1 คา อาต อึณ มึห ดา ตาง อี ซูงพยาด ดารา แคง มืง อีซาเรลัะ. ดอ อัน ตี ดูอี อี กอย แคง มืง ตี, เฆ บอ เอต ปี ดี โฮม. อึณ บอ มึห ดูอี อู วี อี กอย มืง เบดแลม แคง กาดาย มืง ยูดา. อัน บอ โย็ง บอ อีบึณ บอ ฆอน อีมาย อัน อา วี, แตห เฆ ฮาว กอย ดี มืง โมวอาบ. 2 ฆูณ เฆ จืร อาเอลีมาเลก. อีบึณ อัน จืร นาง โอวมี. ฆอน อัน อา วี จืร อามาฮาโลน ฆาย อาคีโลน. เฆ มูห ดูอี อาโมยว เอพาราด อี กอย แคง มืง เบดแลม แคง กาดาย มืง ยูดา ตึอน. เฆ บอ วี ฮาว ดี มืง โมวอาบ, แตห เฆ กอย ดี ตี.

3 อาเอลีมาเลก ตึอน บอ ยัม, แตห อึณ ฆีด มี นาง โอวมี เฆ ฆอน อีมาย อัน อา วี. 4 ฆอน อัน ฆาย ตึอน บอ คัด, ดึห อีบึณ อี มูห ดูอี โมวอาบ. อู วี จืร นาง ออราบา, ปอ อู วี จืร นาง รูทา. เฆ บอ กอย แคง มืง ตี อาดา ฆึร ซีนัม. 5 แฮะ ฮอต, อามาฮาโลน ฆาย อาคีโลน ตึอน บอ วี ยัม. นาง โอวมี อาว ฮู มึห อีมาย เฆ ฆอน.

6 วาย อัน ตี นาง โอวมี แฮะ ยึร ลอง เฌาพรา แฮะ วี กาเว เฆ ดูอี อาโมยว ยูดา, แฮะ แตห เฆ วี มึห ปี ดี โฮม. โคว, นาง โอวมี บอ เอา อัน อา วี ตึอน, เฆ วี ต็อห ดี เลห แคง มืง โมวอาบ. 7 บอ อัน บอ เอา อัน วี เลห แคง มืง โมวอาบ, แตห เฆ วี ฌัม แคง มืง ยูดา.

8 ดอ ฮาว เฆ โดบ อึณเตณ ตี, นาง โอวมี บอ วี กาลาง ดี เอา อัน ต็อห, “แตห บาย กอย ดี กาง บรีม บาย, กอย รึม โดบ ฆูณ มา บาย, แตห เฌาพรา บอ กาเว บาย, แตห อึณ ปี แปะ แฮะ ดึอม กาเว บาย ดี โอว บอ เฆ อี แฮะ ฮอต ยัม.” 9 แตห เฌาพรา แตห บาย วี แด อึณโฮม กามาย, แตห บาย ปึอน ดี กอย ดาคึย.

แฮะ ฮอต, อัน บอ อูห ฆาย. ฆาย มืร ยาม. 10 ฆาย วี ต็อห ดี อัน, “ยาย มืร ซี ฮาว รึม โดบ แม, ฮาว โดง กอย วอแว แม.” 11 นาง โอวมี วี ต็อห, “ฆอน บาย อึย, เหมา อึณ ปาย ปี ซี ฮาว บาย โดบ โอว? โอว อาว ฮู มึห ฆอน อี ปึอน วี แบน อีมาย บาย. 12 ฆอน บาย อึย, แตห บาย วี เวณ. โอว แฮะ กัด, อาว ฮู คัม ดี วี ดึห อีมาย ปอ อู วี. 13 เซ โอว ปี บอ ดึห อีมาย อาตึร, เซ โอว ปี บอ มึห ฆอน อีมาย อา วี, บาย ดี บอ คัม ดี บัร แตห ฆอน โอว ตี กอ วี ตาง, แตห ฆาย วี แบน อีมาย บาย? บาย ดี บอ คัม ดี บัร, ตู ดึห อีมาย อี เฮา? ฆอน บาย อึย, อาว ปึอน แบน ปาย ตี. อึณ แฮะ หณาบ กาเซา ดี น็อห โอว โกบ บาย. โคว, เฌาพรา แฮะ แตห โอว คัม ดูก ตี.”

14 แฮะ ฮอต, เฆ บอ วี ยาม ปอ อึณ ปัว. อี มูห นาง ออราบา ตึอน บอ อูห ฆึณ อัน วี เวณ มืง บรีม อัน. อี มูห นาง รูทา, อัน บอ ฮาว โดบ ฆึณ อัน.

15 นาง โอวมี วี ต็อห ดี นาง รูทา, “แม ยอด มาอาน แม, อัน แฮะ วี เวณ โดง กอย บีนอง วอแว อัน. อัน บอ เวณ กรึบ เฌา ปี ดึอม กรึบ อัน. แตห บอ แม วี เวณ โดบ มาอาน แม.”

16 นาง รูทา วี ต็อห, “แม ฆึณ, แม แกวะ แคร โอว ฮาว โดบ แม. โอว ตู คัม ดี เบลห แม อู วี ฮาว. แม บอ ฮาว นา เหมา, โอว มืร ดี ฮาว โดบ แม. แม บอ กอย ดี เหมา, โอว มืร ดี กอย ดี ตี. ดูอี อาโมยว แม แฮะ แบน ดูอี อาโมยว โอว. เฌาพรา ปี กรึบ แม แฮะ แบน เฌาพรา ปี กรึบ โอว. 17 แม บอ ยัม ดี เหมา, โอว มืร ดี ยัม ดี ตี, แตห อี บอ ดีบ โอว ดี ตี. เซ โอว ฮี โบง แบน โมยว แบน โมยว แตห โอว ปึอน ดี กาย็อห ดี แม อาต ยัม โอว, แตห เฌาพรา ดัม หมาบ กาเซา ดี โอว.” 18 ปัน ตี นาง โอวมี แฮะ นับ ซีคยา, เอา อัน อี มูห นาง รูทา, อัน แฮะ ซี ฮาว หมาน โดบ อัน. อัน มืร อาว ฮู วี ต็อห มาเซ.

19 แฮะ ฮอต, ฆาย บอ ฮาว ดี มืง เบดแลม. ดอ ตัห ฌัม ฆาย แคง มืง เบดแลม, เฆ ดูอี อี กอย แคง มืง เฆ บอกาเฆลียด บอ โคย ยอด ฆาย. เฆ ลาย ต็อห, “อึณ แหนน, นาง โอวมี แฮะ ตัห.”

20 นาง โอวมี วี ต็อห ดี เฆ, “เบ แกวะ ฮู ต็อห โอว จืร นาง โอวมี. แตห เบ ต็อห นาง มารา ดี โอว. โคว, อัน เฌา อี ตาง หลึอม โตต แฮะ โบง แตห อึณ ดูก กาเซา ดี โอว. 21 โอว แฮะ มึห เฌะฌูง โตต ดอน โมยว ดอ เลห โอว แคง มืง นี. ดอ ตี นี โอว วี ตัห, โอว อาว ฮู มึห มาเซ. เฌาพรา อี อึบ โตต ดอน โมยว, อัน แฮะ แตห โอว ฌัม ดูก ปาย ตี. โคว, อาว โลว ต็อห โอว จืร นาง โอวมี.”^a

22 ปาย ตี นาง โอวมี ฆาย เอา อัน อี จืร นาง รูทา อี มูห ดูอี โมวอาบ ฆาย วี ตัห ฌัม แคง มืง เบดแลม ดอ มูห อาคราว โซะ โหงว.