กาลาง ดี อาบีนายา อี มูห ฆอน อาเยฮอยาดา ตึอน, แตห อัน ฮาว ง็อห ยัม อาซีมี. ปัน ตี อาซาโลวโมว บอ ปึอน ดี อึบ ซีคยา มืง. อาว ฮู มึห อาเซ อี ซี กาแคณ ดี อัน.