1 วาย แฮะ ฮอต ยัม อาซอลู ตึอน, อาดาวีด บอ วี เลห แคง โดง แปะ แฮะ แป อัน ดี ดูอี อามาเลก เฆ ตึอน, วี ตัห กอย แคง มืง ฌีกาลาด อาดา อา ซีแง. 2 อึณ บอ ฌัม ซีแง ฮาโอย, อึณ มึห ดูอี อู วี อี ตัห ฌัม โดง กอย อาดาวีด. อัน บอ มูด ฆึบ ดี กาดาย บอ กรึบ อาดาวีด. ครึง ปี ตา อัน แฮะ กายาต, บอ กาปูห แฮะ กอย แดง ฆีณ อัน. ดูอี วี ตี แฮะ ตัห โดง กอย ดา ซึก อาซอลู.

3 อาดาวีด บอ ดีหมอด อัน ต็อห, “แม ตัห นา เหมา?” ดูอี ตึอน วี ต็อห, “โอว แฮะ เตา เลห แคง โดง คยัะ ดูอี อีซาเรลัะ.”

4 อาดาวีด วี ต็อห, “อึณ บอ ปาย เหมา, แตห แม กาลาง ดี โอว.” แฮะ ฮอต, ดูอี ตึอน วี ต็อห, “เฆ ดา ซึก แฮะ เตา โดง กาโฆห ตี. ดูอี แฮะ ยัม กืน กาเซา. บอ อาซอลู บอ ฆอน อีมาย อัน อี จืร อาโยวนาทาน แฮะ ยัม.”

5 อาดาวีด ดีหมอด กาโณม อี แฮะ ตัห ดี อัน ต็อห, “เหมา แม ปาย ดี นับ, อาซอลู ฆาย ฆอน อัน อี จืร อาโยวนาทาน แฮะ ยัม?”

6 ดูอี ตึอน วี ต็อห, “ดอ ตา ฌัม โอว ดี นอน ฆีลัะปอ ตึอน, อาซอลู แฮะ วี อึณกรวน บลา เลียห อัน. ดา ซึก อี ป็อะ ลักเลา บอ ดา ซึก อี ป็อะ มังปร็อง, เฆ แฮะ คูงครัห กาเซา, แฮะ รีน ดี ครับ อัน. 7 อัน บอ วี มางัห วีว นา ปัน, อัน บอ ยึร โอว, บอ แดะ โอว. โอว วี ย็อห โฆรห อัน ต็อห, ‘อึณ มูห โอว.’

8 อัน วี ดีหมอด โอว ต็อห, ‘แม มูห อาเซ?’ โอว มืร วี กาลาง ต็อห, ‘โอว มูห ดูอี อามาเลก.’

9 อัน ปี วี ต็อห ดี โอว, ‘แตห แม ตัห ปัว โอว, แตห โอว ยัม. โอว แฮะ เซา กาเซา. พึอม โอว ยี หณัม โตต.’ 10 อัน แฮะ ฮอต ต็อห ปาย ตี โอว บอ ปัว แตห อัน ยัม. โคว, โอว แฮะ นับ, อัน แฮะ ฮอต เกห, อาว ฮู ลอด ยัม. โอว บอ บูด ดึห มังฆึม ปี ชึบ อัน ดี ฆีณ อัน บอ กันแด อัน, วี ตัห โดง กอย แม นี.”

11 ปัน ตี อาดาวีด วี กายาต ซีโตว อัน. แคะ กอย เฆ อี กอย โดบ อัน มืร กาโพรม ดี โบง ปาย ตี. 12 เฆ บอ กาโพรม ดี ยาม บอ กลึร บอ ยืน ปี ดี โฮม แตห กอ ฌัม บา ดี อับ. เฆ กลึร โกบ ยัม อาซอลู ฆาย ฆอน อัน อี จืร อาโยวนาทาน, บอ เฆ ดา ซึก เฌาพรา. เฆ บอ กลึร โกบ ตู แป เฆ ดูอี อีซาเรลัะ รันซู เฆ. เฆ แฮะ ยัม ดี บลา ปัวะ ลาง.

13 อาดาวีด ดีหมอด ดูอี ตึอน. ต็อห, “แม ตัห นา เหมา?” ดูอี ตึอน วี ต็อห, “โอว มูห ดูอี อาโมยว เฮา, ดูอี อาโมยว อามาเลก ตึอน.”

14 อาดาวีด วี ต็อห ดี อัน, “อึณ ปาย เหมา, ปี ยัะ โบง แม ดี ดูอี แปะ แฮะ พ็อห เฌาพรา นามัน ดี ฆีณ อัน, แตห อัน ยัม?”

15-16 อาดาวีด วี แดะ ดูอี อัน อู วี ต็อห, “ฮาว ง็อห ยัม อัน.” แฮะ ฮอต, เฆ วี ง็อห ยัม อัน. โคว, อาดาวีด แฮะ ฮอต ต็อห ดี อัน, “แตห แม วี คัม หมาบ แม. โมต แม แฮะ กาลาง หมาบ แม ดอ ต็อห แม, ‘โอว แฮะ โบง ดี ดูอี แปะ แฮะ พ็อห เฌาพรา นามัน ดี ฆีณ อัน, แตห อัน ยัม.’”

17 อาดาวีด บอ ต็อห โหมว อี กลึร โกบ ยัม อาซอลู ฆาย ฆอน อัน อี จืร อาโยวนาทาน ตึอน. 18 อัน มาโนว แตห อี โนว โหมว ลอง อัะ. เฆ วี แดม อูน โหมว ตี แคง บับ อี จืร อายาซา. โหมว ตี อึณ ต็อห,

19 “เบ ดูอี อีซาเรลัะ อึย, เฆ อี มึห อาพูง บอ ซาเร กาแต เบ แฮะ คัม ดี ยัม แดง นอน โดง กอย เบ. ดา ซึก อี มึห โปลม ตาง, เฆ แฮะ ฮอต เกห ยัม โตต.

20 แกวะ กาลาง ลอง อัน ตี แคง มืง ฆาทัะ. แกวะ แค โดบ อึณเตณ มืง อาซาเคโลน, โยว ฆอน อีบึณ ดูอี พีลีที เฆ วี แบน น็อห ดาคึย กาเซา. โยว ฆอน อีมาย เฆ อี ตู ซัวะ แวน ฮูน ลัะคานา เฆ วี แบน น็อห ฌอนโฌม กาเซา ดี เฆ.

21 อึย เบ นอน ฆีลัะปอ, แกวะ แตห ฆลาย บอ อึม ดีงาน โจห แดง เบ. ปี ซัม อี แคง มาน บอ แคง โดง นา, แกวะ แตห อึณ มึห เบล อี หมึอม หลู. โคว, ครึง มัง ฆ็อง ปี ตา เฆ ดา ซึก อี มึห โปลม แฮะ วี คย็อะ ดี ตี. บอ มัง ฆ็อง ปี ตา อาซอลู อาว ฮู มึห อี ลึมลา พ็อห นามัน.

22 บลา อัะ อาโยวนาทาน แฮะ ดึอม ล็อะ เซเซ. บอ อาซอลู ตู ซัด ดีโลย ดีลาย บลา เลียห อัน. ดอน เฌณ ดอน เฌณ ฆาย แฮะ แป เฆ รันซู อี มึห โปลม มึห แฮณ.

23 ดอ อีม ฆาย อาซอลู ฆาย อาโยวนาทาน แฮะ หมึอม ร็อก, แฮะ ล็อะ น็อห อี เฮา. ฆาย บอ ยัม, ฆาย มืร ตู ลาย กาฆ็อห. ฆาย มืร แฮะ ครัน หลึอม มาฆลาง. บอ โปลม ฆาย แฮะ หลึอม โปลม มาครังซี.

24 อึย เบ อี มูห ฆอน อีบึณ ดูอี อีซาเรลัะ, แตห เบ กาโพรม ดี ยาม โกบ อาซอลู. อัน แฮะ ดัว เบ ตา ครึง ชีด, ครึง เรณ แฆ. แฮะ ดัว บอ ครีว, แตห อึณ ดึก ดี ครึง ปี ตา เบ ตี.

25 ดา ซึก อี มึห โปลม ตาง, เฆ แฮะ ยัม โตต โดง กาโฆห เฆ ดี รันซู ตึอน. อาโยวนาทาน แฮะ กาดูห ดี ยัม ดี โดง จา ตึอน.

26 อึย แม อีกัด โอว, อี มูห อาโยวนาทาน, โอว แฮะ มึห น็อห กลึร กาเซา โกบ แม. แม แฮะ มูห อี ล็อะ กาเซา น็อห โอว. น็อห ร็อก แม ดี โอว แฮะ หมึอม หลึอม น็อห ร็อก อีบึณ ดี โอว.

27 ดา ซึก อี มึห โปลม ตาง, เฆ แฮะ ฮอต ยัม. บอ ครึง กาโฆห แฮะ ฮอต ชึม โตต.” แคะ ตี อาดาวีด ต็อห โหมว โกบ กลึร อัน.