1 ดอ มึอน อึณ มึห ดูอี อู วี แคง อึณกรึห อาฌูพา, อัน จืร อาเอนคานา. มืง บรีม อัน มูห มืง รามา อี กอย ดี โคบ นอน แคง มืง ตาง อี จืร มืง อาเอพารีม. อาเอนคานา ตึอน มูห ฆอน อาเยโรวฮัม. อาเยโรวฮัม วี มูห ฆอน อาเอลีฮู. อาเอลีฮู มูห ฆอน อาตอฮู. อาตอฮู วี มูห ฆอน อาฌูพัะ, อี มูห ดูอี แคง ครึร อาเอพารีม. 2 อาเอนคานา ตึอน มึห อีบึณ อา วี. อีบึณ อู วี จืร นาง ฮานา. อีบึณ ปอ วี จืร นาง เบนีนา. นาง เบนีนา ตึอน อัน มึห ดี เฮียง ฆอน. อี มูห นาง ฮานา ตึอน อัน ยี ตู มึห ดี เฮียง ฆอน.

3 ดอน ซีนัม ดอน ซีนัม อีมาย ตึอน โฮะ ดี มืง ซีโลว, แตห อัน ปึอน ดี หลู กรึบ เฌาพรา ดี ตี. อัน มูห เฌาพรา อี อึบ โตต ดอน โมยว. ดา ตาง อี หลู ดี เฌาพรา กอย ดี มืง ซีโลว ตึอน. อึณ มูห อาเอลี บอ ฆอน อีมาย อัน อา วี อี จืร อาฮอพีม ฆาย อาพีเนฮาด. 4 บอ ฌัม ปัน ดี หลู อาเอนคานา ตึอน, วาย แฮะ ฮอต หลู, อัน วี กาซาง โมยว ปี หลู เฆ, แตห อีบึณ อัน เฆ ฆอน อัน ดอน อี ปึอน ดี โฮม. 5 อี มูห นาง ฮานา ตึอน, อัน ยี ดัว อา บูน. โคว, อัน ร็อก กาเซา วี ตี. เฌาพรา ยี ตู แตห นาง ฮานา ตึอน ปึอน ดี เฮียง ฆอน. 6 โกบ ตู แตห เฌาพรา อัน ปึอน ดี เฮียง ฆอน, อีบึณ ปอ วี ตึอน ปยาต อัน, โบง นา จีจีว ดี อัน. 7 ดอน ซีนัม ดอน ซีนัม อึณ บอ ปาย ตี. ดอ โฮะ เฆ โดง กรึบ เฆ เฌาพรา, อึณ มูห อีบึณ ปอ วี ตึอน, อัน วี ปยาต นาง ฮานา. โคว, นาง ฮานา บอ ยาม, อาว ฮู โฮม มาเซ. 8 ปัน ตี อาเอนคานา อี มูห อีมาย อัน บอ ดีหมอด อัน ต็อห, “อึย นาง ฮานา, โกบ มาเซ ปี ยาม แม? แม ปี ซอ ฮู โฮม ปี ดี โฮม, เหมา อึณ ปาย น็อห แม ปี ซอ ดีแตด ปาย ตี? น็อห โอว ดาคึย ดี แม หลึอม โอว มึห ฆอน อีมาย ฆึร วี.”

9 อึณ บอ มึห อาดา อู ซีนัม, วาย แฮะ ฮอต เฆ โฮม บลอย หลู ดี มืง ซีโลว ตึอน, นาง ฮานา บอ ยีต ฮาว ซาคึร ดี เฌาพรา. ดอ อัน ตี อาเอลี ตึอน กอย โคบ ร็อง บาง มาโลห โดง กรึบ เฆ เฌาพรา. 10 นาง ฮานา ยี มึห น็อห กลึร กาเซา. อัน บอ ซาคึร ดี เฌาพรา. อึม งาย อัน มืร แหล. 11 อัน ดัว กาดีก ซัดฌา ดี เฌาพรา ต็อห, “อึย แม เฌาพรา อี อึบ โตต ดอน โมยว, แตห แม ยอด อี ดูก ดี น็อห โอว นี. แตห แม นัมโหลห โอว, แกวะ แตห แม ปีว โอว. โอว หมาณ แม ดัว ฆอน อีมาย ดี โอว. โอว มืร วี อาบ ดัว อัน ดี แม เฌาพรา บอ โจว อาซาก อัน. เฆ มืร ตู กับ ฆีณ อัน ดอ เหมา.”

12 ดอ ซาคึร อัน ตี, อัน มืร ซาคึร เหลณ ดี อาต เฌาพรา. อาเอลี บอ ยอด ปี ปาย โมต อัน. 13 นาง ฮานา ยี ซาคึร แคง น็อห อัน. มาแล, ซีปึณ อัน รัร รัร, โฆรห อัน ยี ตู เลห. โคว, อาเอลี บอ ทาง, อัน แฮะ ยึต ป็อห. 14 อาเอลี บอ ต็อห ดี อัน, “แม แฮะ ยึต ป็อห นี, แฮะ เหลณ แคะ เหมา? แวน น็อห ซี เดียง แม ป็อห ตี.”

15 นาง ฮานา บอ วี กาลาง ดี อัน ต็อห, “อาว มูห. โอว นี, โอว มูห อีบึณ น็อห อึณจัม, น็อห ดีแตด. โอว ตู มึห ดี เดียง อึม มางูน เฆ ป็อห. โอว ยี ซาคึร ดี อาต เฌาพรา นี. โอว กาลาง โตต ดูก ดอน โมยว ดี อัน เฌา. 16 แม แกวะ ทาง, โอว มูห อีบึณ อี ตู หมึอม. โกบ น็อห โอว แฮะ กลึร กาเซา, โอว แฮะ กาลาง โตต ดี เฌาพรา.”

17 อาเอลี บอ วี ต็อห, “แตห แม กอย ดาคึย. แตห เฌาพรา ปี กรึบ เอ ดูอี อีซาเรลัะ กาเว แม, แตห อัน ดัว แคะ ปี แฮะ ซาคึร หมาณ แม ตี.”

18 อัน มืร วี ต็อห, “แฮะ มูห ฆูง เฆฌู แม ดา. แตห ปี โบง โอว โดบ ปี อึง แม เซเซ.” ปัน ตี อัน บอ ฮาว โฮม โบม. นา อัน มืร วี ซี บลาง.

19 ปา แคหณา ซีณวัห เจว, เฆ วี ยีต วี กรึบ เฌาพรา. แฮะ ฮอต, เฆ บอ วีว โดง กอย เฆ ดี มืง รามา ตึอน. ปัน ตี อาเอนคานา บอ วี ฮาว อีด โดบ นาง ฮานา. เฌาพรา บอ นัมโหลห แปะ แฮะ ซาคึร อัน. 20 นาง ฮานา บอ แด บาดีก ซันเท. บอ ฌัม อาคราว ดี ฆึอด ฆอน, อัน บอ ฆึอด ฆอน อีมาย. อัน บอ แตห ฆอน ตี จืร อาซามูเอน. โคว, อัน ต็อห, “ฆอน ตี มูห ปี ซาคึร หมาณ โอว ดี เฌาพรา.”

21 บอ ฌัม ซีนัม ดี ตัห, อาเอนคานา บอ อึณโฮม อัน เฆ ดอน อี, เฆ วี โฮะ หลู ดี เฌาพรา, แตห อึณ ปี ปี ดึอม หลู เฆ ดอน ซีนัม ตึอน, แตห เฆ หลู ปี ดึอม กาแซณ เฆ ดี เฌาพรา. 22 นาง ฮานา ตึอน ยี ตู ฮาว. โคว, อัน ต็อห ดี อีมาย อัน, “เซ ฆอน นี ฮี ฮอต ฆ็อห ปู, โอว ดี วี โฮะ อาบ อัน, แตห อัน กอย ดี อาต เฌาพรา เซเซ.”

23 อาเอนคานา บอ วี ต็อห, “อึร, ปาย ตี อาว ลึก. แตห แม กอย, แตห อึณ กอ ฌัม ปัน ฆ็อห ฆอน ดี ปู ตี. แตห อึณ หมาน แคะ ปี ดัว แม กาดีก ซัดฌา ดี เฌาพรา.” ปัน ตี นาง ฮานา ตึอน บอ กอย เฮียง ฆอน อัน, แตห อึณ กอ ฌัม ปัน ดี แตห อัน ฆอน ตึอน ฆ็อห ปู.

24 ฆอน ตึอน แฮะ ฮอต ฆ็อห ปู, อัน บอ ดึห ฆอน, บอ มัก อาโล็ง อู โดว, อาซาก อี แฮะ โนะ โอย ซีนัม บอ กาแปะ ฆึร ดี พัน แบล, บอ อึม มางูน อู ปูง. อัน บอ ฮาว ฌัม โดง กรึบ เฆ เฌาพรา ดี มืง ซีโลว ตึอน. ดอ อัน ตี ฆอน อัน ยี ซี ดีแตด. 25 เฆ บอ ง็อห ยัม มัก ตึอน, บอ ดึห ฆอน, ฮาว ตึย อัน ฌัม โดง กอย อาเอลี ตึอน. 26 นาง ฮานา บอ ต็อห, “อึย แม ดา, แม โนว โอว? โอว มูห อีบึณ อี กอย โคบ แม อี ซาคึร ดี เฌาพรา ซีแง ตึอน. 27 ดอ อัน ตี โอว ซาคึร แตห โอว ปึอน ฆอน นี. เฌาพรา มืร แฮะ กาเว ดัว ปี หมาณ โอว ตี.

28 โกบ อึณ ปาย ตี โอว กอ คัม ดี อาบ ฆอน โอว ตี ดี เฌาพรา. อัน มืร ดี แบน แดเจณ เฌาพรา บอ โจว อาซาก อัน.” นาง ฮานา แฮะ ฮอต กาลาง โฆรห ตี ดี อาเอลี ตึอน, อาเอลี บอ วี กรึบ เฌาพรา.