วาย ตี อาดาวีด บอ วี ดีหมอด เฌาพรา ต็อห, “โอว ดี ปึอน วี เวณ แคง มืง ยูดา อู มืง?” เฌาพรา วี กาลาง ดี อัน ต็อห, “แตห แม เวณ.” อาดาวีด วี ดีหมอด ต็อห, “แม ดี แตห โอว เวณ ดี มืง เหมา?” อัน เฌา มืร วี ต็อห, “แตห แม ฮาว เวณ แคง มืง เฮโบรว ตึอน.”

2 อาดาวีด บอ เวณ, แตห บอ อีบึณ อัน อา วี ตึอน โดบ อัน. อี มูห นาง เอฮีนอง, อัน มูห ดูอี มืง เยจาเรลัะ. บอ นาง เอพีเฆลา อี ดึอม มูห อีบึณ อานาบาลัะ ตึอน, อี มูห ดูอี มืง ฆาเมลัะ ตึอน. 3 บอ เฆ อี มูห ดูอี อัน บอ อี มูห อึณโฮม อัน, เฆ ดอน อี ฮาว โดบ อัน, แตห เฆ วี กอย ดี มืง เฮโบรว ตี. 4 ปัน ตี ดูอี อายูดา เฆ บอ ตัห ดาง อาดาวีด แตห อัน แบน คูนดีคัม อี อึบ มืง ยูดา.

อึณ บอ มึห อี เฮา กาลาง ดี อาดาวีด ลอง ดูอี แคง มืง ยาเบด อี กอย แคง กาดาย มืง ฆีเลอาด, เฆ แฮะ ฮอต ดีบ อาซอลู. 5 อาดาวีด มืร บอ จัร ดาลาม อัน ฮาว ดี มืง ยาเบด อี กอย แคง กาดาย มืง ฆีเลอาด ตึอน, แตห เฆ ต็อห, “แตห เฌาพรา ม็องการา แตห ดี เบ โกบ แฮะ กาเว เบ ดา กาณา เบ อี มูห อาซอลู ตึอน, โกบ แฮะ ดึห ดีบ เบ โดว ยัม อัน. 6 แตห เฌาพรา วี โบง นา หมึอม อี กาซืร ดี เบ. โอว มืร ดี วี เวียะ ดัว เฆฌู ตี ดี เบ โกบ แฮะ โบง เบ ปาย ตี. 7 ดอ ตี นี, แตห เบ วี มึห โปลม. แกวะ แตห เบ มึห น็อห ดีแตด. โคว, อาซอลู อี มูห ดา กาณา เบ แฮะ ฮอต ยัม. เฆ ดูอี อาโมยว ยูดา ยี แฮะ วี กาโพรม ดี ดาง โอว แบน คูนดีคัม เฆ.”

8 ดอ อัน ตี อึณ ยี มูห อาบานา อี มูห ฆอน อาเนรัะ. อัน แฮะ ดึอม มูห ดา ตาง อี อึบ ดา ซึก อาซอลู. อัน แฮะ ดึห อาอีซาโบวเซด อี มูห ฆอน อีมาย อาซอลู ตึอน, ตึย อัน ฮาว ดี มืง มาฮานาอีม. 9 เฆ แฮะ โจะ แตห อัน แบน คูนดีคัม อี อึบ แคง มืง ฆีเลอาด. บอ ดูอี แคง มืง อาซูรา ฆาย มืง เยจาเรลัะ บอ เฆ ดูอี อาเอพารีม, ดูอี อาเบนยาม บอ ดูอี อีซาเรลัะ, แตห อัน อึบ โตต ดูอี ฌึร ตี.

10 อาอีซาโบวเซด อี มูห ฆอน อาซอลู ตี, ดอ อึบ อัน มืง อีซาเรลัะ, อาซาก อัน แฮะ ปึอน พวน ฆึร ซีนัม. อัน บอ อึบ มืง อาดา อา ซีนัม.

11 เฆ ดูอี อาโมยว ยูดา ยี โดบ อาดาวีด. ดอ กอย อาดาวีด ดี มืง เฮโบรว ตึอน, อัน บอ อึบ ดูอี อายูดา อาดา บู ซีนัม ดี เดา มาเฆียน.

12 ปัน ตี อาบานา, อี มูห ฆอน อาเนรัะ ตึอน, อัน บอ แยต เฆ ดา ซึก อาอีซาโบวเซด อี มูห ฆอน อาซอลู ตึอน, วี เลห แคง มืง มาฮานาอีม, วี ฮาว ดี มืง กีปอง. 13 อายอพัะ อี มูห ฆอน นาง เจรูยา, อัน ยี แยต เฆ ดา ซึก อาดาวีด. อัน บอ เลห ฮาว, แตห เฆ ลาย กาตูณ โคบ อึม ดึง กีปอง ตึอน. เฆ บอ กอย อู บลาก อู พึง ดี อึม ดึง ตึอน.

14 อาบานา ตึอน กาลาง ดี อายอพัะ ต็อห, “แตห ดูอี ดีรอย ลาย กาโฆห, แตห อาย ยอด.” อายอพัะ วี ต็อห, “อึร, แตห เฆ โบง ปาย ตี.”

15 ปัน ตี ดูอี อาโมยว อาเบนยาม ฆึร ดี อา วี, อี มูห ดูอี อาอีซาโบวเซด บอ ดูอี อาดาวีด ฆึร ดี อา วี, เฆ บอ ตัห ลาย ณืร. 16 อู วี โดว อู วี, เฆ บอ ลาย ปา ฆีณ บอ ลาย ซัด ตา อาตึม. เฆ บอกาเฆลียด บอ เกห ยัม ดี ตี. โกบ อึณ ปาย ตี โดง ตี เฆ บอ แตห อัน จืร เฮลัะกาฮีดฌูรีม, อี มูห แคง กาดาย กีปอง ตึอน.

17 ซีแง ตี เฆ บอ กาโฆห กาเซา. อาบานา บอ ดูอี อีซาเรลัะ บอ ชึม ดี ดูอี อาดาวีด.

18 ดอ อัน ตี ฆอน อีมาย นาง เจรูยา บอ โอย วี แฮะ กาโฆห. เฆ จืร, อายอพัะ, อาพีเซ บอ อาซาเฮลัะ. เปลา อาซาเฮลัะ ตึอน แฮะ ครัน, กอ แหนน มาฌัะ อี กอย แคง แปร. 19 อาซาเฮลัะ ตึอน บอ คูงครัห ฮาว โดบ อาบานา ตึอน. ดอ ฮาว อัน, อัน มืร ตู วัห นา อาฆัะ นา อาอัห. อัน ฮาว ซืร โดบ อาบานา. 20 อาบานา บอ วี ยอด วีว นา ปัน. อัน บอ วี ดีหมอด ต็อห, “อึย อาซาเฮลัะ, อึณ มูห แม?” อัน บอ วี ต็อห, “อึร แฮะ มูห โอว.” 21 อาบานา วี ต็อห, “มางัห ยอด, นา ฆัะ นา อัห แม. เหมต ดูอี ดีรอย เฆ ตี คอ อู วี, ดึห ฮาว ครึง กาโฆห อัน ตี.” อัน แฮะ ฮอต ต็อห ปาย ตี อาซาเฮลัะ ตึอน ยี ตู โทม, แนะ อี โดบ ดี ปัน อัน. 22 ปัน ตี อาบานา บอ วี ต็อห ดี อาซาเฮลัะ, “แตห แม จู โดบ โอว. เซ แม ตู จู ดอ ตี นี, โอว ดี ซัด แม ดึก ดี กาดาย. เซ โอว ยี ง็อห แม, โอว ดี ต็อห มาเซ ดี อีกัด แม อี มูห อายอพัะ ตึอน.

23 อัน ตู โทม, แนะ อี ฮาว. อาบานา ตึอน บอ ดึห ฆล็อง เลียห อัน, บลูห วัต อัน, แตห กอ หลูห นา กาตู อัน. อัน บอ เกห ยัม ดี ตี. เฆ ดูอี อี ตัห ฌัม โดง ยัม อาซาเฮลัะ ตึอน, เฆ บอ ฆืด ยอด.

24 ปัน ตี อายอพัะ ฆาย อาพีเซ ตึอน, วี คูงครัห โดบ อาบานา ตึอน. ฆาย บอ ตัห ฌัม ดี นอน อัมมา อี กอย นา อาต มืง กีอา โดบ อึณเตณ อี ฮาว แคง แปร กีปอง ตึอน. ซีแง มืร แฮะ เฆต. 25 ดูอี อาโมยว อาเบนยาม ตึอน, เฆ บอ กาฌูะ นา ปัน อาบานา บอ แบน อู พึง, ฆืด กอย กาแดะ นอน ตึอน.

26 ปัน ตี อาบานา บอ แดะ อายอพัะ ต็อห, “แม ซี แตห มาปัวะ เฆ เลียห ง็อห เซเซ? อึณ ดี แตห อาย ลาย ฌ็อง เซเซ. แตห แม จัร ดูอี แม, แตห เฆ จู คูงครัห โดบ วอแว เฆ ดอ ตี นี.”

27 อายอพัะ วี ต็อห, “แฮะ มูห แฮะ หมาน, เซ แม ตู กาลาง โฆรห ดี ดูอี เฆ นี, เฆ ดี บอ คูงครัห ดี ปัน บีนอง เฆ, แตห กอ ฌัม ปา แคหณา.”

28 ปัน ตี อายอพัะ ตึอน, บอ บูด เวา. แคะ กอย ดูอี เฆ ตึอน อาว ฮู คูงครัห โดบ ดูอี อีซาเรลัะ ปัว, อาว ฮู กาโฆห ปัว.

29 อาบานา เฆ ดูอี อัน, เฆ บอ กาโลห ฮาว ฆลัง อาราพัะ ตึอน ดอง คืน, บอ กาโลห อึม แบลง ยอดาน, บอ กาโลห ฮาว ดี กาแต มืง บีซาโลน, กอ วี ฌัม ดี มืง มาฮานาอีม.

30 อายอพัะ บอ วี เลห โดง คูงครัห อัน อาบานา ตึอน, วี ตัห ฌัม โดง กอย อัน. ดอ วี แดะ อัน ดา ซึก อาดาวีด, แตห เฆ ตัห กาฌูะ, อึณ ลูด ฆึร ดี ดีม วี. บอ อาซาเฮลัะ ตึอน อาว ฮู กอย. 31 เฆ ดา ซึก อาดาวีด ยี แฮะ ง็อห ยัม ดูอี อาเบนยาม อี มูห ดา ซึก อาบานา อาดา โอย มาย็อห ดี เดา ฆึร วี. 32 เฆ บอ ดึห โดว ยัม อาซาเฮลัะ ตึอน, ฮาว อูน แคง บาเรว ฆูณ อัน, อี กอย แคง มืง เบดแลม ตึอน. อายอพัะ เฆ ดูอี อัน, เฆ บอ ฮาว ฌัม มืง เฮโบรว ดอ แฮะ บลาง แปร.